كەندى التايدا سوڭعى ءۇش-ءتورت جىلدا جيىرماعا تارتا جاڭا مەكتەپ سالىنىپ, پايدالانۋعا بەرىلدى. سونىڭ ءبىرى – كوكپەكتى اۋدانىنداعى كوكجوتا ورتا مەكتەبى. اشىلعانىنا جارتى عاسىردان اسقان ءبىلىم ورداسىنان تۇلەپ ۇشقان شاكىرتتەر وزدەرىن قاناتتاندىرعان التىن ۇياسىن ۇمىتقان ەمەس, قايىرىمدىلىق جاساپ تۇرادى.
كەندى التايدا سوڭعى ءۇش-ءتورت جىلدا جيىرماعا تارتا جاڭا مەكتەپ سالىنىپ, پايدالانۋعا بەرىلدى. سونىڭ ءبىرى – كوكپەكتى اۋدانىنداعى كوكجوتا ورتا مەكتەبى. اشىلعانىنا جارتى عاسىردان اسقان ءبىلىم ورداسىنان تۇلەپ ۇشقان شاكىرتتەر وزدەرىن قاناتتاندىرعان التىن ۇياسىن ۇمىتقان ەمەس, قايىرىمدىلىق جاساپ تۇرادى.
جاقىندا كوكجوتا ورتا مەكتەبىندە ەل ەسىندە قالاتىنداي ەلەۋلى وقيعا بولدى. الماتىداعى قازاق اگرارلىق مەملەكەتتىك ۋنيۆەرسيتەتىنىڭ كافەدرا مەڭگەرۋشىسى, مال دارىلەرىن شىعاراتىن «انتيگەن» عىلىمي-وندىرىستىك كاسىپورنىنىڭ پرەزيدەنتى, ۆەتەريناريا عىلىمدارىنىڭ دوكتورى, پروفەسسور نۇرلان احمەتسادىقوۆ قانات قاققان ءبىلىم ورداسىنا كەلىپ, شاكىرتتەرمەن كەزدەسىپ, وسى مەكتەپتە 40 جىل ۇستاز, ديرەكتور قىزمەتىن ءمىنسىز اتقارعان, جەرلەستەرىنىڭ قۇرمەتىنە بولەنگەن نۇروللا احمەتسادىقوۆ اتىنداعى سىنىپقا, مەكتەپكە وقۋ قۇرالدارىن, بىرنەشە كومپيۋتەر, جيھاز, تەلەديدار, دايىندىق سىنىبىنا ارنالعان قۇرال-جابدىقتار, 1-4 سىنىپ وقۋشىلارىنا ەلەكتروندى وقۋلىقتاردى سىيعا تارتتى.
بۇدان بەس جىل بۇرىن اتاۋلى سىنىپ اشىلعاندا دا پروفەسسور نۇرلان احمەتسادىقوۆ زايىبى مايامەن بىرگە كەلىپ, «تۋعان جەرگە – تاعزىم!» اكتسياسىنا ءۇن قوسىپ, ەكى ميلليون تەڭگەنىڭ قۇرال-جابدىقتارىن سىيعا تارتقان بولاتىن.
مەكتەپ ۇستازدارىمەن وتكەن كەزدەسۋدە «انتيگەن» عىلىمي-وندىرىستىك كاسىپورنىنىڭ باسشىسى ءوزى باسقاراتىن ۇجىمنىڭ مالعا قاجەت ءدارى-دارمەك شىعاراتىنىن, دامىعان ەلدەرمەن قارىم-قاتىناستا ەكەنىن, قازىرگى تاڭدا شىعارماشىلىق ىزدەنىستە بولعاندا عانا كۇن تالابىنا ساي ءدارى شىعارۋعا مۇمكىندىك تۋاتىنى جايلى ايتىپ بەردى. كەزدەسۋدە پروفەسسور وسى اۋىلدىڭ تۋماسى, جىر جازۋعا تالپىنىپ جۇرگەن بالانى ءوز قارجىسىنا وقىتاتىنىن ايتىپ جەرلەستەرىن قۋانتىپ تاستادى.
مەكتەپ ديرەكتورى گۇلجانات كونگۋلوۆا پروفەسسور جەرلەسىنە ۇستازدار مەن شاكىرتتەر اتىنان العىسىن ءبىلدىردى. ءشاكىرتتەر ءان مەن كۇيدەن شاشۋ شاشتى. كوكجوتا اۋىلىنداعى جاڭا مەكتەپتەگى قۋانىش اۋىل ادامدارىن ءبىر سەرپىلتىپ تاستادى.
وڭداسىن ەلۋباي,
«ەگەمەن قازاقستان».
شىعىس قازاقستان وبلىسى,
كوكپەكتى اۋدانى.
