ۇلى وتان سوعىسىندا قازا تاپقان جاۋىنگەر جۇمابەك نۇركەنوۆتىڭ سۇيەگى 6 مامىر كۇنى تۋعان اۋىلى تەرەڭكولگە جەرلەندى. ج.نۇركەنوۆ 1902 جىلى دۇنيەگە كەلگەن. 1943 جىلدىڭ 2 قاڭتارىندا مايداندا قازا تاپقان. ال, بىلتىر رەسەيدىڭ كيروۆ قالاسىنىڭ «فرونت» اتتى ىزدەستىرۋ وتريادى ستارايا رۋسسا قالاسى ماڭىندا 1942 جىلى سولتۇستىك-باتىس مايدانى ۇرىسى وتكەن جەردەن جۇماباي بەكتۇرسىنوۆتىڭ مۇردەسىن تاپقان بولاتىن. جاۋىنگەردىڭ مۇردەسى تۋعان جەرى قاشىر اۋدانى لۋگوۆوە اۋىلىنا اكەلىنىپ, قايتا جەرلەگەن ەدى.
ۇلى وتان سوعىسىندا قازا تاپقان جاۋىنگەر جۇمابەك نۇركەنوۆتىڭ سۇيەگى 6 مامىر كۇنى تۋعان اۋىلى تەرەڭكولگە جەرلەندى. ج.نۇركەنوۆ 1902 جىلى دۇنيەگە كەلگەن. 1943 جىلدىڭ 2 قاڭتارىندا مايداندا قازا تاپقان. ال, بىلتىر رەسەيدىڭ كيروۆ قالاسىنىڭ «فرونت» اتتى ىزدەستىرۋ وتريادى ستارايا رۋسسا قالاسى ماڭىندا 1942 جىلى سولتۇستىك-باتىس مايدانى ۇرىسى وتكەن جەردەن جۇماباي بەكتۇرسىنوۆتىڭ مۇردەسىن تاپقان بولاتىن. جاۋىنگەردىڭ مۇردەسى تۋعان جەرى قاشىر اۋدانى لۋگوۆوە اۋىلىنا اكەلىنىپ, قايتا جەرلەگەن ەدى.
سول كەزدە ءبىز گازەتىمىزدە «بويتۇمارى تۋعان جەرىنەن توپىراق بۇيىرتتى» دەپ جازدىق. ەندى, مىنە, تاعى ءبىر جاۋىنگەردىڭ بويتۇمارى ءوزىنىڭ مۇردەسىنىڭ تۋعان جەرىنە جەتۋىنە سەبەپكەر بولدى. بيىل قاڭتار ايىندا رەسەيدىڭ نوۆگورود وبلىسى بوروۆيچي قالاسىنىڭ «زۆەزدا» ىزدەستىرۋ وتريادى جەرلەسىمىز, قاشىر اۋدانىندا تۋعان جاۋىنگەر جۇمابەك نۇركەنوۆتىڭ مۇردەسىن تاپقاندارىن حابارلايدى. سول جەردەگى «زۆەزدا» ىزدەۋ جاساعى مارقۇمنىڭ اتى-ءجونى جازىلعان بويتۇمارىن تاۋىپ, قازاقستاندىق «مايدان جولى» جاساعىنا حابار بەرەدى. سول جەردەگى سولتۇستىك-باتىس مايدانىنىڭ ايگىلى «دەميانسكي قورعانىسى» ۇرىسىندا جۇمابەك نۇركەنوۆ قازا تاۋىپتى. سوعىس زاردابىن تارتقان بارلىق قازاق وتباسىلارى سياقتى نۇركەنوۆتەر وتباسىنداعى ءتورت بىردەي ەر-ازامات 41-ءشى جىلى سوعىسقا اتتانىپتى. ۇشەۋى ەلگە امان-ەسەن ورالادى. ال جۇمابەك حابارسىز كەتەدى. جالپى, سوعىسقا پاۆلودار وبلىسىنان 46 مىڭ ادام اتتانىپتى. كەيىن حابار-وشارسىز كەتكەن 300-دەن اسا جاۋىنگەردىڭ مۇردەلەرى تۋعان جەرگە جەتكىزىلدى. ءسويتىپ, جەلەزين اۋدانى ۇرلىتوبە شەكارا بەكەتىندە رەسەيلىكتەر قازاقستاندىق «مايدان» توبىنىڭ مۇشەلەرىنە جاۋىنگەردىڭ مۇردەسى سالىنعان كونتەينەردى تاپسىردى. ول نوۆگورود قالاسى تۇبىندەگى سافرونوۆكا سەلوسىنان جەتكىزىلدى. مامىر ايىندا اۋدان ورتالىعى تەرەڭكولدە اۋىل حالقى, سوعىس جانە ەڭبەك ارداگەرلەرى, تۋىس-تۋعاندارى جينالعان قارالى ميتينگ ءوتتى. شاراعا وبلىس, اۋدان باسشىلىعى قاتىستى. سوعىس دالاسىندا قازا تاپقانداردىڭ رۋحىنا باس ءيىپ, تاعزىم ەتتى.
–اعامىز سوعىسقا اتتانعاندا بىزدەر بالا ەدىك. ورالمادى. دەگەنمەن, قاشاندا ءبىر حابار كەلەتىندەي ءبىرتۇرلى بولىپ جۇرەتىنبىز, جاراتىلىستىڭ جازعانى بولار, ءۇمىت الدامايدى ەكەن,– دەگەن ەدى بىلتىر بىزگە جۇماباي بەكتۇرعانوۆتىڭ تۋىسى ساعىناي اپا.
–جۇمابەك اعام جاستايىنان وتە زەرەك بولىپتى. كەلگەن ادامنىڭ ءتىل-كوزى وتپەسىن دەپ ۇيگە ءبىر ادام كەلسە, اس ۇيگە جاتقىزىلادى ەكەن,–دەيدى جاۋىنگەردىڭ نەمەرە قارىنداسى گۇلزيرا نۇركينا. ال ومبى وبلىسىنان “ەدينايا روسسيا” پارتياسىنىڭ وكىلى, «مولودايا گۆارديا» جاستار ۇيىمىنىڭ باسشىسى سيۋزاننا ەگياننىڭ ايتۋىنشا, بۇل ەكى ەل ءۇشىن ماڭىزدى ءىس-شارا. ويتكەنى, سۇراپىل سوعىس جىلدارى كەڭەس سولداتتارى ءبىر ەل ءۇشىن, ءبىر حالىق ءۇشىن, ءبىر ءۇي ءۇشىن كۇرەستى.
سوعىستا حابارسىز كەتكەن اكەسىن, اعا-باۋىرىن عۇمىر بويى ىزدەگەن ارامىزدا قانشاما جاندارى جارالى تاعدىرلار ءجۇر. قوس جاۋىنگەر جۇماباي بەكتۇرعانوۆ, جۇمابەك نۇركەنوۆتىڭ مۇردەلەرى تابىلعانى, ەلگە جەتكىزىلگەنى جايلى بۇل حابار ۇمىتتەرىن ۇزبەگەن باسقا دا تاعدىرلارعا ءۇمىت وتىن جاعار.
فاريدا بىقاي,
«ەگەمەن قازاقستان».
پاۆلودار وبلىسى,
قاشىر اۋدانى.
