بۇگىندە مۇحتار ءابىلازوۆتىڭ ءتارتىپ ساقشىلارىنىڭ قولىنا ءتۇسىپ, ق ۇلىپ استىنا الىنعانىنا ءبىر اپتاداي ۋاقىت بولدى. ءبىز مۇنىڭ بىرقاتار جاي-جاپسارىن ەلىمىز باس پروكۋراتۋراسى ءباسپاسوز قىزمەتىنىڭ دەرەكتەرى بويىنشا گازەتىمىزدىڭ 3 تامىز كۇنگى نومىرىندە جاريالانعان «ءابىلازوۆ ۇستالدى» دەگەن ماقالادا بايانداپ بەرگەنبىز.
وسى ەكى ارالىقتا مۇحتار ءابىلازوۆ تورعا تۇسكەن ەل – فرانتسيانىڭ ەكس-ان-پروۆانس قالاسىنىڭ سوتى ءوزىنىڭ وعان قاتىستى ەڭ العاشقى شەشىمىن دە شىعارىپ ۇلگەردى. ولار وتكەن بەيسەنبى كۇنى قازاقستاندىق بتا بانكتىڭ ەكس-قوجايىنىن تۇتقىننان شىعارماي, ۇستاپ وتىرا بەرۋ حاقىنداعى مامىلەگە توقتادى. وسىلايشا ءابىلازوۆتىڭ شەتەلدىك ادۆوكاتتارىنىڭ ونى قانشالىقتى كولەمدە بولسا دا, سۇراستىرىلعان باعاسىنداعى اقشانىڭ كەپىلدىگىمەن بوستاندىققا شىعارا تۇرۋ تۋراسىنداعى ۇسىنىسى قابىل الىنبادى. بالكىم, بۇل ءبىر ەسەپتەن دۇرىس تا بولعان شىعار. ايتپەسە, مۇددەلى بىرەۋلەردىڭ وسى ءساتتى پايدالانىپ, ونىڭ ومىرىنە قاستاندىق جاساۋى دا ىقتيمال عوي...
ەندى وتكەندى ءبىر ەسكە ءتۇسىرىپ وتسەك, ءسوزدىڭ باسىن 31 شىلدە كۇنى ساعات ءۇشتىڭ شاماسىندا فرانتسيانىڭ وڭتۇستىگىندەگى مۋان-سارتۋ دەرەۆنياسىندا اسا قىمبات اقشاعا جالعا الىنعان اۋماعى اتشاپتىرىم ۆيللادا تۇرىپ جاتقان مۇحتار ءابىلازوۆتى قولعا تۇسىرۋگە ارنالعان ۇزاق ۋاقىتتان بەرگى وپەراتسيانىڭ ءساتتى اياقتالعانىنان باستار ەدىك. قازىر بىرقاتار شەتەلدىك بۇقارالىق اقپارات قۇرالدارى جازىپ جاتقانداي, بۇرىنعى بانكيردىڭ جۇرگەن-تۇرعان قادامدارىن اڭدۋعا سول كۇندەرى ءبىراز قۇزىرەتتى ورگاندار ارالاسقانعا ۇقسايدى. بۇل تۋرالى ءبىز دە وسىنىڭ الدىندا گازەتىمىزدىڭ تاۋلىك بويى جاڭارىپ تۇراتىن ينتەرنەت-رەسۋرسىندا ءۇش رەت اقپار بەرگەنبىز. مىنە, وسىلاردىڭ بارىنەن بەلگىلى بولعانى: ءابىلازوۆتىڭ قايدان شىعىپ, قايدا بارعانىن اڭدۋعا ءيزرايلدىڭ Gadot اگەنتتىگىنىڭ جەكە دەتەكتيۆتەرى ايانباي اتسالىسقان كورىنەدى. ولار مۇحتاردىڭ ايەلى مەن قورعاۋشىلارىنا شالعان قوڭىراۋلارىنىڭ ءىزى بويىنشا ونىڭ تۇرعان مەكەنىن انىقتاۋعا قول جەتكىزىپتى. وسىنىڭ قاباتىندا ءىز كەسۋشىلەر وتكەن اپتانىڭ باسىندا وليگارحتىڭ ۋكراينالىق ارىپتەسىنىڭ بۇرىنعى ايەلى ەلەنا تيششەنكونىڭ دەرەۆنياعا كەلىپ قايتقان ءساتىن دە قالت جىبەرمەگەن سىڭايلى. سونىڭ الدىنداعى اپتادا بۇل ايەل لوندوندا بولىپ, ءابىلازوۆتىڭ سول قالاداعى ءبىر ىسىنە بايلانىستى تۇسىنىكتەمە بەرىپ قايتىپتى. ول فرانتسياعا ورالعان بويدا مۇحتارمەن حابارلاسقان. الايدا, كەلىنشەك سوڭىندا اڭدۋشى بارىن اڭعارا قويماسا كەرەك. بۇگىندە كوبىرەك ايتىلىپ جۇرگەن ەكى دەرەك وسىلاي سىر شەرتسە, ءۇشىنشى ءبىر بولجام بۇل مەكەنجايدى بتا بانكتىڭ وكىلى بەرگەن دەگەنگە سايادى. مۇنى اتالمىش بانكتىڭ ءباسپاسوز قىزمەتىنە سىلتەمە جاساعان «ۆرەميا» گازەتىنىڭ ءتىلشىسى مالىمدەدى.
قالاي دەگەندە دە, ەكس-بانكيردى اۋىزدىقتاپ, قولعا تۇسىرۋگە باعىتتالعان وپەراتسيانى برونەتەحنيكا مىنگەن فرانتسۋز ارنايى قىزمەت ورگاندارىنىڭ جاۋىنگەرلەرى اتقارعانى ايدان انىق. وسىعان وراي فرانتسيانىڭ بۇقارالىق اقپارات قۇرالدارى اسكەريلەردىڭ بۇل شاراعا بارىنشا مۇقيات تا تىڭعىلىقتى دايىندالعانىن اشىق جازىپ جاتىر. بۇل ءۇشىن ءتىپتى ولار تىكۇشاقپەن ۆيللانىڭ ۇستىنەن اينالا ۇشىپ ءوتىپ, ونىڭ ورنالاسقان اۋماعىن جوعارىدان تەكسەرىپ وتكەن. بۇعان, ءاسىلى, ءابىلازوۆتىڭ «قۇتحاناسىن» قارۋلى كۇزەتشىلەردىڭ قورعاپ تۇراتىنى سەبەپ بولعان. بىراق, اينالىپ كەلگەندە, مۇنىڭ ءبارى شامادان تىس ساقتىق پەن دۇرلىگۋ بولىپ شىقتى, جاسانىپ كەلگەن جاساق مۇشەلەرىنە كۇزەتتەگى ساربازداردان ءبىر ادام دا قارسى كەلگەن جوق, بارلىعى ايتىلعان ساتىندە قارۋلارىن تاستاپ, قورالاردىڭ ەسىكتەرىن ايقارا اشىپ بەردى. ال وليگارحتىڭ قولىنا كىسەن سالۋ كەزىندە ونىڭ جانىندا تۋعان قارىنداسى گاۋھاردىڭ وتىرعانى انىقتالدى. بۇگىندە اقش-تا تۇرىپ جاتقانىنا تالاي جىل بولعان ايەلدە پوليتسيالاردىڭ شارۋاسى بولماعان. سوندىقتان ءتارتىپ ساقشىلارى اعاسىن الىپ كەتكەن بويدا ول ءوزىنىڭ جان-جاقتاعى تۋعان-تۋىستارىنا بۇل جونىندە جاپپاي حابار بەرە باستايدى.
وسى تۇستا بىرقاتار اقپارات قۇرالدارى مۇحتار ءابىلازوۆتىڭ جانىندا بىرنەشە ەلدىڭ پاسپورتتارى بولعانىن دا جارىسا جازىسىپ جاتتى. ماسەلەن, قاماۋعا الىنعان كەزىندە ونىڭ قالتاسىنان وڭتۇستىك افريكا رەسپۋبليكاسىنىڭ ازاماتى ەكەنىن بىلدىرەتىن قۇجات شىققان. وقىرمان قاۋىم مامىر ايىنىڭ سوڭىندا يتاليادا قولعا تۇسكەن ءابىلازوۆتىڭ ايەلى الما شالاباەۆادان دا ءدال وسى ەلدىڭ پاسپورتى تابىلعانىن ءالى ۇمىتا قويماعان شىعار. بۇدان كەيىن وليگارحتىڭ تۋعان كۇيەۋ بالاسى يلياس حراپۋنوۆ-بەكەتوۆتىڭ تاياۋدا قالاي عانا افريكانىڭ تۇستىگىندەگى مەملەكەت پرەزيدەنتىنىڭ شۆەيتسارياداعى كەڭەسشىسى بولىپ شىعا كەلگەن جايىنىڭ كومەسكى دەرەگى الدان كولبەڭدەپ كورىنە بەرەدى. تاپ وسى كەزدە سول كۇيەۋ بالانىڭ تۋرا ءبىر كەزدەردە ماسكەۋدىڭ ىرگەسىنىڭ شاڭىن بۇرقىراتقان قايىن اتاسى سەكىلدى ءالپى تاۋىنىڭ باۋرايىن
