كەشەلى-بۇگىن الەۋمەتتىك جەلىنى دامير قۇدايبەرگەن ەسىمدى پوليتسيا قىزمەتكەرىنىڭ بەتىن مۇز باسقان فوتوسۋرەتى شارلاپ كەتتى. ارقانىڭ ات قۇلاعى كورىنبەيتىن الاپات بورانىندا جولدا قالعانداردىڭ اماندىعى ءۇشىن ايانباي قىزمەت ەتكەن «مۇز پوليتسەيگە» دەگەن ەلدىڭ پەيىلى ەرەكشە. داميرگە جۇرت ءدان ريزا بولىپ جاتىر.
كەشە كەزەكشىلىگىن تاپسىرىپ, ۇيىندە دەمالىپ جاتقان دامير قۇدايبەرگەنمەن از-كەم سۇحباتتاسۋدىڭ ءساتى تۇسكەن ەدى.
– دامير, ءسىزدىڭ بەتىڭىزدى مۇز باسقان فوتوسۋرەتىڭىز الەۋمەتتىك جەلى قولدانۋشىلار اراسىندا قىزۋ تالقىعا ءتۇسىپ جاتىر. بۇل سۋرەت قانداي جاعدايدا ءتۇسىرىلدى؟
– الدىڭعى كۇنى تاڭەرتەڭ قاتتى بوران سوققاندا ءبىز ارىپتەسىم, پوليتسيا لەيتەنانتى بولاتبەك نۇروللا ەكەۋمىز ارنايى تەحنيكا ارشىعان جولداعى جيىرما شاقتى كولىكتەن تۇراتىن كولوننانىڭ سوڭىنان ءجۇرىپ وتىردىق. تەمىرتاۋ مەن قاراعاندىنىڭ ورتا تۇسىنا كەلگەندە كولىكتەر ومبى قارعا كەپتەلىپ, جۇرە الماي قالدى. بوران بولسا كۇشەيىپ, قارعا ادىم جەردى كورۋ مۇڭعا اينالدى. قار, ءتىپتى, ماشينالاردىڭ ۇستىنەن ءجۇرىپ كەتتى.
جاعداي وسىنداي بولعان سوڭ ءبىز ادامداردى كولىكتەردەن شىعارا باستادىق. سول كەزدە كومەككە اعا لەيتەنانتتار دانيار كەنجەبەكوۆ, تايتولەۋ جانۇزاقوۆ جانە باتالون كومانديرىنىڭ ورىنباسارى پوليتسيا كاپيتانى بەكزات ساۋلەمباەۆ كەلىپ جەتتى. ءبىز 40 شاقتى ادامدى ارنايى تەحنيكالارعا جانە ءوزىمىزدىڭ قىزمەتتىك كولىكتەرىمىزگە وتىرعىزىپ, وبلىس ورتالىعىنا جەتكىزىپ سالدىق.
ال فوتونى ءبىز قۇتقارعان ادامداردىڭ ءبىرى تۇسىرسە كەرەك. ايتايىن دەگەنىم, كولىك يەلەرىنىڭ كوبىسىنىڭ بويىندا ۇرەي بولدى. ولارمەن جەكە-جەكە اڭگىمەلەسىپ, سابىرعا شاقىرىپ, تىنىشتاندىرۋعا تۋرا كەلدى.
– قازىرگى ۋاقىتتا دەنساۋلىعىڭىز قانداي جاعدايدا؟
– تاماعىما ازداپ سۋىق تيگەنى بولماسا, ءبارى ويداعىداي. مەنىڭ الەۋمەتتىك جەلىدە تاراپ كەتكەن فوتومدى كورىپ, تۋعان-تۋىستار جان-جاقتان حابارلاسىپ, الاڭداۋشىلىق ءبىلدىرىپ جاتىر. ءوزىم دە بۇل سۋرەتتى ۇيگە كەلگەندە ءبىر-اق كوردىم.
جالپى, مۇندا تۇرعان تۇك تە جوق دەپ ويلايمىن. سول جەردە مەنىمەن بىرگە بولعان ارىپتەستەرىم دە قيىن جاعدايعا تاپ بولعان ازاماتتارعا جان اياماي كومەك كورسەتتى. ادامدارعا قول ۇشىن بەرۋ – ءبىزدىڭ قىزمەتتىك پارىزىمىز عوي.
– پوليتسيا قاتارىندا جۇمىس ىستەپ جۇرگەنىڭىزگە قانشا ۋاقىت بولدى؟ ءوزىڭىزدى تانىستىرا كەتسەڭىز.
– قاراعاندى قالاسىنىڭ تۋماسىمىن. ىشكى ىستەر ورگاندارىندا 2011 جىلدان بەرى جۇمىس ىستەيمىن. بىلتىر باتالونعا اۋىستىم. قازىر وبلىستىق پوليتسيا دەپارتامەنتىنە قاراستى پاترۋلدىك پوليتسيا قىزمەتىنىڭ ينسپەكتورى بولىپ قىزمەت ەتەمىن. پوليتسيانىڭ اعا لەيتەنانتى دەگەن شەنىم بار.
– ءوزىڭىزدىڭ وتباسىڭىز تۋرالى ايتساڭىز. قىزمەتتەن ورالعاندا ۇيدە ءسىزدى كىمدەر كۇتىپ وتىرادى؟
– زايىبىم ەكەۋمىز ەكى ۇل ءوسىرىپ جاتىرمىز. ول كىسىنىڭ ەسىمى نازيرا, ۇيدە بالا تاربيەسىمەن اينالىسادى.
– قاجىرلى قىزمەتىڭىزگە راحمەت.
اڭگىمەلەسكەن
قايرات ءابىلدا,
«Egemen Qazaqstan»
قاراعاندى وبلىسى
