- رەسمي كەلىسىمگە سايكەس سدۋ «ەكسپو-2020 دۋباي» كورمەسىنە وقىتۋ تۋرلارىن ۇيىمداستىرۋ بويىنشا العاشقى حالىقارالىق سەرىكتەس ۋنيۆەرسيتەت مارتەبەسىنە يە بولدى. حالىقارالىق ستۋدەنتتەرمەن الماسۋ باعدارلاماسى جەتى وقىتۋ تۋرىن قۇرايدى, ونىڭ ىشىندە ستۋدەنتتەر ماڭىزدى پاندەر بويىنشا الەمنىڭ جەتەكشى ۋنيۆەرسيتەتتەرىنىڭ ۇزدىك تاجىريبەسىنەن تولىق اقپارات الادى. جالپى ۇيىمداستىرۋشىلاردىڭ ماقساتى – كورمە بارىسىندا الەمنىڭ تۇكپىر-تۇكپىرىنەن ستۋدەنتتەردى تارتۋ. قىسقا مەرزىمدى وقىتۋ اياسىندا ستۋدەنتتەر تاجىريبە الماسۋ, قولدانبالى-عىلىمي سيپاتتاعى جوبالاردى زەرتتەۋ, يندۋستريانىڭ جەتەكشى ساراپشىلارىنان قارقىندى ترەنينگتەردەن وتۋگە مۇمكىندىك الادى. مۇنداي ءادىس شەتەلدىك ستۋدەنتتەردىڭ دۋباي قالاسىندا مانساپ قۇرۋعا قىزىعۋشىلىعىن ارتتىرادى, - دەپ تۇيىندەدى سدۋ پرەزيدەنتى مەيىربەك ءماجيتوۆ.
«ەكسپو-2020 دۋباي» بۇكىلالەمدىك كورمەسى – «اقىل-ويدى بىرىكتىرە وتىرىپ, بولاشاقتى قۇرامىز» ۇرانىمەن وتەتىن اۋقىمدى ءىس-شارا. شارانىڭ باستى ماقساتى – ميلليونداعان ادامدارعا ادامزاتتىڭ سوڭعى جەتىستىكتەرى مەن ونەرتابىستارىن كورسەتۋ. كورمەگە كەلۋشىلەردىڭ سانى 25 ميلليونعا جۋىق ادامدى قۇرايدى, ولاردىڭ 70 پايىزى شەتەلدىكتەر بولادى دەپ كۇتىلۋدە, بۇل دۇنيەجۇزىلىك كورمەلەردىڭ 168 جىلدىق تاريحىندا رەكوردتىق كورسەتكىش بولادى.
كورمە ءۇش تاقىرىپتىق باعىتتا وتەدى: «مۇمكىندىكتەر», «ۇتقىرلىق» جانە «تۇراقتىلىق». كورمەگە كەلۋشىلەر جاڭا تەحنولوگيالار مەن تۇجىرىمدامالار جايلى ماڭىزدى اقپاراتتار الادى. اۋقىمدى شاراعا 200-دەن استام قاتىسۋشى قاتىسادى دەپ جوسپارلانۋدا.
