پارلامەنت سەناتىنىڭ دەپۋتاتتارى سەرىك اقىلباي مەن يۋري كۋبايچۋك قاراعاندى قالاسىنىڭ بىرقاتار مەكەمەلەرىندە بولىپ, جۇمىس ورىندارىنىڭ ۇجىمدارىمەن كەزدەسۋلەر وتكىزدى.
سەناتورلار مەديتسينالىق ماقساتتاعى ونىمدەردى, دارىلەردى ساقتاۋعا قىزمەت ەتەتىن ورتالىق قازاقستانداعى ەڭ ءىرى كاسىبيلەنگەن لوگيستيكالىق كەشەن بولىپ تابىلاتىن «ريگەر» جشس جۇمىسىمەن تانىستى. كەشەن GMP حالىقارالىق ساپا مەديتسينالىق ستاندارتىنا لايىقتالعان مامانداندىرىلعان قىزمەت كورسەتۋگە نەگىزدەلگەن جاڭا قۇرالدارمەن جابدىقتالعان. مەكەمە «بيزنەس-2020 جول كارتاسى» باعدارلاماسى شەڭبەرىندە دۇنيەگە كەلگەن.
دەپۋتاتتار مەكەمە باسشىلىعىمەن جانە قىزمەتكەرلەرىمەن كەزدەسۋى بارىسىندا ءدارى ءوندىرىسى سالاسىن دامىتۋدىڭ وزەكتى ماسەلەلەرى, ءدارى-دارمەكتى تالاپقا ساي جەتكىزۋ پروتسەسىن جەتىلدىرۋ, مەكەمەنى ودان ءارى دە تەحنيكالىق جابدىقتاۋ جانە ونىڭ ىشىندە ۇدەمەلى يندۋستريالىق-يننوۆاتسيالىق دامۋ باعدارلاماسىن نەگىزگە الا وتىرىپ دامىتۋ سياقتى ماسەلەلەر تالقىلاندى.
سەناتورلار, سونداي-اق ءتۇركيالىق «بورۋسان» حولدينگىنە كىرەتىن «بورۋسان ماكينا قازاقستان» كومپانياسىندا دا بولدى. مەكەمە قازاقستاندىق نارىقتا «Caterpillar» فيرماسىنىڭ قۇرال-جابدىقتارى مەن تەحنيكاسىن اكەلەدى جانە ولارعا سەرۆيستىك قىزمەت كورسەتۋدى قامتاماسىز ەتەدى.
قاراعاندى.
***
جۋىردا سەناتور جابال ەرعاليەۆ اقمولا وبلىسىنىڭ شورتاندى اۋدانىندا ەلىمىزدە اشىق اسپان استىنداعى ەگىستىك القابىندا تۇڭعىش رەت وتكىزىلگەن «قازاقستان ەگىن القابى: «جاڭا دالا-2013» مامانداندىرىلعان كورمەنىڭ اشىلۋ سالتاناتىنا قاتىستى.
اۋىل شارۋاشىلىعى تەحنيكاسى مەن مينەرالدى تىڭايتقىشتار مەن وسىمدىك زيانكەستەرىنە قارسى قولدانىلاتىن ءتۇرلى حيميالىق دارىلەر شىعاراتىن الەمنىڭ ەڭ ۇزدىك وندىرىسشىلەرى قازىر قازاقستان رىنوگىن يگەرۋگە ىنتالى بولىپ وتىر. سونىڭ ءبىر ايعاعىنداي, وسى كورمەگە قويىلعان تەحنيكالاردىڭ ءبىرازى قازىر اۋىل شارۋاشىلىعى وندىرىسىندە پايدالانىلىپ تا ءجۇر.
– ەلباسى نۇرسۇلتان نازارباەۆتىڭ اۋىل شارۋاشىلىعىن دامىتۋعا جانە اۋىل شارۋاشىلىعى ونىمدەرىن وڭدەۋگە زور قامقورلىق جاساۋىنىڭ ناتيجەسىندە قازاقستاننىڭ اگرارلىق سالاسى ساپالىق جاعىنان ۇلكەن وزگەرىستەرگە ۇشىرادى. اۋىل شارۋاشىلىعىنا جاڭا تەحنيكا مەن جاڭا تەحنولوگيا كەلىپ تە جاتىر. مەملەكەت تاراپىنان اگرارلىق سالاعا جىل سايىن ينۆەستيتسيالىق ۇلكەن قولداۋ كورسەتىلىپ كەلەدى. بۇرىن كورمەگەن مىناداي جاڭا دا عاجايىپ تەحنيكا اۋىلدارىمىزداعى ادامداردىڭ قولىنا تيەر بولسا, ولاردىڭ ءوز ىستەرىنە دەگەن ىنتاسى ارتا تۇسەرى ءسوزسىز, – دەدى سەناتور.
اقمولا وبلىسى
***
پارلامەنت سەناتىنىڭ دەپۋتاتى عاريفوللا ەسىم سەمەيدە قالا مەكتەبى جانىنداعى لاگەرلەر جۇمىسىمەن تانىستى. «رادۋگا» بالالار لاگەرىنىڭ ءومىرىن كوزىمەن كورىپ, ۇجىممەن كەزدەسىپ, بالالارمەن سۇحباتتاسقان سەناتور جازعى دەمالىستى جايلى ۇيىمداستىرعان جەرگىلىكتى بيلىكتىڭ جۇمىسىنا ريزاشىلىعىن ءبىلدىردى.
«مەملەكەتىمىز بالالارعا, اسىرەسە, الەۋمەتتىك قولداۋعا ءزارۋ جەتكىنشەكتەرگە جان-جاقتى قامقورلىق جاساپ وتىر. ەلىمىز تاۋەلسىزدىگىن الىپ, ەكونوميكاسى دامىپ, باقۋاتتانعان سوڭ قالا ماڭىنداعى لاگەرلەردى قايتا جانداندىردى. وركەنيەتكە ۇمتىلعان, ءبىلىم مەن ەڭبەككە تالپىنعان بۇگىنگى تالانتتى دا تالاپتى بالالار – ءبىزدىڭ بولاشاعىمىز», دەدى سەناتور.
سونداي-اق, عاريفوللا ەسىم «بالالار لاگەرلەردە تەك دەمالىپ قانا قويمايدى, ولار وزگەگە قول ۇشىن بەرە الاتىن باۋىرمالدىققا, كوپشىلدىككە جانە قايسارلىققا ۇيرەنەدى, ەلگە, جەرگە, وتانعا دەگەن پاتريوتتىق سەزىمى جەتىلە تۇسەدى», دەپ اتاپ ءوتتى.
سەمەي.
