تاياۋدا قىتايدا وتكەن «داۋىس» اتتى ءان بايقاۋىنىڭ ىرىكتەۋ تۋرىندا ۇرىمجىدەن كەلگەن تاسقىن اتتى 34 جاستاعى جىگىت داۋسىنىڭ تەرەڭدىگىمەن, ءانىنىڭ اسەرلىلىگىمەن قازىلار القاسىن تۇگەل تاڭعالدىرىپ, ولاردىڭ كوزدەرىنە جاس الدىردى.
تاياۋدا قىتايدا وتكەن «داۋىس» اتتى ءان بايقاۋىنىڭ ىرىكتەۋ تۋرىندا ۇرىمجىدەن كەلگەن تاسقىن اتتى 34 جاستاعى جىگىت داۋسىنىڭ تەرەڭدىگىمەن, ءانىنىڭ اسەرلىلىگىمەن قازىلار القاسىن تۇگەل تاڭعالدىرىپ, ولاردىڭ كوزدەرىنە جاس الدىردى.
ءانشى جىگىت بۇل كەشتە ماريام جاگورقىزىنىڭ «دۋدار-اي» ءانىن ورىنداپتى. كەيىن ءمالىم بولعانىنداي, ول الدىمەن ءاندى قىتاي تىلىندە شىرقاعان. بىراق ونىسى جۇرتتىڭ ءجۇرەگىن ونشالىقتى تەبىرەنتە الماعان. كەلەسى جولى ءاننىڭ ءتول نۇسقاداعى ۆاريانتىن ورىنداعانىندا قازىلار قاۋىمىنىڭ كوڭىلدەرى بوساپ, كوزدەرىنە يە بولا الماپتى.
مىنە, ءاننىڭ قۇدىرەتى دەگەن وسى! قىتايلار ونىڭ قازاق تىلىندەگى ماتىنىنە ءتۇسىنبەسە دە, وسىلاي ەتكەن. ولار العاشىندا ءاندى دۇرىس باعالاي الماعاندارىنا وكىنىش ءبىلدىرىپتى. جەرگىلىكتى اقپارات قۇرالدارىنىڭ مالىمدەۋىنشە, ۇلتى قازاق تاسقىن وتباسىمەن بىرگە ۇرىمجىدە تۇرادى ەكەن. ەجەلگى شىعىس تۇركىستان جەرىندەگى باس قالاداعى مەكتەپتەردىڭ بىرىندە مۇعالىم بولىپ قىزمەت اتقاراتىن ول ءاننەن ساباق بەرەدى. ايتۋلى جارىستا مارەنىڭ سوڭىنا دەيىن تالماي شابا الماسا دا, تاسقىن وسى ءبىر عانا انىمەن-اق تالاي جۇرتتىڭ كوكەيىندە قالىپ قويدى.
اتالمىش ءان مەن ورىنداۋشىنىڭ اتاق-داڭقى قازىردىڭ وزىندە شارىقتاپ, كۇللى الەمگە كەڭىنەن تاراپ جاتىر. بۇقارالىق اقپارات قۇرالدارىنىڭ جازۋىنشا, قىتاي سايتتارىنان ورىن العان تاسقىننىڭ «دۋدار-اي» ءانىنىڭ كليپىن قازىرگە دەيىن 2,5 ميلليوننان استام ادام تاماشالاپ ۇلگەرىپتى. ۇرىمجىدەن ۇشقان ۇزدىك ءاننىڭ اۋەنى شىنىندا دا تىڭداعان جاندى تاڭ-تاماشا قالدىرادى.
مۇرات ايتقوجا.
P.S. بۇل ءاننىڭ كليپىن ءبىزدىڭ رەداكتسيا سايتىنان («قىتايدى تاڭعالدىرعان قازاق جىگىتى») دا كورۋگە بولادى.
