قوعام • 23 قاڭتار، 2020

وسىمدىك شارۋاشىلىعىنا ەرىكتى ساقتاندىرۋ ەنگىزىلدى

30 رەتكورسەتىلدى

بيىل اگروونەركاسىپ كەشەنىندە ەرىكتى ساقتاندىرۋ تۋرالى نورما ىسكە اسىرىلا باستادى. اۋىل شارۋاشىلىعىن قارجىلاي قولداۋ قورى ونىڭ وپەراتورى رەتىندە قوسىمشا قىزمەت اتقارادى.

2004 جىلدان بەرى وسىمدىك شارۋاشىلىعىندا مىندەتتى ساقتاندىرۋ جۇيەسى جۇمىس ىستەپ كەلگەن بولاتىن. ءداندى، مايلى داقىلداردى، قانت قىزىلشاسىن جانە ماقتا وندىرۋشىلەر ەگىستىكتەردى بەلگىلەنگەن ساقتاندىرۋ تاريفتەرى مەن شىعىن نورماتيۆتەرى بويىنشا ساقتاندىرۋعا مىندەتتى بولىپ كەلگەن ەدى.

ساقتاندىرۋ كومپانيالارى مەن ءوزارا ساقتاندىرۋ قوعامدارى اگەنت ارقىلى ساقتاندىرۋ تولەمدەرىنىڭ ءبىر بولىگىن وتەۋ تۇرىندە مەملەكەتتىك قولداۋعا يە بولىپ كەلگەن بولاتىن.

بۇل جۇيەنىڭ تيىمسىزدىگىنە بايلانىستى پارلامەنت ءماجىلىسىنىڭ دەپۋتاتتارى «وسىمدىك شارۋاشىلىعىنداعى مىندەتتى ساقتاندىرۋ تۋرالى» زاڭنىڭ كۇشىن جويۋعا جانە «اگروونەركاسىپتىك كەشەندى جانە اۋىلدىق اۋماقتاردى دامىتۋدى مەملەكەتتىك رەتتەۋ تۋرالى» زاڭدى ساقتاندىرۋ ماسەلەلەرىنە قاتىستى نورمالارمەن تولىقتىرىپ، زاڭناماعا تۇزەتۋلەر ەنگىزۋ باستاماسىن كوتەردى. 2019 جىلدىڭ 28 قازانىندا ءتيىستى زاڭعا مەملەكەت باسشىسى قول قويدى.

قازىرگى ۋاقىتتا اگروونەركاسىپ كەشەنىندەگى بارلىق تاۋەكەلدەردى ساقتاندىرۋدى، ساقتاندىرۋ سىياقىلارىن سۋبسيديالاۋدى جانە تسيفرلىق تەحنولوگيالاردى قولدانۋدى قاراستىراتىن ەرىكتى اگروساقتاندىرۋ جۇيەسى جۇمىس ىستەي باستادى.

بۇل وزگەرىستەر ءتيىمدى جۇيەنى قۇرۋعا مۇمكىندىك بەرەدى. ونىڭ نەگىزگى ماقساتى ءوندىرىستى تاۋەكەلدەردەن قورعاۋ ارقىلى سالانى قارجىلاندىرۋدىڭ قولجەتىمدىلىگىن ارتتىرۋ.

ايتا كەتۋ كەرەك، «وسىمدىك شارۋاشىلىعىنداعى مىندەتتى ساقتاندىرۋ تۋرالى» زاڭنىڭ نورمالارى ءتيىستى مىندەتتەمەلەر ورىندالعانعا دەيىن قولدانىلادى.

2019 جىلى اۋىل شارۋاشىلىعىن قارجىلاي قولداۋ قورى توعىز كومپانياعا جالپى سوماسى 150 ملن تەڭگە بولاتىن ساقتاندىرۋ تولەمدەرىنىڭ ءبىر بولىگىن قايتاردى.

سوڭعى جاڭالىقتار

باسىلىم باسشىلارى - ەركىن قىدىر (1962)

باسىلىم باسشىلارى • كەشە

ۇقساس جاڭالىقتار