مەملەكەتتىك تاپسىرىس بويىنشا مينيسترلىك ورىنداۋشىعا ءبىر ينتەرنەت-دۇكەن جانە iOS جانە Android وپەراتسيالىق جۇيەلەرىنە ارنالعان 2 قولدانبا جاساتپاقشى بولعان. كونكۋرس اشىق تۇردە جۇرگىزىلمەگەنى ءوز الدىنا, Asseco Central Europe كومپانياسىمەن 4 جىلعا جانە 15 ملن 870 مىڭ ەۋروعا كەلىسىم جاسالعان. مۇنداي شارىقتاعان باعاعا جاسالعان كەلىسىمشارت تۋرالى ەستىگەن ءبىر توپ پروگرامميست نارازىلىق ءبىلدىرىپ قانا قويماي, ءدال وسى سايتتى وزدەرى جاساۋعا كىرىسكەن.
جەرگىلىكتى Actum Digital كومپانياسىنىڭ باسشىسى توماش ۆوندراچەك مەملەكەتتىك ورگاننىڭ شەشىمىن ىسىراپشىلىق دەپ باعالاپ, چەح پروگرامميستەرىن بىرىگە وتىرىپ ءدال وسىنداي سايت جاساۋعا شاقىرعان. ناتيجەسىندە #Znamkamarada حاكاتونىنا ەلدىڭ 300 مامانى قاتىسامىز دەپ نيەت بىلدىرگەن. ونىڭ 60-ى 24 قاڭتار كۇنى جۇمىسقا كىرىسىپ, 26-سىندا مينيسترلىكتىڭ تالاپتارىنا ابدەن سايكەس كەلەتىن fairznamka.cz سايتىنىڭ پلاتفورماسىن قۇرىپ ۇلگەرگەن. حاكاتوننىڭ دۇرمەگى, ءتىپتى, ەل پرەمەر-ءمينيسترى اندرەي بابيشكە دە جەتىپ, ونىڭ ءوزى وسى شاراعا كەلىپ, «مىنانى ەستىگەن تالاي اتقامىنەردىڭ تاماعىنان اس وتپەي قالعان شىعار» دەپ ءسۇيسىنىپ, ماماندارعا قولداۋ كورسەتكەن.
27 قاڭتار كۇنى سايت تەستتىك رەجىمدە جۇمىسىن باستاپ, مەملەكەتتىك جۇيەگە قوسىلماسا دا, تاپسىرىستاعى بارلىق قىزمەتتەردى كورسەتە الاتىن شاما-شارقىن كورسەتكەن. العاشقى ءبىر تاۋلىكتە fairznamka.cz سايتىنا 175 مىڭ ادام كىرىپ, ونىڭ اقىلى قىزمەتتەرىن ساتىپ العان. تۇسكەن قارجىنى قايىرىمدىلىققا جۇمساۋ تۋرالى ايتىلدى.
ۇكىمەت العاشىندا سايت جاساعانداردىڭ قىزمەتىن تولەمەكشى بولعانمەن, ارتىنشا ونى سىيلىق رەتىندە قابىل الدى. ەل بيلىگى بۇل سايتتى ارى قاراي قولداپ, قىزمەت كورسەتۋ ءۇشىن اشىق كونكۋرس جاريالايتىندىقتارىن مالىمدەدى. توماش ۆوندراچەكتىڭ كومپانياسى بۇل كونكۋرسقا قاتىسپايمىز دەپ شەشتى. سايتتىڭ ارى قاراي جۇمىس ىستەۋىنە قاجەتتى قارجى الدىنداعى سومانىڭ تەك 25 پايىزىن عانا قۇرايتىن بولدى. ەندى ەل بيۋدجەتىنە قانشاما قارجى ۇنەمدەلگەنىن ەسەپتەي بەرىڭىز.
وسىلايشا, وزدەرىن پاتريوت سانايتىن قاراپايىم عانا ادامدار بيۋدجەت قارجىسىن ۇنەمدەپ قانا قويماي, كەرەمەت ۇلگى بولاتىن ءىس كورسەتتى. مەملەكەتتىك قىزمەتكەرلەر ءۇشىن دە بۇل ۇلكەن كەرەمەت سىلكىنىس بولدى. چەحيانىڭ كولىك ءمينيسترى ۆلاديمير كرەمليك ماسقارا بولىپ, جۇمىسىنان قۋىلدى.
