اقش پرەزيدەنتى باراك وبامانىڭ وسى جىلدىڭ قىركۇيەگىندە سانكت-پەتەربۋرگ قالاسىندا وتەتىن G20 سامميتىنە قاتىساتىنى ناقتىلاندى. بىراق, ونىڭ سامميتتەن كەيىن رەسەي پرەزيدەنتى ۆلاديمير پۋتينمەن كەزدەسەتىندىگى نەمەسە كەزدەسپەيتىندىگى ازىرگە بەلگىسىز بولىپ وتىر.
اقش پرەزيدەنتى باراك وبامانىڭ وسى جىلدىڭ قىركۇيەگىندە سانكت-پەتەربۋرگ قالاسىندا وتەتىن G20 سامميتىنە قاتىساتىنى ناقتىلاندى. بىراق, ونىڭ سامميتتەن كەيىن رەسەي پرەزيدەنتى ۆلاديمير پۋتينمەن كەزدەسەتىندىگى نەمەسە كەزدەسپەيتىندىگى ازىرگە بەلگىسىز بولىپ وتىر.
بۇدان ءبىراز ۋاقىت بۇرىن اقش باسشىسىنىڭ وسى سامميتكە قاتىسۋ ماسەلەسى ءالى شەشىلمەگەندىگى حابارلانعان ەدى. وعان باستى سەبەپ – رەسەيدىڭ اقش ازاماتى ەدۆارد سنوۋدەنگە ۋاقىتشا باسپانا بەرۋى بولعان-دى. وسىعان بايلانىستى باراك وباما تەلەشوۋدا سويلەگەن سوزىندە رەسمي ماسكەۋدىڭ بۇل ارەكەتىنە نارازىلىق سىڭاي تانىتىپ, «رەسەي بيلىگى «قىرعي قاباق سوعىس» كەزىندەگىدەي قيمىل تانىتىپ وتىر», دەپ اتاپ وتكەن ەدى. ايتا كەتەيىك, العاشىندا سامميت اياقتالعان سوڭ, ب.وبامانىڭ ماسكەۋدە اقش پەن رەسەيدىڭ ەكىجاقتى سامميتىنە قاتىسۋى جوسپارلانعان بولاتىن.
زاڭ شىعارۋشى ورگان جۇمىسىن توقتاتتى
تۋنيس ۇلتتىق كونستيتۋتسيالىق اسسامبلەياسىنىڭ سپيكەرى مۋستافا بەن دجافار ەلدىڭ زاڭ شىعارۋشى ورگانى ءوز قىزمەتىن ۋاقىتشا توقتاتاتىنىن مالىمدەدى. «رەيتەر» اگەنتتىگىنىڭ حابارلاۋىنشا, اسسامبلەيا ۇكىمەت پەن وپپوزيتسيا اراسىندا كەلىسسوز باستالمايىنشا جانە ساياسي داعدارىس شەشىمىن تاپپايىنشا جۇمىس ىستەمەيدى.
بۇگىندە ەل استاناسىنداعى اسسامبلەيا ورنالاسقان عيمارات الدىندا 40 مىڭعا جۋىق ادام جينالعان. پوليتسيانىڭ دەرەكتەرىنە قاراعاندا, شەرۋشىلەر «ناحدا» يسلامدىق پارتياسىنىڭ باسشىسىمەن بىرگە بيلىكتەگى كواليتسيانىڭ وتستاۆكاعا كەتۋىن تالاپ ەتۋدە. ەلدىڭ پرەمەر-ءمينيسترى لاراەد بۇدان شامالى ۋاقىت بۇرىن پارلامەنتتىك سايلاۋ 2013 جىلدىڭ جەلتوقسانىندا وتەتىنىن, ال وعان دەيىن ۇكىمەت وتستاۆكاعا كەتپەيتىنىن مالىمدەگەن ەدى.
اسكەريلەردىڭ قىلمىستىق ىسىنە نۇكتە قويىلدى
ىستامبۇل سوتى مەملەكەتتىك توڭكەرىس جاساۋعا نيەتتەندى دەپ ايىپتالعان اسكەريلەرگە قاتىستى ۇكىم شىعاردى. ۇكىمدى التى سۋديا كەزەكپەن وقىعان. ال سوت وتىرىسى ىستامبۇلدان 40 شاقىرىمداي جەردەگى تۇرمەدە وتكەن.
«ەرگەنەكون» استىرتىن ۇيىمىنا قاتىستى بۇل قىلمىستىق ىستەر پروتسەسى بەس جىلداي جۇرگىزىلگەن ەكەن. سوت پروكۋراتۋرانىڭ 370-كە جۋىق ادامعا تاققان ايىپتارىمەن كەلىسكەن. سوت ولاردىڭ 21-ءىن اقتاپ, قالعاندارىن ايىپتى دەپ تاۋىپتى. ناتيجەسىندە 20 ادام ءومىر بويى تۇرمەدە وتىرۋ جازاسىنا كەسىلىپ, قالعاندارى ۇزاق مەرزىمگە باس بوستاندىعىنان ايىرىلعان كورىنەدى.
شەكارادا تاعى دا وق اتىلدى
ازەربايجان مەن ارمەنيا شەكاراسىندا ارميان اسكەري قىزمەتشىلەرى مىنگەن اۆتوموبيل اتقىلاندى. ازەربايجاننىڭ اپا اگەنتتىگىنىڭ اقپاراتتارى بويىنشا, ءبىر ادام قازا تاۋىپ, تاعى ءبىر اسكەري جارالانعان. ال اۆتوماشينا ىستەن شىققان سياقتى.
اتالعان اگەنتتىكتىڭ دەرەك كوزدەرىنە سۇيەنىپ حابارلاۋىنشا, ارمياندار شەكاراعا جاقىن ورنالاسقان قازاق اۋدانىنا «ديۆەرسيالىق» ارەكەتتەر جاساماقشى بولعان. اۆتوماشينا ەكى ەل شەكارالارىنىڭ اراسىنداعى «بەيتاراپ ايماققا» شىققاندا اتقىلانعان. ارمياندىق تاراپ ازەربايجاننىڭ «ءبىر ادام قازا تاپتى» دەگەن اقپاراتىن جوققا شىعارىپ وتىر. ارمەنيا اسكەري ۆەدومستۆوسىنىڭ ءباسپاسوز حاتشىسى ل.وۆانيسيان باق-تارعا بەرگەن سۇحباتىندا بۇل وقيعانى ارانداتۋ دەپ اتاپتى.
قىزمەتكە كىرىسە سالىپ, وتستاۆكاعا كەتتى
تايۆاندا قورعانىس ءمينيسترى بولىپ قىزمەتكە كىرىسكەن ەندريۋ يان ەكى اپتادان سوڭ وتستاۆكاعا كەتتى. اقپاراتتارعا قاراعاندا, ونىڭ قىزمەتتەن كەتۋىنە شىعارماشىلىق ۇرلىق (پلاگيات) سەبەپ بولسا كەرەك.
وسىعان بايلانىستى ەكس-مينيستر ءباسپاسوز ءماسليحاتىن وتكىزىپ, قاتەلىگىن مويىندادى جانە كەشىرىم سۇرادى. ونىڭ ءمالىم ەتۋىنشە, وسى قاتەلىگى ەل باسشىلىعى مەن ارميانى ۇياتقا قالدىردى. مينيستر بولىپ قالا بەرۋ ەندى مۇمكىن ەمەس. سويتسە, ساياساتكەر ءوزىنىڭ 2007 جىلى جارىق كورگەن كىتابىندا وزگە اۆتورلاردان الىنعان ماتەريالداردى دايەكسوز رەتىندە كورسەتپەگەن ەكەن. سونىمەن بىرگە, ول كىتاپتاعى بىرنەشە بولىمدەردى دوستارى جازعاندىعىن دا جاسىرىپ قالىپتى.
تەررورلىق ارەكەت جاسوسپىرىمدەر ءومىرىن قيدى
پاكستاننىڭ كاراچي قالاسىندا جاستار اراسىنداعى فۋتبول كوماندالارىنىڭ ويىنىنان كەيىن بولعان تەررورلىق ارەكەت سالدارىنان 11 ءجاسوسپىرىم مەرت بولدى. بۇل جونىندە «سينحۋا» اگەنتتىگى حابارلادى.
جارىلىستان, سونداي-اق 26 بالا جاراقات العان, ولاردىڭ بىرقاتارىنىڭ جاعدايى اۋىر. جارىلعىش زات فۋتبول الاڭىنا جاقىن ماڭدا تۇرعان موتوتسيكلگە قويىلعان كورىنەدى. تەررورلىق ارەكەتتى ازىرشە قانداي دا ءبىر ۇيىم نەمەسە توپ مويىندارىنا العان جوق.
ينتەرنەت ماتەريالدارى نەگىزىندە ازىرلەندى.
