قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ ورازا ايت مەرەكەسىمەن قۇتتىقتاۋى
قۇرمەتتى وتانداستار!
قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ ورازا ايت مەرەكەسىمەن قۇتتىقتاۋى
قۇرمەتتى وتانداستار!
بارشا قازاقستاندىقتاردى مۇسىلمان الەمىنىڭ ەڭ ءبىر قاستەرلى مەرەكەسى – ورازا ايت مەيرامىنىڭ باستالۋىمەن شىن جۇرەكتەن قۇتتىقتايمىن!
قاسيەتتى رامازان ايى اياقتالعانىن بىلدىرەتىن بۇل مەرەكە – يسلامنىڭ عاسىرلار بويعى يگى ءداستۇرىنىڭ, ونىڭ ماڭىزدى رۋحاني قۇندىلىعى بولعان كەڭپەيىلدىڭ, جاقسىلىق پەن مەيىرىمدىلىكتىڭ كورىنىسى.
الەمنىڭ بارشا مۇسىلماندارى مۇباراك رامازان ايىندا ءوزدەرىنىڭ ساناسى مەن جۇرەگىن جامان وي, جات پيعىلدان ارىلتادى. ورازا ايت يماندى كۇشەيتىپ, ازاماتتارىمىزدى قايىرىمدى ءىس جاساۋعا, جاقىنىنا كومەكتەسىپ, مۇقتاجدارعا قولۇشىن بەرۋگە, قوناقجايلىلىق پەن جومارتتىق كورسەتۋگە جىگەرلەندىرەدى.
حالقىمىز يسلام تاتۋلىق پەن تاعاتتىلىقتىڭ, جاسامپازدىق پەن جاراسىمدىلىقتىڭ ءدىنى ەكەنىن ءاردايىم ءوز ىسىمەن كورسەتىپ كەلەدى. ورازا ايت مەيرامى ەلىمىزدە مۇسىلمانداردى عانا ەمەس, كۇللى قازاقستاندىقتاردى بىرىكتىرە تۇسەدى.
قازاقستان حالقى ءوز جەرىنە دەگەن زور سۇيىسپەنشىلىگىمەن, دانالىعىمەن, ەڭبەكقورلىعىمەن, ۇلكەنگە قۇرمەتىمەن, اينالاسىنا قامقورلىعىمەن ەرەكشەلەنەدى. تاۋەلسىز ەلىمىز ءوزىنىڭ باي رۋحاني مۇراسىن, قايتالانباس تاريحي, مادەني جانە ءدىني داستۇرلەرىن ورىندى ماقتانىش ەتەدى.
ولاردى دامىتا وتىرىپ, ءبىز قوعامداعى ۇلتتىق مادەني جانە رۋحاني الۋاندىلىقتى ساقتاۋعا, ازاماتتار اراسىنداعى ءوزارا قۇرمەت پەن سەنىمنىڭ نىعايۋىنا ودان ءارى ىقپال ەتۋىمىز قاجەت.
وسىناۋ قاستەرلى كۇندە مەن بارشا قازاقستاندىقتارعا رۋحاني كۇش-جىگەر, جارقىن كوڭىل, تابىس, زور دەنساۋلىق جانە باق-بەرەكە تىلەيمىن!
قاسيەتتى ورازا ايت مەرەكەسى ارامىزداعى ىنتىماعىمىزدى نىعايتىپ, شاڭىراعىمىزعا بەيبىتشىلىك پەن مول يگىلىگىن اكەلسىن!
