جانە ولاردىڭ جاقىندارىنىڭ شۆەيتساريا بانكتەرىندەگى ەسەپشوتتارىنا تىيىم سالىندى
جانە ولاردىڭ جاقىندارىنىڭ شۆەيتساريا بانكتەرىندەگى ەسەپشوتتارىنا تىيىم سالىندى
ادەتتە ايران ىشكەندەردىڭ قۇتىلىپ, شەلەك جالاعانداردىڭ تۇتىلىپ قالۋلارى ءجيى كەزدەسۋشى ەدى. بۇل جولى ايران ىشكەندەردىڭ وزدەرىنە الباستى باسقانداي كۇن تۋدى. سەبەبى, مىنا جاعدايدا «شەلەك جالاعاندار» مۇلدە جوق ەدى. قولىنا ايراننىڭ شەلەگىن ۇستاۋشىلاردىڭ اشكوز, ساراڭ, جەمقور بولعاندارى سونداي, جانىندا جۇرگەندەر ءۇشىن جۇعىن دا قالدىرا قويماپتى.
كەشە ەلىمىزدىڭ بايلىعىن ۇپتەپ كەتكەن اتىشۋلى الاياقتار بەرگەي رىسقاليەۆ پەن ۆيكتور حراپۋنوۆتىڭ جانە ولاردىڭ جاقىن-جۋىقتارىنىڭ شۆەيتساريا بانكتەرىندەگى ەسەپشوتتارىنا تىيىم سالىندى. بۇل تۋرالى ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىنىڭ ءباسپاسوز قىزمەتى حابارلادى.
قارجى پوليتسياسىنان حابارلانعانداي, قازىرگى تاڭدا اگەنتتىك قازاقستاندا قىلمىستىق جولمەن الىنىپ, شەتەلگە اسىرىلعان كۇماندى اكتيۆتەردى انىقتاۋ مەن ولاردى ەلگە كەرى قايتارىپ الۋ جولىندا بەلسەندى جۇمىستار جۇرگىزىپ جاتىر. وسىنىڭ ىڭعايىندا, ماسەلەن, حراپۋنوۆتاردىڭ ۇيىمداسقان قىلمىستىق توبىنا قاتىستى قىلمىستىق ءىستى تەرگەۋ بارىسىندا قارجى پوليتسياسى اگەنتتىگى شۆەيتساريا كونفەدەراتسياسىنىڭ قۇزىرەتتى ورگاندارىنا قىلمىستىق ءىس بويىنشا قۇقىقتىق كومەك كورسەتۋ تۋرالى حالىقارالىق تاپسىرما جىبەرگەن. قۇقىقتىق كومەك كورسەتۋ تۋرالى تاپسىرمادا كورسەتىلگەن قۇجاتتار مەن دايەكتەردى شۆەيتساريانىڭ ۋاكىلەتتى ورگاندارى سارالاپ شىعىپ, ناتيجەسىندە حراپۋنوۆتارعا قاتىستى شۆەيتساريا كونفەدەراتسياسىنىڭ اۋماعىندا قىلمىستىق جولمەن تابىلعان كاپيتالدى زاڭداستىرۋ فاكتىسى بويىنشا قىلمىستىق قۋدالاۋ باستالدى.
مۇنىڭ اقىرى شۆەيتساريا قۇزىرەتتى ورگاندارىنىڭ حراپۋنوۆتار وتباسىنىڭ اكتيۆتەرىنە ولاردىڭ زاڭدىلىعىن انىقتاعانعا دەيىن تىيىم سالۋىنا اپارىپ جەتكىزدى. تانىسۋ جانە قىلمىستىق ءىس فيگۋرانتتارىنىڭ ءىس-ارەكەتىنە قۇقىقتىق باعا بەرۋ ءۇشىن بانكىلىك, قارجىلىق جانە وزگە دە قۇجاتتارى الىندى.
تاپ وسىنداي ارەكەتتەردى شۆەيتساريا كونفەدەراتسياسىنىڭ فەدەرالدىق پروكۋراتۋراسى رىسقاليەۆتەرگە قاتىستى دا باستاپ كەتتى. وسىنىڭ نەگىزىندە ءبۇگىندە ولاردىڭ قىلمىستىق جولمەن الىنعان اقشالاي قاراجاتتارىن زاڭداستىرۋ فاكتىسى بويىنشا قىلمىستىق تەرگەۋ جۇرگىزىلۋدە. تەرگەۋ اياسىندا رىسقاليەۆتەر مەن ولاردىڭ جاقىن تۋىستارىنا تيەسىلى شۆەيتساريا بانكىلەرىندە جالپى سوماسى 100 ملن. ەۋرودان اساتىن ايتارلىقتاي اقشالاي قاراجات سالىنعان 3 بانكىلىك ەسەپشوت انىقتالدى. فەدەرالدىق پروكۋراتۋرا اتالعان شوتتارعا تىيىم سالدى.
قارجى پوليتسياسى اگەنتتىگى سوڭعى ساتتەردە سونداي-اق ءوز قىزمەتكەرلەرىنىڭ شۆەيتساريا كونفەدەراتسياسى اۋماعىندا تەرگەۋ امالدارىن جۇرگىزۋلەرىنە رۇقسات بەرۋدى وتىنەتىن حالىقارالىق تاپسىرمانى دا جولدادى.
قۇرىش نۇرىمبەت.
