جىلىنا 1 ملن توننا مۇناي وڭدەۋدى, سول ارقىلى 120 مىڭ توننا موديفيكاتسيالانعان بيتۋم مەن 400 مىڭ توننا قىشقىلدانعان بيتۋم, ياعني تۇتقىرلى مۇناي بيتۋمى مەن تۇرلەندىرىلگەن جول مۇناي بيتۋمى سىندى بيتۋمىنىڭ ەكى ءتۇرىن شىعاراتىن زاۋىت «قازمۇنايگاز» بەن «CITIC Kazakhstan» جشس-نىڭ بىرلەسكەن كاسىپورنى سانالادى.
قازىرگى تاڭدا سەرىكتەستىك ءونىم ءوندىرۋ قۋاتى مەن ءونىم ساپاسىن ارتتىرىپ, ىشكى نارىقتى قامتاماسىز ەتۋمەن بىرگە ءوز ونىمدەرىن شەتەلدەرگە ەكسپورتتاۋ مۇمكىندىگىنە قول جەتكىزدى.
جول بيتۋمىنىڭ العاشقى ەكسپورتى وزبەكستانعا 2017 جىلى 650 توننا كولەمىندە جونەلتىلگەن بولاتىن. وتكەن جىلدىڭ سوڭىندا كاسىپورىن ەكسپورت كولەمىن 10 مىڭ تونناعا جەتكىزدى. ەڭبەك ىرعاعىن قالىپتى جاعدايعا تۇسىرگەن زاۋىتتا ءونىمدى ەكسپورتقا شىعارۋ تۇراقتى نەگىزدە جۇرگىزىلۋدە. مامانداردىڭ ايتۋىنشا, بۇرىن زاۋىت قىس مەزگىلىندە جۇمىسىن توقتاتاتىن بولسا, قازىر ونىمگە دەگەن شەتەلدەگى جوعارى سۇرانىسقا بايلانىستى جىل بويىنا ۇزدىكسىز جۇمىس ىستەيدى. بۇل بيتۋمنىڭ جوعارى قوسىلعان قۇنىن ەسكەرگەندە, كاسىپورىن كىرىسىنە ەداۋىر ىقپال ەتەدى.
زاۋىت وتكەن جىلى ەكسپورت كولەمىن ۇلعايتىپ قانا قويماي, جالپى ەڭبەك ونىمدىلىگىن ارتتىردى. «CASPI BITUM» بك» جشس جول بيتۋمىن ءوندىرۋ كولەمىن جوسپارلانعان كورسەتكىشتەن 23%-عا ارتىق ورىنداپ, 369 073 تونناعا جەتكىزدى. 2018 جىلى زاۋىت 308 286 توننا وندىرگەن بولاتىن. اقتاۋ بيتۋم زاۋىتى تەحنيكالىق سيپاتتامالارى بويىنشا ساپاسى جوعارى جول بيتۋمىن شىعارۋ ءۇشىن ەڭ وڭتايلى شيكىزات بولىپ تابىلاتىن «قاراجانباس» كەن ورنىنىڭ مۇنايىن جىلىنا 1 ملن تونناعا دەيىن وڭدەي الادى. ال مۇنايدى وڭدەۋ كولەمى بىلتىر 885 969 تونناعا دەيىن جەتىپ, جوسپار 15%-عا ارتىعىمەن ورىندالدى. سونداي-اق اقتاۋ بيتۋم زاۋىتىنىڭ ءونىمىن ماڭعىستاۋ, الماتى جانە اقتوبە وبلىستارى پايدالانا باستادى.
زاۋىت جۇمىسىنىڭ ناتيجەسىندە جانە باسقا وتاندىق وندىرۋشىلەردىڭ ءونىمىن قوسا العاندا, بۇگىندە ەلدىڭ جول بيتۋمىنا دەگەن قاجەتتىلىگى تولىق قامتىلىپ وتىر. اقتاۋداعى زاۋىت جۇمىسى مەن ءونىمى اۆتوكولىك جولىن جاڭعىرتۋداعى ەلىمىز ءۇشىن دايىن ءارى ساپالى وتاندىق ءونىم رەتىندە ماڭىزدى.
ماڭعىستاۋ وبلىسى
