بۇل كەشەندە بىرنەشە مادەني نىساندار ورنالاسقان. اتالعان مادەني نىسانداردى ءتيىمدى پايدالانۋ بويىنشا جامبىل وبلىسىنىڭ اكىمى اسقار مىرزاحمەتوۆ جيىن وتكىزىپ, مۇندا دا بىرقاتار ماسەلەلەر تالقىلاندى. جيىندا اتالعان كەشەندەگى شەرحان مۇرتازا اتىنداعى «رۋحانيات جانە تاريحتانۋ» ورتالىعى, وبلىستىق تاريحي-ولكەتانۋ مۋزەيى, كوركەمسۋرەت گالەرەياسى, قولونەر شەبەرلەرىنىڭ ورتالىعى, كورمە پاۆيلوندارىنىڭ اعىمداعى جىلعى جوسپارلارى سارالانىپ, ولاردىڭ شتاتتىق كەستەلەرى قارالدى.
اسقار مىرزاحمەتوۆ ءوز سوزىندە جاڭادان بوي كوتەرگەن نىسانداردى بوس تۇرعىزباي, ولاردى ماقساتتى تۇردە دۇرىس پايدالانۋدىڭ ماڭىزدىلىعىنا توقتالدى. ول جەرلەردە وتەتىن شارالاردىڭ تاعىلىمدىق مانىنە اسا ءمان بەرۋدى, ناۋقاندىق ەمەس كۇندەلىكتى جۇمىستاردى جۇرگىزىپ وتىرۋ كەرەكتىگىن باسا ايتتى. ماسەلەن, «رۋحانيات جانە تاريحتانۋ» ورتالىعىندا رۋحاني قۇندىلىقتاردى جيناقتاۋدى, جۇيەلەۋدى جانە زەرتتەۋدى, ونى ناسيحاتتاۋدى جۇيەلى جۇزەگە اسىرۋدى اتاپ ءوتتى. سونىمەن قاتار, اكىم كونە تارازدىڭ تاريحىن زەردەلەۋ جۇمىستارىن جۇيەلەي تۇسۋگە بارىنشا كوڭىل ءبولىپ, ءوڭىردىڭ تەرەڭدە جاتقان قۇندىلىقتارىن ارشىپ الۋعا تۇپكىلىكتى بەت بۇرۋ كەرەكتىگىن ايتتى. بۇل ورايدا م.ح.دۋلاتي اتىنداعى تاراز مەملەكەتتىك ۋنيۆەرسيتەتىنەن «ارحەولوگيا» فاكۋلتەتىن اشۋ جوسپارلانىپ وتىرعاندىعىن جەتكىزدى.
تاراز قالاسىنداعى جاڭا سالىنعان مادەني نىسانداردى دۇرىس پايدالانۋ كەرەك. باسقوسۋ بارىسىندا تاريحي دەرەكقور بازاسىن قۇرۋ, ونى ۇنەمى تولىقتىرۋ جۇمىستارىن ۇيلەستىرۋ, ول بويىنشا اۋدانداردان ۇسىنىستار جيناقتاۋ جايى ءسوز بولدى. ايتا كەتەيىك, اتالعان مۋزەي جاڭا نىساندا قايتا اشىلعاننان بەرى مۇندا 89 مىڭنان اسا ادام تاماشالاعان.
جيىندا ەلىمىزدە تەڭدەسى جوق كوركەمسۋرەت گالەرەياسىن بارىنشا ۇتىمدى ۇقساتۋ جايى دا جان-جاقتى قوزعالدى.
جامبىل وبلىسى
