قىزىلوردا قالاسىندا ءبىر كولىك ءتۇننىڭ جارىسىندا كوشە بويىنداعى ۇيگە سوعىپ, وسى ماڭداعى 25 جەكە تۇرعىن ءۇيدى گازسىز قالدىردى. بۇل تۋرالى وبلىستىق توتەنشە جاعدايلار دەپارتامەنتى ءباسپاسوز قىزمەتىنىڭ باس مامانى ايگۇل نۇرمانوۆا حابارلادى.
وقيعا بۇگىن تۇندە 02 ساعات 20 مينۋت شاماسىندا بايتۇرسىنوۆ كوشەسىنىڭ №124 ءۇيى جانىندا بولعان. الەكەدەي جالانىپ, قۇيىنداي قۇيعىتىپ كەلە جاتقان كولىك ءاپ-ساتتە شىر كوبەلەك اينالدى دا, قارسى بەتتەگى ۇيگە بارىپ سوقتى. ماماندار تاراپىنان بۇل تەحنوگەندىك اپات تىرشىلىكتى قامتاماسىز ەتۋدىڭ كوممۋنالدىق جۇيەلەرىندەگى اۆاريا رەتىندە باعالاندى. سەبەبى...
«بايتۇرسىنوۆ كوشەسى №124 ءۇي جانىندا BMV-520 م/ب N 864 TN اۆتوكولىگى اۋدارىلۋ سالدارىنان بايتۇرسىنوۆ كوشەسىنىڭ بويىنداعى گاز تۇرباسى زاقىمدالعان. وسىنىڭ سالدارىنان 25 جەكە تۇرعىن ۇيلەر ۋاقىتشا گازسىز قالدى. وقيعا ورنىندا «قازترانسگاز ايماق» كپف اق قىزمەتكەرلەرى قايتا قالپىنا كەلتىرۋ جۇمىستارىن جۇرگىزۋدە», - دەلىنگەن حابارلامادا.
ال ءتۇننىڭ جارىمىندا جۇرتتى دۇرلىكتىرىپ جۇرگەن «شاپقىنشى» 1993 جىلى تۋعان ە. جاحانشا دەگەن جاس جىگىت بولىپ شىقتى.
سۇلتان بوزايعىر.
