ونىڭ ايتۋىنشا, تيەلگەن جۇكتىڭ ۇشتەن ءبىر بولىگى, ياعني 82,5 ملن تونناسى ەكسپورتقا جونەلتىلدى. كومپانيانىڭ نەگىزگى قىزمەتىنەن تۇسكەن تابىس كولەمى 930 ملرد تەڭگەدەن اسىپ, الدىڭعى جىلمەن سالىستىرعاندا 8 پايىزعا جوعارىلاپتى.
– بىلتىر تاريفتىك جۇك اينالىمى 1,8%-عا ۇلعايدى. ەل تۇرعىندارى ءۇشىن جانە كوممۋنالدىق-تۇرمىستىق كاسىپورىندارعا كومىر مەن استىق سياقتى الەۋمەتتىك-ماڭىزدى جۇكتەردى تاسىمالداۋدى دا جىلداعىداي جوسپارعا ساي ورىندادىق. تاسىمالداۋشى مەن قازاقستاندىق ۆاگون يەلەرىنىڭ, اتاپ ايتقاندا «قازتەمىرترانس» اق جانە «استىقترانس» اق-مەن ۇيلەسىمدى جۇمىستىڭ ناتيجەسىندە كومىر تۇتىنۋشىلاردىڭ, سونىمەن قاتار كومىر رازرەزدەرىنىڭ تاراپىنان ەشقانداي ەسكەرتۋ بولعان جوق. استىق تاسىمالىنا قاتىستى وتىنىشتەر 100%-عا ورىندالدى, – دەدى ق.ساۋىرباەۆ.
ءباسپاسوز ءماسليحاتىندا ايتىلعانداي, بىلتىر اتىراۋ وبلىسىنىڭ قاراباتان ستانساسىنان بالتىق تەڭىزى پورتتارىنداعى لۋجسكايا ستانساسىنا كۇكىرت ەكسپورتتاۋ جولعا قويىلدى. قاراعاندى وبلىسىندا وندىرىلگەن كومىر شۇباركول رازەزىنەن قارا تەڭىز پورتتارىنا قايتا باعىتتالدى.
كومپانيا باسشىسى تاسىمالداۋ جۇمىستارىنىڭ بارىنشا اشىق بولۋى ءۇشىن, سونىمەن قاتار كليەنتتەرگە نەعۇرلىم ىڭعايلى جاعداي تۋعىزۋ ءۇشىن ءتيىستى قۇجاتتاردى قاعازسىز تەحنولوگيامەن رەسىمدەۋ جوباسى ەنگىزىلىپ جاتقانىنا توقتالدى. بۇل تۋرالى ق.ساۋىرباەۆ:
– ەلىمىز اۋماعىندا تاسىمال قۇجاتتارىن قاعازسىز تەحنولوگيا بويىنشا رەسىمدەۋ 94 %-دى قۇرايدى. 10 مىڭنان استام كەلىسىمشارت وسىلاي رەسىمدەلدى. قازاقستان مەن رەسەي اراسىندا ەكسپورتتىق قاتىناستا قاعازسىز تەحنولوگيا بويىنشا 6 مىڭنان استام تاسىمال قۇجاتىن وسىلاي رەسىمدەدىك. سونداي-اق قىتاي, ازەربايجان, قىرعىز تەمىرجول اكىمشىلىكتەرىمەن ەلەكتروندى مالىمەتتەر الماسۋ تۋرالى كەلىسىمگە قول قويىلدى. ەكسپورتتىق-يمپورتتىق قاتىناستا قاعازسىز تەحنولوگيا ينتەگراتسياسىن ودان ءارى جالعاستىرامىز, – دەدى.
بريفينگ بارىسىندا كومپانيانىڭ بيىلعى باسىم مىندەتتەرى تۋرالى ايتىلدى. اتاپ ايتقاندا, قىتايعا تەمىر رۋداسىن, استىق پەن بۇرشاق داقىلدارىن تاسىمالداۋ قارقىنىن, ورتالىق ازيا ەلدەرىنە, سونىڭ ىشىندە وزبەكستانعا قۇرىلىس زاتتارىن, تسەمەنت ەكسپورتتاۋ كولەمىن ارتتىرۋ جوسپارلانعان. وزبەكستان, سونداي-اق قىتاي ارقىلى وڭتۇستىك-شىعىس ازياعا كومىر تاسىمالداۋ كولەمى ارتۋى ءتيىس. كومپانيا ءترانزيتتىڭ ءوسىمى ەسەبىنەن تيەۋ كولەمىن جىل سوڭىنا دەيىن 2,5 %-عا ارتتىرۋدى كوزدەپ وتىر.
