مىنە, وسىنداي جەتىستىكتەر ەسكەرىلە وتىرا, تاياۋدا شاردارا اۋدانىندا ىرگەلى مونۋمەنت بوي كوتەردى. بيىكتىگى 5 مەتر بولاتىن بۇل ەسكەرتكىش «شاردارا ارمسپورت» كلۋبىنىڭ مۇشەسى, الەم چەمپيونى قىدىرعالي وڭعارباەۆتىڭ قۇرمەتىنە ورناتىلعان. اۋدان اكىمىنىڭ ورىنباسارى باۋىرجان شومپيەۆ پەن قول كۇرەسىنەن كاسىپقويلار اراسىنداعى الەمدىك فەدەراتسيانىڭ پرەزيدەنتى يگور مازۋرەنكو «قول كۇرەس» دەپ اتالاتىن مونۋمەنتتى سالتاناتتى تۇردە اشتى. «مەن مۇنداي ۇلكەن سپورت كلۋبىن ەشبىر ەلدەن كورگەن ەمەسپىن», دەدى اۋدانداعى قول كۇرەسى تۋرالى دەرەكتى فيلم تۇسىرگەن يگور مازۋرەنكو. جاقىندا الەمدىك قول كۇرەس شەبەرلەرىنىڭ كىل مىقتىلارى باراتىن «توپ-8» تۋرنيرىنە قاتىسىپ قايتقان قىدىرعالي وڭعارباەۆتىڭ قازاق سپورتىنا قوسقان ۇلەسى مول. الەمدىك دەڭگەيدەگى وسىنداي جارىسقا قاتىسقان تۇڭعىش قازاق سپورتشىسى تۋرنيردە 4-ورىندى يەمدەندى. تۋرنيرگە قاتىسقان الىپتاردىڭ اراسىندا ەڭ جەڭىل سالماقتى سپورتشىنىڭ بۇل جەتىستىگىن ماماندار ۇلكەن تابىسقا بالاپ وتىر. قول كۇرەسىنەن الەمدىك فەدەراتسيانىڭ پرەزيدەنتى يگور مازۋرەنكونىڭ مالىمدەۋىنشە, بۇگىندە «شاردارا ارمسپورت» كلۋبىن جانە سپورتشىلارىن الەمدەگى ارمرەستلينگ شەبەرلەرى مويىندايدى. بۇل ورايدا الەمدىك دەڭگەيدەگى سپورتشىلاردى دايارلاي بىلگەن باپكەر ارمان قارسىباەۆتىڭ ەڭبەگى ەرەن. سونداي-اق شاردارالىق قول كۇرەس شەبەرلەرىنە وبلىستىق دەنە شىنىقتىرۋ جانە سپورت باسقارماسى جان-جاقتى قولداۋ كورسەتىپ كەلەدى. ال كۇنى كەشە اشىلعان مونۋمەنت بۇقارالىق سيپات العان قول كۇرەسىمەن اينالىسۋشىلار قاتارىن ارتتىرىپ, جاس سپورتشىلاردى بيىك شىڭدارعا جەتەلەي, ىنتالاندىرا تۇسەرى انىق.
تۇركىستان وبلىسى
