بيىل تابيعات انا جومارتتىق تانىتىپ تۇر. كوكتەمدە باستالعان مولشىلىق كەپىلى اق جاۋىن ارادا بىرەر كۇندى سالادى دا, دامىلداپ العان سوڭ ءبىر تىنباستان اسپاننان سىركىرەي باستايدى. كەندى التايدىڭ قايبىر بۇرىشىنا بارا قالساڭىز, بەلۋاردان اساتىن كوك ءشوپتى كورەسىز. تاياۋدا ۇلان اۋدانىنىڭ وترادنوە اۋىلىنداعى «اگرو-بام» شارۋا قوجالىعىنىڭ جەم-ءشوپ دايىنداپ جاتقان بريگاداسىندا بولعانىمىزدا, قىزۋ ەڭبەكتىڭ ۇستىنەن شىقتىق.
بيىل تابيعات انا جومارتتىق تانىتىپ تۇر. كوكتەمدە باستالعان مولشىلىق كەپىلى اق جاۋىن ارادا بىرەر كۇندى سالادى دا, دامىلداپ العان سوڭ ءبىر تىنباستان اسپاننان سىركىرەي باستايدى. كەندى التايدىڭ قايبىر بۇرىشىنا بارا قالساڭىز, بەلۋاردان اساتىن كوك ءشوپتى كورەسىز. تاياۋدا ۇلان اۋدانىنىڭ وترادنوە اۋىلىنداعى «اگرو-بام» شارۋا قوجالىعىنىڭ جەم-ءشوپ دايىنداپ جاتقان بريگاداسىندا بولعانىمىزدا, قىزۋ ەڭبەكتىڭ ۇستىنەن شىقتىق.
قوجالىقتى ۇزاق جىلدان بەرى اۋىل شارۋاشىلىعىنىڭ بىلگىر مامانى جاقسىلىق قاسەنوۆ باسقارادى. بىلتىر زەينەتكەرلىككە شىقسا دا جاكەڭ جاس جىگىتتەردەي لىپىپ تۇر, قيمىلى شاپشاڭ, ەسەپ-قيساپتى جاتقا سوعادى. قازىر ونىڭ قوجالىعىندا 700 ءىرى قارا, 100 جىلقى بار. بيىل قوجالىق ءۇش جارىم مىڭ گەكتارعا ءداندى داقىلدار, 500 گەكتارعا ءشوپ, 313 گەكتارعا ەكپە ءشوپ ەككەن ەكەن. جاڭبىردىڭ كوپ جاۋىپ, ىلعالدىڭ مول بولۋى سەبەپتى جايقالىپ وسكەن استىق ءالى كۇنگە جاپ-جاسىل, كۇن جىلىسا بولدى ساپ-سارى تەلەگەي تەڭىزگە اينالاتىن ءتۇرى بار.
– ديقاندار مەن مال ازىعىن دايىنداۋشىلار ءۇشىن قاربالاس ءسات تۋدى. مىنە, ەكى اپتا بولدى جەم-ءشوپ ازىرلەۋگە 15 تەحنيكا مەن جيىرماعا تارتا ادام جۇمىلدىرىلدى. بۇگىنگە دەيىن 750 توننا جەم-ءشوپ ازىرلەندى. 42 جىلدان بەرى تەحنيكانى تىزگىندەپ كەلە جاتقان مايتالمان تراكتورشىمىز بەيسەمباي سالقىمباەۆ كۇندىك تاپسىرماسىن ءبىر جارىم ەسە اسىرا ورىنداۋدا. جۇماعازى اسانوۆتىڭ 30 جىلدىق ەڭبەك ءوتىلى بار, ول دا «متز» تراكتورىمەن ەسەلى ەڭبەك ەتىپ ءجۇر. تىرناۋشى ە.تولعىنباەۆ, وراۋشى بەيبىت باكىشەۆ, ءشوپتى مايالاۋشى ا.نۇراقاتوۆ, ت.مۇساقانوۆ تا قاجىرلى جۇمىس جاساۋدا. امانشىلىق بولسا, مال ازىعىن دايىنداپ العان سوڭ ەگىن وراعىنا كىرىسەمىز. جاڭا اتى اتالعان ازاماتتار تراكتورىن كومباينعا اۋىستىرىپ مىنەدى. بىزدە تەحنيكا جەتكىلىكتى, بەس-التى كومباين ساتىپ العانبىز. مەحانيزاتورلاردىڭ جالاقىسى دا جامان ەمەس. وسىدان بىرنەشە جىل بۇرىن ەگىن وراعى مەن جەم-ءشوپ ازىرلەۋدە ەرەكشە كوزگە تۇسكەن بەس-التى ازاماتقا قۇرمەت پەن مارتەبە كورسەتىلىپ, بۇكىل اۋىل تۇرعىندارىنىڭ قاتىسۋىمەن تۇرعىن ءۇي مەن جەڭىل كولىكتى سىيعا تارتقانبىز. بيىل دا ەڭبەك ادامدارىنا قۇرمەت كورسەتۋ ويدا بار, –دەپ «اگرو-بام» شارۋا قوجىلىعىنىڭ توراعاسى جاقسىلىق قاسەنوۆ ءبىراز ماعلۇمات بەرە كەتتى.
مىنە, بىتىك وسكەن كوك ءشوپتى «متز-80» تراكتورىمەن سىرىلداتىپ شاۋىپ كەلە جاتقان مەحانيزاتوردى توقتاتىپ, سوزگە تارتتىق. بەيسەمباي سالقىمباەۆ سوزگە ساراڭ ەكەن, 42 جىلدان بەرى مەحانيزاتور ەكەنىن, اۋا-رايىنىڭ اشىق كۇنىن ءتيىمدى پايدالانۋعا تىرىسىپ جاتقانىن تىلگە تيەك ەتتى. ونىڭ سوڭىندا كەلە جاتقان جۇماعازى اسانوۆ تا جازدىڭ ءبىر كۇنى جىلعا ازىق ەكەنىن, جانتالاسا جۇمىس جاساپ جاتقاندارىن ايتتى. سەرگەي مورسوفەي دەگەن مەحانيزاتور بيىل ەگىننىڭ شىعىمى عاجاپ ەكەنىن, تابيعات انانىڭ جومارتتىعىن پايدالانىپ قالۋ ءۇشىن تەحنيكانى ساقاداي-ساي ازىرلەپ قويعانى جايلى ايتتى. ۇلاندىق جەم-ءشوپ ازىرلەۋشىلەر بيىلعى قاتاڭ قىستان قىسىلماي شىعاتىنىنا كامىل سەنەدى. وعان ولاردىڭ بۇگىنگى قاجىرلى ىستەرى كۋا بولسا كەرەك.
وڭداسىن ەلۋباي,
«ەگەمەن قازاقستان».
شىعىس قازاقستان وبلىسى,
ۇلان اۋدانى.
سۋرەتتەردى تۇسىرگەن اۆتور.
