تۋريستىك بيزنەس مودەلدەرىنىڭ دامۋىن ىنتالاندىرۋ جانە قاجىلىق پەن ءتۋريزمنىڭ قاسيەتتى جەرلەرگە قوسقان ۇلەسىن ىلگەرىلەتۋ, سونداي-اق زيارات ەتۋشىلەردىڭ قاجەتتىلىكتەرىن قاناعاتتاندىرۋ, تۋريستىك مەنەدجمەنت سالاسىنداعى اقپارات پەن ۇزدىك تاجىريبە الماسۋ جەلىسىن قۇرۋ ماقساتىنداعى كونفەرەنتسيا قورىتىندىسى بويىنشا ارنايى دەكلاراتسيا قابىلدانادى دەپ كۇتىلۋدە.
بۇل تۋرالى الەمدىك مادەني جانە تابيعي مۇرالاردى قورعاۋ بويىنشا حالىقارالىق ساراپشىلاردىڭ تۇركىستان وبلىسىنىڭ اكىمى ومىرزاق شوكەەۆپەن كەزدەسۋىندە ايتىلدى. شەتەلدىك قوناقتار ورتاعاسىرلىق ساۋلەت ونەرىنىڭ كورنەكتى ەسكەرتكىشى, مۇسىلمانداردىڭ جاپپاي زيارات ەتۋ ورنىنا اينالعان ياساۋي كەسەنەسىنە الەمنىڭ تۇكپىر-تۇكپىرىنەن تۋريستەر مەن زيارات ەتۋشىلەردىڭ اعىلىپ كەلىپ جاتقانىنا كۋا بولعاندارىن جەتكىزدى. دۇنيەجۇزىلىك مۇرالار تىزىمىنە ەنگەن قوجا احمەت ياساۋي كەسەنەسىن, اينالاسىنداعى ايماق پەن وندا ورنالاسقان ارحەولوگيالىق پاركتى حالىقارالىق ستاندارتتار مەن يۋنەسكو تالاپتارىنا سايكەس كەلتىرۋ بۇگىندە باستى مىندەتتەردىڭ ءبىرى. تۋريستەر مەن زيارات ەتۋشىلەر قاسيەتتى مەكەنگە كەلگەندە ونىڭ كونە تاريحىن سەزىنۋى ءتيىس.
سونداي-اق ساراپشىلار بۇگىنگى تاڭدا الەمدە ءارتۇرلى مادەنيەتتەر مەن داستۇرلەردى دارىپتەيتىن قاسيەتتى نىساندار بار ەكەنىن اتاپ ءوتتى. ولاردىڭ كوپشىلىگى جەرگىلىكتى رۋحاني جانە مادەني داستۇرلەرگە تەرەڭ بويلاعان. حالىقارالىق ساراپشىلاردىڭ ايتۋىنشا, الەمدىك مۇرالار تىزىمىنە ەنگەن قاسيەتتى مەكەندەردىڭ 20 پايىزعا جۋىعى ياساۋي كەسەنەسىمەن رۋحاني بايلانىستى.
كەزدەسۋ سوڭىندا وبلىس اكىمى ومىرزاق شوكەەۆ حالىقارالىق ساراپشىلارعا دۇنيەجۇزىلىك مۇرا نىساندارىن ساقتاۋ باعىتىندا جۇرگىزىلىپ جاتقان جۇمىستارى ءۇشىن العىسىن ءبىلدىردى.
تۇركىستان وبلىسى
