اۋرۋلاردىڭ قالاي تارالۋى تۋرالى اقپاراتتى BlueDot الگوريتمى قالاي قاداعالايتىنىنىڭ كورىنىسى
سونىمەن جاساندى ينتەللەكت ەپيدەميانى قالاي بولجاي الادى؟ قانداي دا ءبىر ينفەكتسيانىڭ ەپيدەميا تۋدىرۋى تۋرالى عالىمدار دابىل قاعاتىنىن ءجيى ايتامىز. كليمات جىلۋىنا بايلانىستى بەزگەك سياقتى اۋرۋلاردىڭ جاندىكتەر ارقىلى سۋىق ايماقتارعا دا تاراۋ قاۋپىن تۋدىرىپ وتىر. ودان قالدى مۇزدىقتاردا 15 مىڭ جىل بۇرىن قاتىپ قالعان ۆيرۋستار دا ويانۋى مۇمكىن.
جوعارىدا ايتىلعان جاعدايلارعا بايلانىستى عالىمدار جاساندى ينتەللەكت باسقاراتىن BlueDot الگوريتمىن پايدالانادى. الگوريتم بارلىق جان-جانۋارلار مەن وسىمدىكتەر الەمىندەگى اۋرۋلار تۋرالى بارلىق جاڭالىقتار, رەسمي مالىمدەمەلەر مەن مالىمەتتەردى جيناپ, مونيتورينگ جاساي وتىرىپ, سونىڭ نەگىزىندە ەسكەرتۋلەر جاساپ وتىرادى. مىسالى, ۋحان قالاسىنا بارماۋ كەرەكتىگىن, جوعارىدا ايتقانداي امەريكاندىقتار مەن كانادالىقتار الدىن الا ەرتە حابارلاعان. كوروناۆيرۋس تۋرالى ءسوز قوزعاعاندا 2003 جىلعى قىتايداعى SARS تارالۋىن ايتپاي كەتپەۋ مۇمكىن ەمەس. سول كەزدە قىتايلىق بيلىك اۋرۋ تۋرالى ۇزاق ۋاقىت ارەكەتسىز قالدى جانە ونى جاسىرۋعا تىرىستى. ال, بۇل اۋرۋدىڭ جىلدام تاراپ كەتۋىنە نەگىز بولدى.
Wired باسىلىمىنىڭ جازۋىنشا BlueDot باعدارلاماسىمەن اينالىساتىن كومپانيا 2014 جىلى 9,4 ملن دوللار كولەمىندە ۆەنچۋرلىك قارجىلاندىرۋ نەگىزىندە اشىلعان. كومپانيادا جۇمىس ىستەيتىن 40 دارىگەر مەن IT سالاسىنىڭ ماماندارى ساراپتامالىق باعدارلامالار جاساي وتىرىپ, 65 تىلدەگى بارلىق جاڭالىقتار مەن اقپاراتتاردى سۇزگىدەن وتكىزەدى. بۇل بارلىق ەپيدەميا تۋدىراتىن اۋرۋ تۇرلەرىن تولىقتاي زەرتتەپ, كەرەك دەسەڭىز اۋە كومپانيالارىنىڭ ادامدار مەن جانۋارلار اراسىندا بولاتىن اۋرۋلار تۋرالى حابارلامالارىن دا ەلەكتەن وتكىزىپ, بازا جاساپ وتىرادى. كومپانيا الەۋمەتتىك جەلىدەگى اقپاراتتى ونىڭ كوبى وسەك-اياڭ نەگىزىندە جازىلاتىنى سەبەپتى ەسەپكە الماعان.
اۆتوماتتاندىرىلعان ىرىكتەۋدەن كەيىن الگوريتمنىڭ ناتيجەلەرىن ەپيدەميولوگ ماماندار مىندەتتى تۇردە تەكسەرەدى جانە سونىڭ نەگىزىندە قورىتىندى ەسەپ جاسالادى. دايىن ەسەپ اقش جانە كانادا سياقتى ەلدەردىڭ دەنساۋلىق ساقتاۋ ورگاندارىنىڭ باسشىلارىنا, اۋە كومپانيالارىنا جانە اۋرۋحانالارعا جىبەرىلەدى. BlueDot الگوريتمى ۋحان قالاسىنان شىققان ۆيرۋس الدىمەن بانگكوكتا, ارتىنشا سەۋل, تايبەي مەن توكيودا كورىنىس تاباتىنىن بولجاي العان.
