رەداكتسياعا جامبىل وبلىسىنىڭ قاراتاۋ قالاسىندا تۇراتىن جۋرناليست قارجاۋباي بازاردان حات كەلدى. وندا اۆتور ءوزىنىڭ 2 جىلدان بەرى جۇمىسسىز جۇرگەنىن ايتىپ شاعىنادى. ءبىز بۇگىن سايت اياسىندا سول حاتقا ورىن بەرۋدى ءجون كورىپ وتىرمىز. شاعىمداعى كەيبىر گرامماتيكالىق جانە ستيليستيكالىق قاتەلەردى تۇزەتكەنىمىز بولماسا, ونىڭ مازمۇنىنا تيىسكەن جوقپىز.
ەندى وبلىستاعى ءتيىستى قۇزىرلى ورىندار حاتتا باياندالعان جايلاردىڭ اق-قاراسىن انىقتاپ, وزدەرىنىڭ ءتيىستى باعالارىن بەرەر دەگەن ۇمىتتەمىز.
مەن 1984 جىلدان قاراتاۋ قالاسىندا تۇرامىن. كەن بايىتۋ فابريكاسىنىڭ شاحتاسىندا ەڭبەك ەتە ءجۇرىپ, قازمۋ-دىڭ جۋرناليستيكا فاكۋلتەتىنە سىرتتاي ءتۇسىپ, ونى 1997 جىلى ءبىتىردىم. 2000 جىلعى 6 ناۋرىزدان تالاس اۋداندىق «تالاس تىنىسى» گازەتىندە ءتىلشى, ءبولىم مەڭگەرۋشىسى بولىپ ەڭبەك ەتىپ كەلدىم. 2011 جىلدىڭ 13 شىلدەسىنەن بەرى جۇمىسسىزبىن. 2011 جىلعى 12 شىلدە كۇنى رەداكتسيادا جۇمىس اياعىندا توبەلەس بولىپ, گازەت رەداكتورىنىڭ ورىنباسارى ەكەۋى ماعان جابىلعان.
ەرتەڭىنە اۋدان اكىمىنىڭ ورىنباسارى مۇرات تۇرىسبەكوۆتىڭ الدىنا بارعانىمىزدا, ول «ەكەۋىڭىز دە جۇمىستان شىعاسىزدار» دەدى. سوندا دۇيسەن: «قارجاۋ ءوز ەركىمەن ارىز جازىپ, 1,5 اي دەمالسىن, سوسىن قايتا الامىن» دەدى. 1,5 ايدان كەيىن كەلسەم, المايمىن دەپ وتىر. سوسىن مەن اۋدان اكىمى ايتقازى قارابالاەۆقا ارىز جازدىم. ال ايتقازى مىرزادا ءۇن جوق. وسى ارالىقتا اۋداندىق قارجى پوليتسياسىنا, اۋداندىق پروكۋراتۋرا, اۋداندىق سوتقا دەيىن جۇمىسىما كىرگىزۋ جونىندە ارىزداندىم. بارىنەن دە «بۇل ءىستى ءبىز شەشە المايمىز» دەگەن حات كەلدى. ءبىر كۇنى وسىنى ايتىپ حات جازىپ, اكىمگە جىبەردىم. ال اكىمنىڭ ىشكى ساياسات ءبولىمى مەنى شاقىرىپتى. «نە تالاپ ەتەسىز؟» دەدى اعاي. مەن. «وسى ۋاقىتقا دەيىنگى ايلىعىمدى جانە اكىم ءوز اتىنان ات-شاپان ايىبىن تولەسىن» دەدىم. سول كۇنى كەشكە كولىك قاعىپ, اياعىم سىندى.
2009 جىلى گازەت رەداكتورى ورىنباسارى ساۋلەنباي اپسادىقتان سول كەزدەگى اكىم وڭلاسىن جيەنقۇلوۆقا ارىز تۇسكەن. سوندا اكىم ارداگەر قاريالاردى سالىپ جاتىپ, ارىزىن الدىرعان. سوسىن ونى اۋداندىق مادەنيەت جانە تىلدەردى دامىتۋ ءبولىمى باستىعى ەتىپ كوتەرىپ جىبەردى. سول كەزدە ول ۇيىندە وتىرعان ايەلىن رەداكتسياعا ەدەن جۋشى ەتىپ كىرگىزدى. ول ورىندا بۇرىن التى بالاسى بار, سول كەزدە كۇيەۋى جۇمىس ىستەمەيتىن كۇلپاش دەگەن كەلىنشەك ىستەگەن, ونى جۇمىستان شىعاردى.
وسى ارالىقتا مەن اۋدانعا كەلگەن پارلامەنت ءماجىلىسىنىڭ دەپۋتاتتارى ب.ەرتاەۆ پەن ق.جاباعيەۆقا دا ايتتىم, وبلىستىق تارتىپتىك كەڭەستىڭ ءا.ساتىبالدينگە دە ايتتىم. ول كىسى تەز ورنىنا الىڭدار دەپ تاپسىرىپ كەتتى. ەرتەسىنە اكىم اپپاراتى جەتەكشىسىنە بارسام, ب.باداەۆ: «اكىم سەنى ماعان كىرگىزبەي-اق, مادەنيەت بولىمىنەن جۇمىس تاۋىپ بەرۋدى تاپسىردى» دەدى. مادەنيەت ءبولىمىنىڭ باستىعى عاني دەگەن ىنىمە بارسام: «اعاي, ءبىر اي كۇتە تۇرىڭىز, دەمالىستاعىلار كەلسىن» دەدى. ايتقان ۋاقىتىندا كەلسەم: «اعاي, ءسىزدى بۇكىل وبلىس تانيدى ەكەن, مىقتى جۋرناليست, بايقا, باسىڭ بالەگە قالماسىن دەيدى, ەندى اكىمنىڭ الدىنان ءبىر ءوتىڭىزشى» دەدى.
سودان بەرى مەن ءالى اكىمدى ۇستاي الماي ءجۇرمىن...
قارجاۋباي بازار,
جۋرناليست.
قاراتاۋ قالاسى,
جامبىل وبلىسى.
