شاراعا پارلامەنت ءماجىلىسىنىڭ دەپۋتاتتارى, مەملەكەت جانە قوعام قايراتكەرلەرى, تانزانيا, اقش, فرانتسيا, قىرعىزستان ەلدەرىنەن كەلگەن ەرىكتىلەر, وقۋ ورنىنىڭ وقىتۋشىلارى, ستۋدەنتتەر قاتىستى. ۇيىمداستىرۋشىلاردىڭ ايتۋىنشا, شارانىڭ نەگىزگى ماقساتى – مەملەكەت باسشىسىنىڭ يدەياسىن قولداۋ جانە ونى ناسيحاتتاۋ.
ۋنيۆەرسيتەت رەكتورى ە.سىدىقوۆ ءوز سوزىندە بيىلعى جىلدىڭ جاستار ءۇشىن ماڭىزدى ەكەنىن ايتىپ ءوتتى. «پرەزيدەنت قاسىم-جومارت توقاەۆتىڭ جارلىعىمەن 2020 جىل ۆولونتەر جىلى دەپ جاريالاندى. بۇل – جاستاردىڭ بيىك اسۋلاردى باعىندىراتىن جىلى, ارمان مەن سەنىم, ەڭبەك پەن جاۋاپكەرشىلىك جىلى! ۆولونتەر جىلى – جاستار جىلىنىڭ جالعاسى. بۇل – جاستار ءۇشىن ۇلكەن مۇمكىندىك. بيىل كوپتەگەن جوبا ىسكە اساتىن جەمىستى, تابىستى جىل بولادى دەپ سەنەمىز», دەدى ۆولونتەرلەردى قۇتتىقتاعان رەكتور.
ۋنيۆەرسيتەتتە ۆولونتەر جىلىنا وراي ENU Volunteers جوباسى قولعا الىنىپ وتىر. جوبا «جاقسى ءىس», «مادەني سۇحبات», «قايىرىمدى ورتا», ء«ورىستى ونەر», «تازا ەلوردا», «مەديا الاڭ» باعىتتارى بويىنشا جۇمىس ىستەيدى. ءار باعىتتىڭ ءوز ماقساتى, اۋديتورياسى, نەگىزگى يدەيانى جۇزەگە اسىرۋ ءۇشىن ارنايى شارالارى بار. ماسەلەن, «جاقسى ءىس» باعىتى بويىنشا ستۋدەنتتەردىڭ ءوز ەركىمەن قالالىق سەنبىلىكتەرگە شىعۋى, مەكتەپ وقۋشىلارىنا سەمينارلار مەن شەبەرلىك سىنىپتارىن وتكىزۋى قاراستىرىلعان. سونىمەن قاتار جالعىزىلىكتى قارتتاردىڭ ۇيىنە بارىپ ءۇي شارۋاسىنا كومەكتەسۋ, ەمحانالارعا الىپ بارۋ سياقتى اكتسيالار دا جوسپارلانعان.
جوبا اياسىندا قايىرىمدىلىق شارالارىمەن قاتار, قالا ومىرىنە ۇلەس قوسۋ دا جوسپارلانعان. ستۋدەنتتەر قوعامدىق ورىنداردا بۇزىلعان بەلگىلەردى, ەسكەرتكىشتەردى جاۋاپتىلارعا حابارلاپ, قاتە جازىلعان اتاۋلاردىڭ تۇزەتىلۋىن قاداعالايتىن بولادى.
ۋنيۆەرسيتەت جاستارى مادەني شارالاردى دا ەستەن شىعارماعان. جوبانىڭ «مادەني سۇحبات» باعىتى ارقىلى جاستاردىڭ قوعامداعى وزەكتى تاقىرىپتاردى ساحنالىق قويىلىمدارمەن جەتكىزۋىن كوزدەيدى. بۇل «شاڭىراق» ستۋدەنتتىك تەاترىنىڭ قۇزىرىندا.
سونىمەن بىرگە جيىندا اقپاراتتىق تەحنولوگيالار فاكۋلتەتىنىڭ ستۋدەنتى, ۆولونتەر نۇرسۇلتان ىسماعۇلوۆ, جاستار ورتالىعىنىڭ بەلسەندىسى التىناي راۋانقىزى, اقش-تان كەلگەن ەرىكتى دجەيكوب لەۆيتان ءسوز سويلەپ, ەرىكتىلىكتىڭ ماڭىزى تۋرالى ايتىپ, ءوز وقيعالارىمەن ءبولىستى. وسى ورايدا ن.ىسماعۇلوۆتىڭ بىلتىر ورتتەن ءۇش بالانى قۇتقارعانىن ەسكە سالا كەتكەن ءجون. بەيبىت كۇننىڭ باتىرى ءوزىن باتىر سانامايتىنىن, سول وقيعاعا تاپ بولعان كەز كەلگەن ازاماتتىڭ ءدال سولاي ىستەيتىنىن ايتتى.
ەۇۋ الەۋمەتتىك جانە ازاماتتىقتى دامىتۋ دەپارتامەنتىنىڭ ديرەكتورى ر.القوجا وقۋ ورنىندا ارنايى ەم الاتىن مۇمكىندىگى شەكتەۋلى, كومەككە مۇقتاج ءبىلىم الۋشىلاردىڭ بار ەكەنىن ايتتى. وسى ورايدا اقىلى ەم الاتىن ستۋدەنتتەرگە كومەكتەسۋ جوسپارلانعانىن جەتكىزدى. رۇستەم القوجانىڭ ايتۋىنشا, كومەككە مۇقتاج, قالالىق اكىمدىك پەن قازاقستان مۇسىلماندار ءدىني باسقارماسىنىڭ تىزىمىندە تۇرعان كوپ بالالى وتباسىلارعا دا ۋنيۆەرسيتەتتىڭ ۇجىمى قولداۋ كورسەتۋگە دايىن.
