قازاقستاننان اعالى-قارىنداستى ەكى جەتكىنشەكتى اسىراپ العان امەريكالىق ەرلى-زايىپتى 49 جاسار ليندا جانە 50 جاستاعى دجوزەف مەيوتتاردىڭ سول وكىل بالالارىن زورلاعاندارى دالەلدەنەر بولسا, ولاردىڭ اربىرىنە 10 جىلدان تۇرمەدە وتىرۋ قاۋپى ءتونىپ تۇر. بۇل تۋرالى يتار-تاسس حابارلادى.
«ايىپتالۋشى ليندا مەيوتت ءوزىن 2005 جىلدان بەرى ەكى جىلدىڭ كولەمىندە قازاقستاندىق جەتكىنشەكتىڭ زورلاپ كەلگەنىن, ونىڭ جىنىستىق قۇمارلىعىن قاناعاتتاندىرۋعا قارسىلىق بىلدىرگەن كەزىندە تۇنشىقتىرۋعا ارەكەت جاساعانىن ايتىپ شاعىندى» دەپ جازادى وسى تۇستا Worcester Telegram & Gazette گازەتى. ءوز كەزەگىندە قازىر 21-گە كەلگەن جاس جىگىت بۇل بايلانىستىڭ باستاماشىلى ايەلدىڭ ءوزى بولعانىن, بۇعان ءوزىنىڭ قارسىلىق جاساي الماعانىن ايتىپ وتىر.
«ول مەنى ۇدايى باقىلاۋدى ۇستاپ وتىردى. ول مەنى قالادى, – دەيدى مەيوتت سوسىن. – ول باسقىنشىلىق ءرول وينادى. مەن باستاماشىل بولعانىم جوق». ايەلدىڭ ايتۋىنشا, سول كەزدەرى 13 جاسار ءجاسوسپىرىم ءوزىن وتە دورەكى ۇستاعان, ەگەر بۇل جىنىستىق قالاۋىن ورىنداماسا, پوليتسياعا شاعىم جاسايتىن بولىپ قورقىتقان. سوزىنە قاراعاندا, ول باسىندا وزىنە شابۋىلداۋشى بالاقايدان قورعانباق بولعان. بىراق موينىنان شاپ بەرىپ ۇستاپ, قىلعىندىرماقشى بولعاسىن, قارسىلىعىن قويعان. ايتۋى بويىنشا, بۇل وقيعانىڭ سىرتقا شىعىپ كەتپەۋىن قالاعان. سەبەبى, وتباسىن بۇزىپ العىسى كەلمەگەن. «ناتيجەسىندە مەن قارسىلىق كورسەتۋدى قويدىم», – دەدى ايەل سوت الدىندا. سول كەزدە ادۆوكات: «نەگە؟» دەگەن سۇراق قويادى. بۇعان ايەل: «مۇنىڭ ءبارى بوس تىرلىك بولار ەدى. بۇدان ەشقانداي پايدا بولماس ەدى» دەپ جاۋاپ بەردى.
ليندا مەيوتتىڭ ايتۋىنا قاراعاندا, زورلاۋ وقيعاسى 2007 جىلدىڭ كوكتەمىندە ونىڭ ەكىقابات بولىپ قالعانى انىقتالعانعا دەيىن جالعاسىپ كەلگەن. كەيىن دنك تەستى بوبەكتىڭ بيولوگيالىق اكەسى ءجاسوسپىرىم بالا ەكەنىن كورسەتىپ بەرگەن.
ايەل ءوزىن ايىپتاۋ وقيعاسىنىڭ 2009 جىلى اسىراندى بالانىڭ ۇيدەن اشەكەيلى زاتتاردى ۇرلاپ العانى بەلگىلى بولعاننان كەيىن باستالعانىن ايتادى. ول سونداي-اق بوزبالانىڭ سول كەزدەرى وزىمەن دوستاسىپ جۇرگەن قىزدىڭ ۇيىنە كەتكىسى كەلەتىنىن ايتىپ جۇرگەنىن دە مالىمدەدى. «مەن ونى ۇيىمە اكەلدىم. وعان ءوز سۇيىسپەنشىلىگىم مەن جاقسى تاربيە بەرگىم كەلدى. ساعان زالال كەلتىرگەنىمەن, ونى جاقسى كورگىڭ كەلەدى», دەپ جىلاعان ايەل كوزىنىڭ جاسىن ءسۇرتتى.
دەگەنمەن, وكرۋگ پروكۋرورىنىڭ كومەكشىسى چەريل ريددل ايىپتالۋشى ليندا مەيوتتىڭ زورلاۋ دەرەگى بويىنشا ءبىرىنشى رەت پوليتسياعا بەرگەن تۇسىنىكتەمەسى مەن سوتتىڭ الدىندا ايتىپ وتىرعان مىنا سوزدەرىنىڭ ءبىر-بىرىمەن قابىسپايتىنىنا نازار اۋداردى.
نورتبريدجدە تۇراتىن ليندا مەن دجوزەف قازىر وزدەرىنە تاعىلىپ وتىرعان ايىپتاۋلاردىڭ ءبارىن جوققا شىعارۋعا ۇمتىلىپ جاتىر. مۇنىڭ الدىندا دجوزەف مەيوتت ءوزىنىڭ 17 جاسار قازاقستاندىق قىزعا زورلىق جاساعانىن مويىنداماي وتىر. ال ونىڭ وكىل قىزى وگەي اكەسىنىڭ ءوزىن قاسىنا الىپ جاتۋدى مۇنىڭ 8 جاسىندا باستاعانىن ايتقان. سول كەزدە اتا-انالار ءبۇلدىرشىن قىز جالعىز جاتۋدان قورقادى دەگەن سىلتاۋمەن سولاي ەتكەن كورىنەدى.
وسى وقيعاعا بايلانىستى ەرلى-زايىپتىلار 2009 جىلى ءبىرىنشى رەت تۇتقىنعا الىنعان ەكەن. بىراق سوت 2010 جىلى ولاردى جازىقسىز دەپ تاۋىپ, ق ۇلىپ استىنان بوساتىپ جىبەرىپتى. ارادا ءۇش جىل وتكەننەن كەيىن سوت سول ىسكە قايتىپ ورالىپ وتىر.
مۇرات ايتقوجا.
