ەلەكتروندى تسيفرلى قولتاڭبا – ازاماتتارعا egov.kz, elicense.kz, enis.kz, salyk.kz سياقتى ەلەكتروندى ۇكىمەت پورتالدارىن پايدالانۋعا مۇمكىندىك بەرەتىن ەلەكتروندى كىلت. جەكە نەمەسە زاڭدى تۇلعالاردىڭ بارلىق دەربەس مالىمەتتەرىنە جول اشاتىن تسيفرلى قولتاڭبانى پايدالانۋدىڭ جانە ساقتاۋدىڭ ءوز ەرەكشەلىكتەرى بار.
ەتسق-عا تاپسىرىستى pki.gov.kz سايتىنان بەرىپ, حقو-عا تەك تۇلعانى كۋالاندىرۋ ءۇشىن بارۋعا بولادى. الايدا, كوپشىلىك ەلەكتروندى كىلتتى حالىققا قىزمەت كورسەتۋ ورتالىعىنان الۋدى ءجون كورەدى. بىلتىر قازاقستاندىقتار 7,8 ملن ەلەكتروندى كىلت راسىمدەگەن, بۇل 2018 جىلمەن سالىستىرعاندا 1,7 ملن-عا كوپ كورسەتكىش. الايدا, بۇل, كوپ جاعدايدا, ءبىر ادامنىڭ ەتسق-عا تاپسىرىستى ءبىر-اق رەت بەرگەنىن بىلدىرمەيدى. «ازاماتتار قۇجاتقا ەلەكتروندى تاپسىرىس بەرەتىن كەزدە نەمەسە دەكلاراتسيا تاپسىرعان ساتتە عانا ەتسق-نى پايدالانىپ, كەيىن ونى قايدا ساقتاعانىن ۇمىتىپ, قۇپياسوزىن ەستەن شىعارىپ جاتادى. ءسويتىپ ەتسق كىلتكە قايتا تاپسىرىس بەرەدى. دەربەس دەرەكتەر بازاسىن قولجەتىمدى ەتەتىن كىلتتى قۇندى دۇنيەدەي ساقتاپ, مۇقيات بولۋ كەرەك. ءبىز ەشقاشان بانك كارتاسىنىڭ پين-كودىن ۇمىتپايمىز, ال ەتسق-نىڭ قۇپياسوزىن ەستە ساقتاپ جاتتامايمىز. ەتسق-نى پايدالانۋ مادەنيەتى ەڭ الدىمەن ازاماتتاردىڭ ءوزى ءۇشىن قاجەت», دەيدى مەملەكەتتىك كورپوراتسيا ءتورايىمى.
كوپ جاعدايدا, ەتسق راسىمدەگەن ساتتە, حقو ماماندارى بىردەي قۇپياسوز بەكىتىپ بەرەدى, الايدا قولدانۋشى ونى جەكە كابينەتىندە كەيىن وزدىگىنەن جاڭارتا الادى. بۇگىندە جەكە كۋالىك چيپىنا جازىلاتىن ەتسق 3 جىلعا جارامدى, ونى پايدالانۋ ءۇشىن ارنايى كارتريدەر قاجەت. فلەش-كارتاعا جازىلىپ بەرىلەتىن كىلتتىڭ جارامدىلىق مەرزىمى – 1 جىل. تسيفرلى قولتاڭبانىڭ ۋاقىتى وتپەي تۇرىپ, ونى ونلاين تۇردە pki.gov.kz سايتى ارقىلى جاڭارتۋعا بولادى. مەرزىمنىڭ اياقتالاتىنى تۋرالى سمس-ەسكەرتپەنى الۋ ءۇشىن جەكە كابينەتتە ۇيالى تەلەفون ءنومىرى بايلانىستىرىلۋى ءتيىس. «تەلەفون ءنومىرى مەن ەتسق-نى سايكەستەندىرگەن ازاماتتارعا ەلەكتروندى تۇردە الىنعان قىزمەتتەر بويىنشا حابارلامالار كەلىپ تۇرادى. بۇل سمس-تەر بوگدە قىزمەتتەردىڭ الىنباۋىن باقىلاپ وتىرۋعا دا مۇمكىندىك بەرەدى», دەيدى ءا.بالتاشەۆا.
قازاقستاندىقتار ءوز اتىندا قانشا ەلەكتروندى كىلتتىڭ بارىن egov mobile قوسىمشاسىنان كورىپ, كەرەك جاعدايدا سول جەردەن ونى قايتارا شىعارۋعا تاپسىرىس بەرە الادى.
