تايلاندتاعى «اماتا» كومپانياسىنىڭ باسشىسى ءارى قۇرىلتايشىسى بولىپ تابىلاتىن مۋلتيميلليونەر, بەلگىلى كاسىپكەر ۆيكروم كروماديتتىڭ قارجىلىق دەمەۋىمەن الىس جولعا شىققان اۆتوكەرۋەننىڭ قازاقستاندا اتباسىن تىرەگەن العاشقى بەكەتى پەتروپاۆل قالاسى بولدى. 17 ناۋرىزدان ءوز ساپارىن ۇيىمداستىرعان تايلار بۇعان دەيىن بيرما, كورەيا, قىتاي, رەسەي ەلدەرىن باسىپ ءوتىپ, ومبى ارقىلى جەتكەن. ودان ءارى ەلىمىزدىڭ بىرقاتار قالالارىن ارالاماق.
تايلاندتاعى «اماتا» كومپانياسىنىڭ باسشىسى ءارى قۇرىلتايشىسى بولىپ تابىلاتىن مۋلتيميلليونەر, بەلگىلى كاسىپكەر ۆيكروم كروماديتتىڭ قارجىلىق دەمەۋىمەن الىس جولعا شىققان اۆتوكەرۋەننىڭ قازاقستاندا اتباسىن تىرەگەن العاشقى بەكەتى پەتروپاۆل قالاسى بولدى. 17 ناۋرىزدان ءوز ساپارىن ۇيىمداستىرعان تايلار بۇعان دەيىن بيرما, كورەيا, قىتاي, رەسەي ەلدەرىن باسىپ ءوتىپ, ومبى ارقىلى جەتكەن. ودان ءارى ەلىمىزدىڭ بىرقاتار قالالارىن ارالاماق.دەلەگاتسيا مۇشەلەرىنىڭ قۇرمەتىنە س.مۇقانوۆ اتىنداعى ءامبەباپ كىتاپحانادا ىسكەرلىك كەزدەسۋ ۇيىمداستىرىلىپ, وندا ءسوز العان وبلىس اكىمىنىڭ ورىنباسارى قايرات بەكەنوۆ پرەزيدەنت ن.ءا.نازارباەۆ ەل ەكونوميكاسىنا قىزىعۋشىلىق تانىتقان شەتەلدىك ينۆەستورلار ءۇشىن قولايلى مۇمكىندىك تۋدىرۋ, ەكسپورت قۋاتىن ارتتىرۋ مىندەتتەرىن قويعانىن, رىنوك كوكجيەگىن كەڭەيتۋگە, EXPO-2017 كورمەسىنە ازىرلىكتى كۇشەيتۋگە, «جاسىل» ەكونوميكانى دامىتۋعا ايرىقشا كوڭىل ءبولىپ وتىرعانىن, وسى ورايدا تۋريزم, شاعىن جانە ورتا بيزنەس سالالارىنا ينۆەستيتسيالىق قارجىلاي قولداۋ نيەتىن كوزدەگەن تايلاند مەيماندارىنا جان-جاقتى قولداۋ كورسەتىلەتىنىن جەتكىزدى. كومپانيانىڭ قور باسقارۋشىسى پانچانا حانىم قازاق ەلىنىڭ قوناقجايلىلىعىنا, اسەم تابيعاتىنا دەگەن ريزاشىلىق سەزىمىن بىلدىرە كەلىپ, ساپار ماقساتىن ءتۇسىندىردى. ونىڭ ايتۋىنا قاراعاندا, كومپانيا تايلاندتا جانە ۆەتنامدا ءۇش ءىرى يندۋستريالىق پارك يەلەنەتىن كورىنەدى. ولاردىڭ قۇرامىنا 1 مىڭداي كاسىپورىن توپتاستىرىلىپ, 150 مىڭنان استام ادام تۇراقتى جۇمىسقا تارتىلعان.
تايلىقتاردىڭ وسى جۇمىس ساپارىنا بىردەن-ءبىر دانەكەر بولا بىلگەن «ExpoArisCo.Ltd» فيرماسىنىڭ ديرەكتورى رومان ارىستانوۆتىڭ دا ايتارى از بولمادى. ول قازاقستان مەن تايلاند اراسىنداعى ەكونوميكالىق بايلانىستىڭ 20 جىلدان بەرى تۇراقتى وركەندەپ كەلە جاتقانىن ايتا كەلىپ, ەكى ەلدىڭ يندۋستريالىق-يننوۆاتسيالىق زور الەۋەتتەرىن, وسى سالادا قالىپتاسقان جاقسى ۇردىستەرىن ودان ءارى ىلگەرىلەتۋدەگى ىسكەرلىك قارىم-قاتىناستىڭ ماڭىزىن اتاپ ءوتتى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.
