ءماجىلىس توراعاسى گرەك ەلى قازاقستاننىڭ ەۋروپاداعى ماڭىزدى ارىپتەسى ەكەنى اتاپ ءوتتى. وسى جىلى ديپلوماتيالىق قاتىناستىڭ ورناعانىنا 28 جىل تولدى. قازاقستاننىڭ تۇڭعىش پرەزيدەنتى نۇرسۇلتان نازارباەۆ اتالعان مەملەكەتپەن ىنتىماقتاستىقتى نىعايتۋعا زور كوڭىل بولگەنىن ايتا كەلىپ, ن. نىعماتۋلين قازىرگى پرەزيدەنت قاسىم-جومارت توقاەۆتىڭ ەلىمىزدىڭ ساياسي باعىتىن ودان ءارى جالعاستىرىپ كەلە جاتقانىنا توقتالدى.
ن. نىعماتۋليننىڭ پىكىرىنشە, بۇگىنگى كۇنى مەملەكەتتەرىمىز اراسىندا ساۋدا-ەكونوميكالىق, مادەني-گۋمانيتارلىق بايلانىستار بەلسەندى دامىپ كەلەدى. الداعى ۋاقىتتا اسىرەسە, تۋريزم سالاسىندا ارىپتەستىك ماڭىزدى ءرول اتقارادى. ءماجىلىس توراعاسى پارلامەنتارالىق ىنتىماقتاستىقتى نىعايتۋعا ايرىقشا كوڭىل ءبولدى. زاڭ شىعارۋ ورگاندارى اراسىندا تابىستى ىقپالداستىق جالپى العاندا, ەكىجاقتى قارىم-قاتىناستى تەرەڭدەتۋگە ىقپال ەتپەك.
ءوز كەزەگىندە ەلشى مىرزا گرەكيادا قازاقستاندى الەمدەگى بەيبىتشىل جانە تۇراقتى مەملەكەت رەتىندە جوعارى باعالايتىنىن, سونىمەن قاتار. ءبىزدىڭ ەلىمىزدىڭ دامۋ باعدارىنا قىزىعۋشىلىقپەن قارايتىنىن اتاپ ءوتتى. ودان ءارى ادام-گەورگيوس اداميديس ەكونوميكانى ءارتاراپتاندىرۋ باعىتىندا گرەكيا كۇن ەنەرگەتيكاسى مەن بالامالى ەنەرگەتيكا سالاسىندا ءوز تاجىريبەلەرىن ۇسىنۋعا دايىن ەكەنىن جەتكىزدى.
تاراپتار ەكى ەل اراسىندا پارلامەنتارالىق ءىس-قيمىلدىڭ الەۋەتى مىقتى ەكەنىن ءسوز ەتە كەلىپ, بەيىندى كوميتەتتەر مەن ىنتىماقتاستىق جونىندەگى توپتار ارقىلى ءوزارا بايلانىستى تەرەڭدەتۋدىڭ ماڭىزدىلىعىنا نازار اۋداردى.
