زيالى قاۋىم وكىلدەرى جيىلعان شارادا وبلىس اكىمىنىڭ ورىنباسارى ناۋرىزباي بايقاداموۆ ۇلت رۋحانياتىنىڭ بەسىگى سانالاتىن وڭىردەگى بۇل باستاما وزگە ايماقتار ءۇشىن ۇلگى بولاتىنىن اتاپ ءوتتى.
– بۇگىن قولىمىزعا تيگەلى وتىرعان ءۇش كىتاپ تا كوپ ىزدەنىس پەن ەڭبەكتىڭ ارقاسىندا جارىق كورىپ وتىرعان قۇندى دۇنيەلەر. «رۋحاني جاڭعىرۋ» باعدارلاماسى شەڭبەرىندە باسپا ءجۇزىن كورگەن بۇل تۋىندىلار وتكەنىمىزدى تانىماققا تالاپ قىلعان وقىرماننىڭ تانىمىن بايىتارى انىق, – دەدى ناۋرىزباي سەيىتقالي ۇلى.
وبلىستىق مادەنيەت, ارحيۆتەر جانە قۇجاتتاما باسقارماسى ازىرلەگەن «قاسيەتتى قازاقستان» ەنتسيكلوپەدياسىنىڭ ءۇشىنشى تومىنا سىر وڭىرىندەگى ساق, وعىز, قاڭلى تايپالارى, قىپشاق مەملەكەتى تۇسىنداعى ستراتەگيالىق ماڭىزدى قالالار مەن ساۋلەت ونەرى ەسكەرتكىشتەرى تۋرالى دەرەكتەر توپتاستىرىلعان. كىتاپقا جالپىۇلتتىق جانە وڭىرلىك ءمانى بار 84 نىسان ەنىپ وتىر.
ال «الاشتىڭ اسىل مۇراسى» جيناعىنا سىر سۇلەيى تۇرماعامبەت ىزتىلەۋ ۇلىنىڭ ەل اراسىنان جيناعان ءتۇرلى ادەبيەت ۇلگىلەرى, كونە اراب الىپبيىندە حاتقا تۇسىرگەن شىعارمالارى جانە الاش قايراتكەرلەرىنىڭ XX عاسىر باسىنداعى تۋىندىلارى توپتاستىرىلعان. كىتاپتى قۇراستىرعان بەلگىلى تۇركىتانۋشى عالىم, فيلولوگيا عىلىمدارىنىڭ كانديداتى سەرىكباي قوسان.
«سىر بويىنىڭ ساكرالدى ەسكەرتكىشتەرى: ميفتەر, اڭىزدار, حيكايالار» جيناعى ەلباسىنىڭ «بولاشاققا باعدار: رۋحاني جاڭعىرۋ» اتتى ستراتەگيالىق ماقالاسىنداعى «قازاقستاننىڭ كيەلى جەرلەرىنىڭ گەوگرافياسى» ارناۋلى جوباسى اياسىندا ازىرلەنگەن. ءار كەزەڭ مەن ءتۇرلى تاقىرىپتاعى فولكلورلىق مۇرالاردى ءبىر ارناعا توعىستىرعان قۇندى جيناققا بىلتىر «سىر مەديا» جشس باس ديرەكتورى امانجول وڭعارباەۆتىڭ باستاماسىمەن ۇيىمداستىرىلعان ەتنو-فولكلورلىق جانە ارحەوگرافيالىق ەكسپەديتسيا ماتەريالدارى پايدالانىلعان. بۇل باستاماعا تاريح عىلىمدارىنىڭ كانديداتى نۇرلىبەك مىڭجاس باسقاراتىن وبلىستىق «رۋحاني جاڭعىرۋ» ورتالىعىنىڭ ماماندارى دا ۇلكەن ۇلەس قوسقانىن ايتا كەتەيىك. جەرگىلىكتى ولكەتانۋشىلار مالىمەتتەرى, وبلىستىق جانە اۋداندىق مۋزەيلەر مەن ارحيۆ دەرەكتەرى, الماتى, تاشكەنت قالالارىنداعى سيرەك قورلار ماتەريالدارى, تاريحي فوتوسۋرەتتەر توپتاستىرىلعان كىتاپقا وتكەن عاسىر باسىندا جارىق كورگەن ي.كاستانەنىڭ, ورتا عاسىر ويشىلى جامال قارشيدىڭ, حيۋا تاريحشىسى ابىلعازى ءباحادۇر حاننىڭ ەڭبەكتەرىنەن سىر بويى ەسكەرتكىشتەرى مەن كونە قالالارعا قاتىستى ماتەريالدار ماتىندەرى ەنىپ وتىر.
تۇساۋكەسەر راسىمىندە فيلوسوفيا عىلىمدارىنىڭ دوكتورى بايمىرزا قوجامبەرليەۆ, جازۋشى سايلاۋباي جۇباتىر ۇلى, تۇرماعامبەت شايىردىڭ نەمەرەسى شالقىما ابدىراۋىقوۆا ءسوز الىپ, ايماقتىڭ مادەني ومىرىندەگى ايتۋلى جاڭالىققا تىلەكتەستىكتەرىن ءبىلدىردى.
قىزىلوردا
