ورتالىق كوممۋنيكاتسيالار قىزمەتىنىڭ رەسمي وكىلى التاي ابيبۋللاەۆ كەشەگى وتكىزگەن بريفينگىندە اعىمداعى ماڭىزدى ءىس-شارالار بارىسىمەن تانىستىرىپ ءوتتى.
ونىڭ ايتۋىنشا, ۇكىمەت باسشىسى سەرىك احمەتوۆ قازاقستاننىڭ ماشينا جاساۋشىلار وداعى مۇشەلەرىمەن كەزدەسۋ وتكىزىپ, وسى سالاداعى ۇدەمەلى-يندۋستريالىق مەملەكەتتىك باعدارلامانىڭ ىسكە اسىرىلۋ بارىسى مەن باستى باعىتتارى تالقىلاندى. ال 6 تامىزدا, ياعني بۇگىن وڭىردەگى يندۋستريالىق جانە الەۋمەتتىك-ەكونوميكالىق ماڭىزى بار نىسانداردىڭ تىنىس-تىرشىلىگىمەن تانىسۋ ماقساتىندا اقتوبە وبلىسىنا پرەمەر-ءمينيستردىڭ ءبىرىنشى ورىنباسارى, وڭىرلىك دامۋ ءمينيسترى باقىتجان ساعىنتاەۆ جۇمىس ساپارىمەن بارادى. ال 7-9 تامىز ارالىعىندا مۇناي جانە گاز ءمينيسترى ۇزاقباي قارابالين ماڭعىستاۋ وبلىسىنا جۇمىس ساپارىن جاسايدى.
سونداي-اق, رەسمي وكىل قورعانىس مينيسترلىگى وتكىزەتىن ءىس-شارالارعا دا توقتالدى. اقش جانە ۇلىبريتانيا قارۋلى كۇشتەرى بولىمشەلەرىنىڭ قاتىسۋىمەن «بەيبىتشىلىك ءۇشىن ارىپتەستىك» اتتى ناتو باعدارلاماسى مەن «ارىپتەستىك» اتتى قازاقستان مەن ناتو اراسىنداعى 2006 جىلعى 31 قاڭتاردا قول قويىلعان جەكە باعدارلاماسى اياسىندا «دالا قىرانى» اتتى جىل سايىنعى دالالىق-پراكتيكالىق ارنايى كۇندەلىك وقۋ-جاتتىعۋلارى ۇيىمداستىرىلادى.
بريفينگكە قازاقستاننىڭ باس سانيتارلىق دارىگەرى جانداربەك بەكشين قاتىسىپ, سالاداعى باستى ماسەلەلەردى بايانداپ بەردى. ءجىتى ىشەك ينفەكتسيالارى قازاقستاندا عانا ەمەس, الەمنىڭ بارلىق ەلدەرىندە دە وزەكتى بولىپ تۇرعاندىعىن العا تارتقان باس سانيتارلىق دارىگەر وسى اۋرۋمەن سىرقاتتانۋ وتكەن جىلدىڭ وسىنداي كەزەڭىمەن سالىستىرعاندا, 17,9 پايىزعا تومەندەگەندىگىن اتادى. اسىرەسە, سوڭعى كەزدە بەلەڭ الىپ كەلە جاتقان جاڭا كوروناۆيرۋسپەن جانە قۇس تۇماۋىمەن سىرقاتتانۋشىلىق ەلىمىز اۋماعىندا تىركەلمەپتى. اعىمداعى جىلدىڭ ساۋىرىنەن باستاپ, الەمدە ادامداردىڭ قۇس تۇماۋىمەن سىرقاتتانۋىنىڭ 134 جاعدايى تىركەلىپ, ونىڭ ىشىندە 43 جاعداي ولىممەن اياقتالعان.
بيىل قازاقستاندا دەنگە قىزباسىنىڭ 6 رەت تىركەلگەندىگىن باس سانيتارلىق دارىگەر العا تارتتى. ونىڭ ايتۋىنشا, دەنگە قىزباسىنىڭ 39 مىڭنان استام جاعدايى تايلاندتا تىركەلگەن. سونىمەن قاتار, ەنتەروۆيرۋستىق ينفەكتسيا دا اتالماي قالمادى. 71-ءشى شتامم قايتا ورالىپ, وزىنە نازار اۋدارتىپ وتىرعاندىعىن ايتا كەلىپ, بەكشين ونىڭ 60-شى جىلدارى بەلگىلى بولعاندىعىن جەتكىزدى. ال قىتايدا 2006 جىلدان باستاپ, تۇراقتى ءورشۋ بولىپ تۇراتىن كورىنەدى. قىتايدا بيىل ەنتەروۆيرۋستىق ينفەكتسيانىڭ 600 مىڭ جاعدايى تىركەلگەندىگى دە كولدەنەڭ تارتىلدى. وسىنىڭ بەدەرىندە ج.بەكشين ەلىمىزدە كونگو-قىرىم قاندى قىزباسىنىڭ جانە كەنە ەنتسەفاليتىنىڭ ەپيدەميولوگيالىق ماۋسىمى ءالى جالعاسۋدا ەكەندىگىن دە قاپەرگە سالدى.
بۇل كورسەتكىش بويىنشا جامبىل, قىزىلوردا, وڭتۇستىك قازاقستان وبلىستارى قولايسىز اۋماق بولىپ سانالادى. ال الماتى قالاسى, الماتى جانە شىعىس قازاقستان وبلىستارى كەنە ەنتسەفاليتى بويىنشا قولايسىز اۋماق.
اعىمداعى جىلعى 1 مامىر مەن 1 تامىز ارالىعىندا كوكونىستەر مەن جەمىس-جيدەك ونىمدەرىنىڭ 11 مىڭ 217 سىناماسى زەرتحانالاردا زەرتتەلىپ, 198 سىنامادا (قاربىز, قاۋىن, سارى ورىك, كارتوپ جانە ت.ب.) نيتراتتاردىڭ قۇرامىنىڭ ەڭ از رۇقسات ەتىلگەن دەڭگەيلەردەن ارتۋى انىقتالىپتى. قاربىزدار مەن قاۋىنداردا نيتراتتاردىڭ قۇرامىنىڭ ەڭ از رۇقسات ەتىلگەن دەڭگەيى 1-1,5 ەسەگە ارتىپ وتىرعاندىعى دا ويلانتپاي قويمايدى. ءتىپتى, ولارعا 86 550 تەڭگە سوماسىندا ايىپپۇل دا سالىنعان. قۇرامىندا نيتراتتارى جوعارى 1130 كگ ءونىم ساتىلىمنان الىندى جانە جويىلدى. باس سانيتارلىق دارىگەر قازاقستاندا ۆاكتسيناتسيا ءتيىمدى بيۋدجەتتىك باعدارلامالاردىڭ ءبىرى بولىپ تابىلاتىنىمەن دە ءبولىستى. جىل سايىن ۆاكتسيناتسيا باعدارلاماسىنا 12-18 ميلليارد تەڭگە ءبولىنىپ, ينفەكتسيالىق اۋرۋلارعا قارسى شامامەن 5 ميلليون ادام ەگىلەدى ەكەن. ونىڭ 1,3 ميلليونى – بالالار. حالىقتى ۆاكتسيناتسيالاۋ ۇلتتىق ەگۋلەر كۇنتىزبەسىنە سايكەس 21 ينفەكتسيالىق اۋرۋعا قارسى تەگىن جۇرگىزىلەدى. قىزىلشانىڭ ءورشۋى تۇرعىنداردى جاپپاي يممۋنداۋدىڭ ارقاسىندا توقتاتىلدى. ەگىلمەگەن ادامدا ينفەكتسيا اۋىر تۇردە وتەتىنىن, كوپ جاعدايدا مۇگەدەكتىككە جانە ءولىم-جىتىمگە اكەپ سوقتىراتىن اسقىنۋلارمەن وتەتىنىن تاجىريبە كورسەتىپ وتىر.
جالپى, بريفينگ بارىسىندا باس سانيتارلىق دارىگەر ۆاكتسينانىڭ ماڭىزى تۋرالى, ادامداردىڭ ساقتىق شارالارىن نازاردان تىس قالدىرماۋى جانە جان-جاقتى اقپارات الىپ تۇرۋلارى تۇرعىسىنداعى ەسكەرتپەلەردى ورتاعا سالا كەتتى. بۇدان اركىم ءوز دەنساۋلىعى ءۇشىن جاۋاپتى ەكەندىگىن ۇققانداي بولدىق.
اسقار تۇراپباي ۇلى,
«ەگەمەن قازاقستان».
