Bloomberg كومپانياسىنىڭ رەسمي سايتىنىڭ مالىمدەۋىنە سۇيەنسەك, كورشى ەلدىڭ چجەنچجوۋ مەن شانحاي قالالارىندا شىعاتىن iPhone, iPad جانە Apple Watch برەندتەرى ءوز ۋاقىتىندا وندىرىلمەي قالۋى ابدەن مۇمكىن. بۇل قالالارداعى Foxconn مەن Pegatron كاسىپورىندارى اتىشۋلى ۋحان قالاسىنان نەبارى 500 شاقىرىم قاشىقتىقتا عانا ورنالاسقاندىقتان ولار كارانتينگە جابىلعان.
Apple كومپانياسىنىڭ ونىمدەرىن جاساۋمەن 10 مىڭنان اسا ادام اينالىسسا, ولاردى تاراتۋمەن ميلليونداعان حالىق جۇمىلدىرىلعان. قىتايدىڭ ءداستۇرلى ءوز جاڭا جىلىندا ۇلكەن قالالارداعى سىرتتان كەلىپ جۇمىس ىستەيتىن جۇمىسشى قاۋىم قىسقا مەرزىمدى دەمالىسقا ۇيلەرىنە كەتكەن بولاتىن. ەندى ولاردىڭ كەرى قايتىپ, جۇمىسقا كىرىسۋلەرىنە ۋاقىتشا تيىم سالىندى. بۇل شارالاردىڭ بارلىعى كوروناۆيرۋستىڭ تارالماۋى ءۇشىن جاسالىپ جاتقانى بەلگىلى. قىتاي حالىق رەسپۋبليكاسى دەنساۋلىق ساقتاۋ جونىندەگى مەملەكەتتىك كوميتەتتىڭ مالىمەتتەرى بويىنشا اتالعان ۆيرۋستى جۇقتىرعاندار سانى 5 مىڭنان اسقان.
مۇنداي شارالار جالعاسا بەرەتىن بولسا, وندا iPhone 9 (SE 2) سمارتفونىنىڭ بيىلعى جىلدىڭ اقپان ايىنا جوسپارلانعان جۇمىس كەستەسى بۇزىلىپ, ۋاقتىسىمەن شىقپاي قالۋ ىقتيمالدىلىعى ارتىپ تۇر. ەپيدەميا ءورشۋى شيكىزاتپەن قامتاماسىز ەتۋدەن دە قيىندىقتار تۋعىزايىن دەپ وتىر.
قالتاسى قالىڭ ەمەستەرگە ارنالعان بيۋدجەتتىك سەگمەنتتەگى iPhone 9 سمارتفونى شىقپاي قالعان جاعدايدا امەريكاندىق كومپانيا ءوزىنىڭ ءۇندىستان مەن باسقاداي دامۋشى ەلدەردەگى تۇتىنۋشىلارىنان ايىرىلايىن دەپ تۇر. Apple ءوز ونىمدەرىنىڭ قىتايداعى ساتىلىمى تومەندەپ كەتكەندىكتەن وسىنداي ارزانداۋ گادجەت جاساۋ ارقىلى پايداسىن ساقتاپ قالۋ ءۇشىن جانتالاسقان ەدى.
دەگەنمەن دە, قانداي اسپان اينالىپ, جەرگە تۇسەتىن جاعداي بولسا دا امەريكاندىق الىپ كومپانيا وزدەرىنىڭ جۇمىسىندا ەشقانداي اۋىتقۋشىلىق بولمايدى دەپ سەندىرىپ وتىر.
