«عىلىمي قىزمەتتىڭ نەگىزگى ناتيجەلەرىن جاريالاۋ ءۇشىن ءبىلىم جانە عىلىم سالاسىنداعى باقىلاۋ كوميتەتى ۇسىنعان عىلىمي باسىلىمداردىڭ تىزبەسىنە كىرەتىن جۋرنالدارعا قويىلاتىن تالاپتاردى وزگەرتۋ بولىگىندە قر ءبىلىم جانە عىلىم مينيسترلىگىنىڭ №20 بۇيرىعىنا وزگەرىستەر ەنگىزۋ تۋرالى بۇيرىق جوباسى ازىرلەنىپ, شەشىم قابىلداندى», - دەپ جازدى اسحات ايماعامبەتوۆ Facebook پاراقشاسىندا.
ءمينيستردىڭ ايتۋىنشا, بۇگىندە وعان كونتەنتتىڭ جوعارى ساپاسىن ءاردايىم قامتاماسىز ەتە المايتىن بەلگىلى ءبىر ولشەمدەر بويىنشا ىرىكتەلگەن 177 وتاندىق باسىلىم كىرەدى. وسىعان بايلانىستى, مينيسترلىك Scopus جانە Web of Science سياقتى دەرەكتەر قورىنىڭ تالاپتارىنا سايكەس وسى جۋرنالدارعا قويىلاتىن تالاپتاردى بەيىمدەۋ بويىنشا جۇمىستى باستادى.
«قوسارلانعان جاسىرىن رەتسەنزيالاۋ, انىق رەداكتسيالىق ساياسات, قابىلدانعان ماقالالاردىڭ جۋرنالدىڭ تاقىرىپتىق باعىتىنا سايكەستىگى, شەتەلدىك رەتسەنزەنتتەر, بارلىق جاريالاۋ ءۇردىسىنىڭ ترانسپارەنتتىلىگى, كۇشتى رەداكتسيالىق القا, اۆتورلىق قۇقىقتى قورعاۋ جانە تاعى باسقا تالاپتار 1-1,5 جىل ىشىندە كەزەڭ-كەزەڭمەن وسى تىزبەگە كىرەتىن بارلىق وتاندىق عىلىمي جۋرنالدارعا قولدانىلادى», دەلىنگەن جازبادا.
ءمينيستردىڭ مالىمەتىنە سۇيەنسەك, باسىلىمداردىڭ سانى قىسقارادى دەپ كۇتىلۋدە. بۇل جاعدايدا
ساپالى كونتەنت ءۇشىن باسەكەلەستىك ارتادى جانە حالىقارالىق دەڭگەيدەگى عىلىمي باسىلىمداردى شىعارۋدىڭ كاسىبي اكادەميالىق مادەنيەتى قالىپتاسادى.
