مەيىرىمدى, راقىمدى
اللانىڭ اتىمەن باستايمىن!
قادىرلى وتانداستار, قۇرمەتتى باۋىرلار!
مەيىرىمدى, راقىمدى
اللانىڭ اتىمەن باستايمىن!
قادىرلى وتانداستار, قۇرمەتتى باۋىرلار!
الەمنىڭ ءار تۇكپىرىن مەكەندەگەن مۇسىلمان قاۋىمى رامازان ايىمەن قيماي قوشتاسۋدا. مۇسىلمان قازاق حالقى دا قاسيەتتى ايدى قۇلشىلىقپەن, تاقۋالىقپەن وتكىزىپ, جاراتقاننان ەلگە جاقسىلىق تىلەپ, دۇعا جاسادى. كۇننىڭ اپتاپ ىستىعىنا قاراماستان, اللانىڭ مەيىرىمىنەن ءۇمىت ەتىپ, ورازا ۇستادى. پايعامبارىمىز مۇحاممەد (س.ع.س.) ورازا تۇتقان ۇمبەتىن اللانىڭ ۇلكەن سىيىمەن سۇيىنشىلەگەن. «كىمدە-كىم اللا جولىندا ءبىر كۇن ورازا ۇستاسا, اللا سول پەندەنىڭ ءجۇزىن توزاقتان ءجۇز جىلعا الىستاتادى», – دەگەن حاديس مۇسىلمانعا جىگەر مەن ءۇمىت سىيلايدى. ويتكەنى, رامازان ايىندا اۋىز بەكىتۋدىڭ ساۋابى تەڭدەسسىز. رامازان – ىزگى امالداردىڭ ماۋسىمى بولعاندىقتان, مۇباراك ايدا اللاعا ۇنامدى ءاربىر قايىرىمدى ءىستىڭ ساۋابى ەسەلەنىپ جازىلادى. سەبەبى, ىستىق پەن اشتىققا, اللاعا جاعىمسىز ىستەر مەن عايبات سوزدەن ساقتانىپ, سابىر ەتكەن پەندە ءومىردىڭ كەزەكتەسىپ كەلەتىن قيىنشىلىقتارى مەن سىناقتارىنا توزىمدىلىك تانىتاتىنى اقيقات.
بارشامىزدى ورازا ايت مەرەكەسىنە امان-ەسەن جەتكىزگەن اللا تاعالاعا سانسىز شۇكىرلەر مەن ماداقتار بولسىن. «ايت» ءسوزى «قارىمتا» دەگەن ماعىنانى بىلدىرەدى. ويتكەنى, جاراتۋشى يەمىز ءاربىر ىزگى امال مەن يگىلىكتى ءىستىڭ يەسىنە قارىمتاسىن قايتارادى. پايعامباردىڭ (س.ع.س.) تاعى ءبىر حاديسىندە جۇمىسشى اي سوڭىندا جالاقى الاتىنى سەكىلدى, ورازا ۇستاۋشى دا اللانىڭ نىعمەتىنە, سىي-سياپاتىنا بولەنەتىنى ايتىلعان.
مۇسىلمان قاۋىمىنىڭ ۇلىق مەرەكەسى – ورازا ايتتا جۇرەگىمىز قۋانىش پەن شاتتىققا بولەنەدى, جانىمىز جادىراپ, كوڭىلىمىز شات-شادىمان كۇي كەشەدى. بارشاڭىزدى مۇسىلماننىڭ ۇلىق مەرەكەسىمەن قۇتتىقتايمىن. ورازا ايت مۇباراك بولسىن!
ايت كۇنىندە عۇسىل قۇيىنىپ, جۇپار ءيىس سەبىنىپ, جاماعاتپەن ايت نامازىنا قاتىسۋدىڭ ساۋابى مول. تۋعان-تۋىستاردى, كورشىلەردى, دوس-جاراندى مەرەكەمەن قۇتتىقتاپ, داستارقان جايىپ, ۇلىق مەيرامنىڭ ءسانى مەن سالتاناتىن ارتتىرۋ – ورازا ايتتىڭ وزىنە ءتان جاراسىمدى ءھام ساۋاپتى امالدارىنان. وسى مەرەكەدە ءوزارا رەنجىسكەن كىسىلەردى تاتۋلاستىرساق, وزگەنىڭ قاتە-كەمشىلىگىن كەشىرە بىلسەك, ول دا – مۇسىلمانعا ءتان سيپات. ويتكەنى, اللا تاعالا قاسيەتتى قۇراندا مۇسىلمانداردى كەشىرىم جولىن ۇستانۋعا بۇيىرعان.
كۇندەگى ورازاسىن قۇرمامەن اشۋدى سۇننەت ەتكەن پايعامبارىمىز (س.ع.س) ايت نامازىنا باراردا الدىمەن قۇرمادان ءدام تاتىپ بارىپ ۇيىنەن شىققاندى ۇناتاتىن.
ورازا ايتتا وتباسىمىزعا كوڭىل ءبولىپ, بالالارعا سىيلىق جاساپ, ايتتىق اپەرۋدىڭ دە ماڭىزى زور. بالانىڭ بويىنا ىزگىلىكتىڭ ءدانىن سەبەتىن مەرەكەنى ولار دا اسىعا كۇتىپ, ءتالىمى مەن تاربيەگە تولى قاسيەتتى ايدىڭ ءمانى مەن ماڭىزىن سەزىنەتىن بولادى.
30 كۇن ورازادا حالقىمىز ىجداھاتتىلىقپەن اۋىز بەكىتتى. مەشىتتەرىمىزدە اۋىزاشارلار مەن قايىرىمدىلىق شارالار ۇيىمداستىرىلدى. تۇرمىسى تومەن وتباسىلارىنا كومەك كورسەتىلىپ, قامكوڭىل قارتتار مەن جەتىم-جەسىرلەرگە كوڭىل ءبولىندى. كوپتەگەن ازاماتتار جاقسىلىققا ۇلەس قوسىپ, ساۋابى مول امالدارعا اتسالىستى. بارشاسىنا «اللا رازى بولسىن» ايتامىز. رامازان ايىندا ەلىمىزدىڭ يگىلىگى ءۇشىن جاساعان ءاربىر قايىرلى امال مەن قۇلشىلىقتى الداعى ۋاقىتتا دا جالعاستىرۋدىڭ قارىمى شەكسىز.
اللا تاعالا ۇستاعان ورازالارىمىزدى, دۇعا-تىلەكتەرىمىزدى, ىزگى ىستەرىمىزدى قايىرىمەن قابىل ەتىپ, ەكى دۇنيەدە دە ءجۇزىمىزدى جارىق ەتكەي! مەملەكەتىمىزدىڭ مەرەيى ارقاشان ۇستەم بولعاي!
حالقىمىزدىڭ بىرلىگى مەن ىنتىماعىنا ەشقاشان سىزات تۇسپەسىن! تاۋەلسىزدىگىمىزدىڭ تۇعىرى بيىك, ەگەمەندىگىمىز ماڭگىلىككە باياندى بولعاي!
ەرجان قاجى مالعاجى ۇلى حازىرەت,
قازاقستان مۇسىلماندارى ءدىني
باسقارماسىنىڭ توراعاسى, باس ءمۇفتي.
