بۇل شارا جەرگىلىكتى اتقارۋشى ورگاندار, وبلىستىق پوليتسيا دەپارتامەنتىنىڭ جەرگىلىكتى پوليتسيا قىزمەتى جانە ەرىكتىلەر تاراپىنان قولداۋ تاپتى. اقتاۋ قالاسى اكىمىنىڭ ورىنباسارى گۇلجازيرا الداشەۆانىڭ ايتۋىنشا, تاعدىر تالكەگىنە تۇسكەن جاندارعا پانالايتىن ورىندار تاۋىپ بەرىپ, قۇجاتتارىن رەتتەستىرىپ, ولاردىڭ قوعامعا بەيىمدەلۋىنە جاعداي جاسالادى. بۇل رەتتە جوعارىدا اتالعان قايىرىمدىلىق قورىنىڭ ديرەكتورى يمانعازى دوسمۇحامەدوۆكە شاھارداعى 1 ش/ا ورنالاسقان عيماراتتىڭ ءبىرى بەرىلگەن. بولاشاقتا مۇندا الەۋمەتتىك بەيىمدەۋ ورتالىعى ءوز جۇمىسىن باستايدى. عيمارات ءبولىنىپ دايىن تۇر. وندا دەنساۋلىعى سىر بەرىپ, مۇگەدەكتىك راسىمدەگىسى كەلگەن جانداردىڭ قۇجاتتارىن جيناقتاپ بەرۋ, سونىمەن قاتار زەينەتكەرلىككە شىققاندارعا زەينەتاقىسىن الىپ بەرۋگە كومەكتەسۋ كوزدەلگەن. ەڭبەككە جارامدىلار بولسا ولاردى تۇراقتى جۇمىسقا ورنالاستىرۋ ماسەلەسى دە قولعا الىنباق. الەۋمەتتىك بەيىمدەۋ ورتالىعىنا الدىمەن كۇردەلى جوندەۋ جۇرگىزىلىپ, قاجەتتى كولىك جانە جيھازبەن قامتاماسىز ەتىلەتىن بولادى. پسيحولوگ مامانداردى تارتۋ جوسپاردا بار.
-جالپى بۇل ادامداردىڭ تاعدىرى ارقيلى. ولار ءبىزدىڭ قوعامنىڭ مۇشەسى. ال قينالعان جاندارعا قول ۇشىن سوزۋ بارشامىزعا پارىز دەپ بىلگەنىمىز دۇرىس. پرەزيدەنت قاسىم-جومارت توقاەۆتىڭ جارلىعىمەن بيىل ەرىكتىلەر جىلى بولىپ جاريالاندى. بۇگىنگى شاراعا ەرىكتىلەردىڭ قاتىسىپ وتىرعاندىعى قۋانتادى. مۇنداي ساۋاپ ىستەر جاساۋ جاستاردى مەيىرىمدىلىككە, ءار نارسەگە جاناشىرلىق تانىتۋعا تاربيەلەيتىنى ءسوزسىز, دەيدى قالا اكىمىنىڭ ورىنباسارى.
شاراعا بەلسەندى قاتىسقان وبلىستىق پوليتسيا دەپارتامەنتى جەرگىلىكتى پوليتسيا قىزمەتى باسشىسىنىڭ ورىنباسارى نۇرجان ماحمۋتوۆتىڭ سوزىنشە, پوليتسەيلەر ءاردايىم قايىرىمدىلىق شارالاردىڭ باسى-قاسىندا جۇرۋگە دايىن. اسىرەسە ايازدى كۇنى كوشە كەزىپ, توڭىپ جۇرگەندەرگە قايىرىمدىلىق كورسەتۋ شاراسىنا ءتارتىپ ساقشىلارى دا تارتىلادى. سونىمەن قاتار, قۇجاتتارىن رەتتەگىسى كەلەتىندەرگە مىندەتتى تۇردە كومەك كورسەتىلەدى.
ال ءۇيسىز جۇرگەن جاندار بۇدان بىلاي ءار اپتانىڭ سەنبىسىندە كۇندىزگى ساعات 12:00-دە اقتاۋ قالاسى 1 ش/ا ورنالاسقان ەسكى عيمارات جانىنداعى تەگىن ىستىق تاماق, ءشاي, سالات جانە تاتتىلەرمەن قامتىلاتىن بولادى.
