قىزىلوردا: كاسىپكەرلەر ءوتىنىشى ەسكەرىلەدى

ايماقتار • 24 قاڭتار، 2020

قىزىلوردا: كاسىپكەرلەر ءوتىنىشى ەسكەرىلەدى

قىزىلوردا وبلىسىنىڭ كاسىپكەرلەر پالاتاسى وكىلدەرى وبلىس كاسىپكەرلەرىمەن كەزدەسۋىن جالعاستىرۋدا. بۇل تۋرالى پالاتانىڭ ءباسپاسوز قىزمەتى حابارلادى.

مۇرات جەتپىسباەۆ

سىرداريا اۋدانى بەسارىق اۋىلىنداعى «اباي-داۋلەت» سەرىكتەستىگىندە مال شارۋاشىلىعىمەن اينالىساتىن كاسىپ يەلەرىمەن، شاعان اۋىلىنداعى «كەرۋەن» جول بويى كەشەنىندە قىزمەت كورسەتۋ سالاسىنداعى ىسكەرلەرمەن كەزدەسۋ ءوتتى. وعان پالاتا ديرەكتورىنىڭ ورىنباسارى پىرمۇحاممەد سىزدىقوۆ، كاسىپكەرلەردىڭ قۇقىعىن قورعاۋ كەڭەسىنىڭ توراعاسى بولات نۇرحوجاەۆ جانە اۋداندىق فيليال ديرەكتورى ەرلان ابدىكەروۆ قاتىستى.

كەزدەسۋدە كاسىپ يەلەرى نەسيە بەرەتىن قارجى ۇيىمدارىنىڭ، باعالاۋشىلاردىڭ كەپىلگە قوياتىن م ۇلىكتەرىن تومەن باعالايتىندىقتارىن ايتتى. سول ءۇشىن دە اينالىم ءۇشىن قاجەتتى اقشانى كوبىنە شاعىن قارجى ۇيىمدارى ارقىلى راسىمدەيدى. ال ونىڭ پايىزى وتە جوعارى بولىپ وتىر.

بۇل ماسەلەگە قاتىستى كاسىپكەرلەر پالاتاسى ديرەكتورىنىڭ ورىنباسارى پىرمۇحاممەد سىزدىقوۆ اۋىل شارۋاشىلىعى سالاسىنداعى مەملەكەتتىك باعدارلامالاردى ءتۇسىندىرىپ، ءتيىمدى تۇستارىنا توقتالىپ ءوتتى.

جول بويى كەشەنىن قولعا العان كاسىپكەرلەر ينتەرنەت جەلىسىنىڭ ويداعىداي جۇمىس ىستەمەيتىندىگىن باستى ماسەلە رەتىندە اتادى.

توعىز جولدىڭ تورابىندا ورنالاسقان ءبىزدىڭ كەشەنگە كەلۋشىلەر كوپ.

ولاردىڭ اراسىندا شەتەلدىكتەر دە بار. الايدا ولاردىڭ ءبىرىنشى سۇرايتىن قاجەتتىلىگى – ينتەرنەت. «قازاقتەلەكوم» ارقىلى قوستىرعانىمىزبەن ساپاسى سىن كوتەرمەي تۇر، 5-6 ادام قاتار قوسىلعاندا مۇلدەم تارتپاي قالادى، دەيدى كاسىپ يەسى گۇلميرا مەدەۋوۆا.

مۇنان وزگە، كەزدەسۋدە جول بويى كەشەندەرىنە بانكومات ورناتۋ، تۇتىناتىن سۋ باعاسىنىڭ قىمباتتىعى، سالىق ورگاندارى ماماندارىنىڭ ءجونسىز تالاپتارى جايلى ايتىلدى. ءار ساۋالعا قاتىستى ماماندار تۇسىندىرمە جۇرگىزىپ، ماسەلەلەردى ءتيىستى ورگاندارمەن بىرگە شەشەتىندىكتەرىن جەتكىزدى.

بۇگىندە سىرداريا اۋدانىندا 2081 كاسىپكەر بار. وتكەن جىلى پالاتاعا ولاردان قۇقىعىن قورعاۋدى سۇراعان 10 ءوتىنىش ءتۇسىپ، ونىڭ 5-ەۋى وڭ شەشىلگەن. قالعاندارى بويىنشا تۇسىندىرمە جۇمىستارى جۇرگىزىلگەن. كاسىپكەرلىككە قاتىستى 560 ازاماتقا كەڭەس بەرىلگەن. «باستاۋ» بيزنەس جوباسى بويىنشا 230 ازامات وقىپ، ولاردىڭ 132-ءسى 100-دەن 200 ايلىق ەسەپتىك كورسەتكىشكە دەيىن مەملەكەتتىك باعدارلاما اياسىندا قايتارىمسىز قارجى الدى.

اۋداندىق فيليال ديرەكتورىنىڭ ايتۋىنشا، قازىردىڭ وزىندە «باستاۋدى» وقۋعا نيەتتى ازاماتتار كوپتەپ ءوتىنىش بىلدىرۋدە. جىل باسىنان بەرى 100-گە جۋىق اۋدان تۇرعىنى تىركەلگەن.