جۇيە بويىنشا قابىلداۋ ءبولىمىنىڭ كەزەكشىسى شۇعىل جانە قارقىندى مەديتسينالىق كومەكتى قاجەت ەتەتىن جۇكتى ايەلدەر تۇسكەن كەزدە «SOS» شۇعىل شاقىرۋ ءپۋلتىن باسىپ, قاجەتتى مامانداردى شاقىرا الادى. ال شاقىرتىلعان دارىگەرلەر نەمەسە مەدبيكەلەر شۇعىل ارەكەت ەتىپ, قابىلداۋ بولىمىنە تۇسكەن ناۋقاستى وتا جاساۋ بولمەسىنە كەدەرگىسىز جەتكىزەدى نەمەسە باسقا دا كومەكتەر كورسەتە الادى. بارلىق اۋرۋحانا بولىمدەرىنىڭ قىزمەتكەرلەرى «SOS مەديتسينالىق جۇيەسى» بويىنشا وقۋدان وتكەن, اسىرەسە رەانيماتولوگ, اكۋشەر-گينەكولوگ, جاۋاپتى كەزەكشى دارىگەر, ديرەكتوردىڭ ەمدەۋ ءىسى جونىندەگى ورىنباسارى, لابورانت, دارىگەرلەر مەن مەيىربيكەلەر.
ماڭعىستاۋ وبلىستىق «انا مەن بالا» ورتالىعىنىڭ ديرەكتورى جامال جامانباەۆانىڭ ايتۋىنشا, «SOS مەديتسينالىق جۇيەسى» جوباسىنىڭ ءمانى – ناۋقاستارمەن قىزمەتكەرلەرگە ارنالعان يننوۆاتسيالىق قاۋىپسىزدىك تەحنولوگيالارىن قۇرۋعا باعىتتالعان. اتالعان جوبانىڭ ىسكە قوسىلعانىنا ءبىر جىلدان ءسال اسقان جانە باتىس وڭىرىندە العاش ەنگىزگەن دە وسى پەريناتالدىق ورتالىق.
– بۇل جۇيە وتە ىڭعايلى, ەڭ الدىمەن ەمدەلۋشىلەر مەن مەدبيكەلەر اراسىندا تىكەلەي بايلانىس ورناتۋعا مۇمكىندىك بەرىپ وتىر. پەريناتالدىق ورتالىققا شۇعىل تۇردە جەتكىزىلگەن جۇكتى ايەلدەردى وتا بولمەسىنە اپارۋ قاجەتتىگى تۋىنداسا, SOS تەتىگىن باسۋ ارقىلى مەدبيكەلەر كومەككە شاقىرىلىپ, قانداي قاجەتتىلىك كەرەكتىگى ايتىلادى. بىلايشا ايتقاندا ۇيالى تەلەفوننىڭ ءرولىن اتقارادى دەۋگە بولادى. ەڭ باستىسى, ۋاقىت جوعالتپاي ناۋقاستارعا ساپالى قىزمەت كورسەتىلەدى جانە قاجەتتى كومەك 40 سەكۋند پەن 1 مينۋت ارالىعىندا جاسالادى. كوبىنە قابىلداۋ ءبولىمى, بوسانۋ زالى, بوسانۋدان كەيىنگە ءبولىم جانە رەانيماتسيا ءبىر-بىرىمەن ءجيى بايلانىسادى, – دەيدى جامال ابدىبەكقىزى.
SOS مەديتسينالىق جۇيەسى ناۋقاستىڭ جاعدايى اۋىرلاپ, جەدەل كومەك كەرەك بولعان جاعدايدا قولدانىلادى. تەتىكتى باسساڭىز جەتكىلىكتى, كەزەكشى مەدبيكەگە شۇعىل حابار جەتەدى. وسىلايشا قىزمەت كورسەتۋ ساپاسىن ارتتىرىپ, ۋاقىت ۇنەمدەلەدى جانە ناۋقاستارعا باقىلاۋ كۇشەيەدى. SOS مەديتسينالىق جۇيەسى وبلىستىق پەريناتالدىق ورتالىعىنىڭ 13 نۇكتەسىنە ورناتىلعان. تاعى ءبىر ەرەكشەلىگى, ەمدەلۋشىلەردەن تۇسكەن بارلىق ارىز-شاعىمدار مەن مالىمەتتەردى ورتالىق ديرەكتورى ءوز باقىلاۋىندا ۇستاپ وتىرادى.
– بۇل جۇيەنى ناۋقاستاردىڭ قاۋىپسىزدىك دەڭگەيىن جوعارىلاتۋعا جانە مەديتسينالىق قىزمەت كورسەتۋ ساپاسىن ودان ءارى ارتتىرۋ ماقساتىندا ورناتقان بولاتىنبىز. وسى ۋاقىتقا دەيىن 3 مىڭنان استام جوسپارلى جانە شۇعىل شاقىرتۋلار جاسالعان. «مەديتسينالىق ينتسيدەنت» دەگەن تەرمين بار, بارلىق ارەكەتتەر وسى جۇيە ارقىلى تىركەلەدى. بۇل جۇيە 2014 جىلى قۇرىلدى جانە اۆتورلىق قۇقىق يەگەرى اتانىپ وتىرمىز. جالپى SOS مەديتسينالىق جۇيەسى نۇر-سۇلتان قالاسىنداعى EXPO اۋماعىنداعى «Astana Hub» يننوۆاتسيالىق ءىT تەحنوپاركىندە جالعاسۋدا جانە قازىرگى ۋاقىتتا 2.0 نۇسقاسى جاسالۋدا. قىسقاشا ايتقاندا استانا پاركىنىڭ العاشقى تۇلەگى بولىپ ەسەپتەلەمىز. وتاندىق يننوۆاتسيالىق تەحنولوگيانى العاشقى بولىپ قولداعان جامال جامانباەۆا جەتەكشىلىك ەتەتىن ماڭعىستاۋ وبلىستىق پەريناتالدىق ورتالىعى. بۇل وڭىردە تۋ كورسەتكىشى جوعارى. ءبىر مەزگىلدە جۇكتى ايەلدەردى جاتقىزاتىن ورىن تاپشىلىعى سەزىلۋى مۇمكىن جانە مۇنداي كەزدە شۇعىل قيمىلداۋعا تۋرا كەلىپ جاتاتىن كەزدەر بولۋى مۇمكىن, دەيدى ول.
بۇگىندە وتاندىق جوباعا قىزىعۋشىلىق تانىتىپ جاتقان مەديتسينالىق مەكەمەلەر از ەمەس. ماڭعىستاۋ وبلىستىق پەريناتالدىق ورتالىعىنان كەيىن بەينەۋ اۋداندىق اۋرۋحاناسى SOS مەديتسينالىق جۇيەسىن ورناتقان بولاتىن.
وسىلايشا, وتاندىق جوبانىڭ ايماق مەديتسيناسىنا تيگىزەر پايداسىن ماماندار وڭ باعالاپ وتىر. مەديتسيناعا كەلگەن جاڭالىق, ءاربىر ىلگەرىلەۋشىلىك ەل يگىلىگىنە اينالار بولسا, قۋانۋعا بولادى.
ماڭعىستاۋ وبلىسى
