«استانا»
ەلىمىزدىڭ التى دۇركىن چەمپيوندارى جىلدى باس باپكەر اۋىستىرۋمەن باستادى. كوماندانى بۇعان دەيىن جاتتىقتىرىپ كەلگەن ۋكراينالىق رومان گريگورچۋك «استانامەن» كەلىسىمشارتىن ءۇزدى. ال كلۋب تىزگىنىن قازاقستان ۇلتتىق قۇراماسىنىڭ باس باپكەرى ميحال بيلەك ۇستادى. ەندى بيلەك ۇلتتىق قۇراما مەن «استانادا» «بيلىك» جۇرگىزەتىن بولادى. جاڭا باس باپكەرمەن «استانا» ءبىرىنشى وقۋ-جاتتىعۋ جيىنىن 15 قاڭتاردا پورتۋگاليادا باستاپ كەتتى. 10 اقپانعا دەيىن ەۋروپادا جاتتىعىپ, حالىقارالىق «اتلانتيك كاپ» تۋرنيرىنە قاتىسادى. سونداي-اق 25 قاڭتاردا اعىلشىننىڭ «برەنتفورد» كومانداسىمەن جولداستىق كەزدەسۋ وتكىزەدى.
ازىرشە ەلوردا كلۋبى قۇرامىن كۇشەيتۋگە اسىعار ەمەس. ەسەسىنە كەلىسىمشارتى اياقتالعان بىرنەشە فۋتبولشى كوماندادان كەتتى. اتاپ ايتار بولساق, ولار: قاقپاشى الەكساندر موكين, جارتىلاي قورعاۋشىلار سەرىكجان مۇجىقوۆ, رومان مۇرتازاەۆ جانە شابۋىلشى سەرگەي حيجنيچەنكو. قازىردە 4 فۋتبولشىنىڭ جالپى ترانسفەر قۇنى 4 ملن ەۋرو شاماسىندا. «استانا» بۇل ويىنشىلاردى تەگىن جىبەرگەن سوڭ, كلۋب بيۋدجەتى وسىنشا سومادا شىعىنعا باتتى. ال وتكەن ماۋسىمدا «ورداباسىدا» جالدا ويناعان قاقپاشى دميترو نەپوگودوۆ, قورعاۋشىلار سەرگەي مالىي, مارات بىستروۆ جانە شابۋىلشى الەكسەي ششەتكين كومانداعا ورالسا, يۆان ماەۆسكيمەن كەلىسىمشارتىن ۇزارتتى.
«قايرات»
وڭتۇستىك استانانىڭ كومانداسى ماۋسىمعا دايىندىعىن 3 قاڭتاردا الماتىداعى جاتتىعۋ بازاسىندا باستاپ, 17 قاڭتاردا ەكىنشى جيىنىن وتكىزۋ ءۇشىن تۇركياعا اتتانىپ كەتتى. بۇل جاقتا «سارى-قارالاردىڭ» پولشانىڭ «لەگيا», كيەۆتىڭ «دينامو» جانە بولگاريانىڭ «لۋدوگورەتس» كلۋبتارىمەن جولداستىق ماتچتارى جوسپارلانعان.
«قايرات» كلۋبى دا قۇرامىن كۇشەيتۋگە اسىعار ەمەس. ازىرشە كومانداعا بىلتىر «جەتىسۋ» ساپىندا ءتاۋىر ويىن كورسەتكەن ارمەنيالىق كامو وگانەسيان عانا قوسىلدى. سونداي-اق وتكەن جىلدىڭ سوڭىندا ادەرينسولا ەسەولا, ايبول ابىكەن جانە سەرگەي كەيلەرمەن كەلىسىمشارتىن ۇزارتتى. ال ماۋسىمارالىق ۇزىلىستە كوماندادان گەورگي جۋكوۆ, يسلامبەك قۋات, سەرگەي پوليتەۆيچ, ەلدوس احمەتوۆ, مارتون ەپپەل مەن حان چجون ۆۋ جانە باۋىرجان يسلامحان كەتتى. جۋكوۆ پولشانىڭ «ۆيسلا» كومانداسىنا, قۋات رەسەيدىڭ «ورەنبۋرگ», ال يسلامحان سانكت-پەتەربۋرگتىڭ «زەنيت» ساپىنا اۋىستى.
«ورداباسى»
بىلتىرعى چەمپيوناتتى قولا جۇلدەمەن اياقتاعان شىمكەنتتىڭ «ورداباسى» كلۋبى دا الداعى ماۋسىمعا دايىندىعىن جەرگىلىكتى «بيىك» سپورت كەشەنىندە وتكىزىپ جاتىر. ال 23 قاڭتاردا تۇركيادا وقۋ-جاتتىعۋ جيىنى جوسپارلانعان. قازىردىڭ وزىندە «ورداباسى» نەگىزگى قۇرامنىڭ بىرنەشە ويىنشىسىمەن قوشتاستى.
جوعارىدا اتاپ وتكەندەي, نەپوگودوۆ, مالىي, بىستروۆ جانە ششەتكين «استانامەن» پورتۋگاليادا ءجۇر. بىلتىردان باستاپ ۇلتتىق قۇراماعا شاقىرتۋ العان تەمىرلان ەرلانوۆ بيىل «توبىلدىڭ» نامىسىن قورعايدى. وتكەن ماۋسىمدا كوماندانى ورگە سۇيرەگەن لەگيونەرلەر جواو پاۋلو, ماي ماحلانگۋ, ميرزاد مەحانوۆيچ, زيگي باديبانگالاردىڭ كلۋبتا قالۋ-قالماۋلارى دا بەلگىسىز بولىپ تۇر.
«توبىل»
قوستانايدىڭ كومانداسى بيىلعى قپل كوماندالارىنىڭ اراسىندا قازىرشە ەڭ بەلسەندىسى. ماۋسىمارالىق ۇزىلىستە كلۋب 2018 جىلى قازاقستانداعى ەڭ ۇزدىك جاتتىقتىرۋشى اتانعان گريگوري بابايانعا كوماندا تىزگىنىن ۇستاتتى. فۋتبولدان جىلعا جۋىق قول ءۇزىپ قالعان بابايان جۇمىسىنا بىردەن بىلەك سىبانا كىرىسىپ, كلۋبتى كۇشەيتە باستادى.
بىلتىر «قايسار» ساپىندا ويناعان قورعاۋشى الەكساندر ماروچكين, «شاحتەردىڭ» ۇزدىكتەرى سانالعان قاقپاشى يگور شاتسكي مەن شابۋىلشى ورالحان ومىرتاەۆ جانە «ورداباسى» قورعاۋشىسى تەمىرلان ەرلانوۆ ەندىگى ماۋسىمدى «توبىلدا» وتكىزەدى. سونىمەن قاتار «Ertis» ويىنشىسى ساعادات تۇرسىنباي ءبىر جىل جالدا وينايتىن بولادى. ال كوماندا كاپيتانى ازات نۇرعاليەۆ پەن قاقپاشى سۇلتان بۋسۋرمانوۆ كلۋبپەن كەلىسىمشارتىن ۇزارتتى. ەسەسىنە «توبىلدان» قاقپاشى جاسۋر نارزىقۇلوۆ, قورعاۋشى ۆيكتور دميترەنكو مەن شابۋىلشى باۋىرجان تۇرىسبەك كەتتى.
قازىرگى تاڭدا «توبىل» بىرىككەن اراب امىرلىكتەرىندە جاڭا ماۋسىمعا دايىندىعىن پىسىقتاپ جاتىر. ءبىر ايتا كەتەرلىگى, ەگەر «استانا» مەن «قايرات» كلۋبتارى ترانسفەردە بەلسەندىلىك تانىتىپ, قۇرامىن كۇشەيتپەسە, «توبىل» وسى قارقىنىمەن بيىل ەل چەمپيوندىعىنا تالاسۋى ابدەن مۇمكىن.
«قايسار»
2019 جىلعى قازاقستان كۋبوگىنىڭ يەگەرى قازاقستاندىق كوماندالار اراسىنان العاشقىلاردىڭ ءبىرى بولىپ جاڭا ماۋسىمعا دايىندىقتارىن باستادى. قازىر «قاسقىرلار» تۇركيانىڭ انتاليا قالاسىندا جاتتىعىپ جاتىر. 23 قاڭتاردا ەكى جولداستىق ويىن جوسپارلانعان.
كوماندا بيىل ەۋروپا ليگاسىنا قاتىساتىن بولسا دا, قۇرامىن ءالى كۇشەيتەر ەمەس. ءيا, ەلدوس احمەتوۆ, باعدات قايىروۆ, ەلۆين فورتەس, قۋانىش قالمۇراتوۆ, ريزۆان ابليتاروۆ جانە ەلگۋدجەي لوبجانيدزە «قايسار» ساپىن تولىقتىرعانىمەن, ولاردى جوعارى دەڭگەيدەگى فۋتبولشىلار دەپ ايتا المايمىز. ال تيگران بارسەگياننىڭ كەتۋى كوماندانى السىرەتۋى ىقتيمال. ەگەر قىزىلوردالىقتار قىسقى ترانسفەردە قۇرامىن كۇشەيتپەسە, بيىل جۇلدەلى ورىننان دا, ەۋروكۋبوك باسەكەلەرىنەن دە ءۇمىتىن ۇزە بەرسە بولادى دەپ توپشىلايمىز.
«شاحتەر»
بيىل قۇرامىن كۇشەيتىپ, چەمپيوندىق ءۇشىن تالاسۋى ءتيىس بولعان كەنشىلەر ءوڭىرىنىڭ كومانداسى العا جىلجۋدىڭ ورنىنا, قۇلدىراپ بارا جاتقان سىڭايلى. سەبەبى «شاحتەر» تۇركياداعى وقۋ-جاتتىعۋ جيىنىنا كلۋب تاربيەلەنۋشىلەرى مەن بىلتىر ءبىرىنشى ليگادا دوپ تەپكەن تيمۋربەك زاكيروۆ, كارام سۇلتانوۆ, پاۆەل كريۆەنتسەۆ, ءادي ادامباەۆ سەكىلدى ەسىمدەرى جانكۇيەرلەرگە اسا تانىس ەمەس بىرنەشە ويىنشىنى قارالىمعا الدى.
كلۋبقا جاڭادان تاعايىندالعان باسشى ەرلان ورازوۆ بۇل فۋتبولشىلارمەن قانداي جەتىستىككە جەتۋدى كوزدەپ وتىرعانىن بولجاۋ قيىن. ايتپاقشى, بىلتىر كوماندانى باپتاعان بولگاريالىق مامان نيكولاي كوستوۆتىڭ ورنىنا بيىل وتانداسى ۆياچەسلاۆ گروزنىي كەلدى.
«جەتىسۋ», «Ertis», «وقجەتپەس»
اتالعان ءۇش كوماندا دا تۇركيا جەرىندە الداعى ماۋسىمعا دايىندىقتارىن پىسىقتاپ جاتىر. «جەتىسۋدا» قازىر ايتارلىقتاي وزگەرىس جوق. بىلتىرعى قۇراممەن جاڭا ماۋسىمعا دايىندالۋدا.
سونداي-اق «وقجەتپەس» كلۋبىندا دا اسا قاتتى وزگەرىس جوق. كوماندا تۇركياعا كلۋبتىڭ 8 تاربيەلەنۋشىسىن الىپ كەتكەن. بىلتىر شاعىن بيۋدجەتپەن كوماندانى 7-ورىنعا دەيىن جەتكىزگەن باس باپكەرى اندرەي كارپوۆيچ بيىل دا كلۋبتى جاتتىقتىراتىن بولدى.
ال پاۆلوداردىڭ «Ertis» كلۋبى قۇرامىن بەلورۋسيالىق قاقپاشى سەرگەي چەرنيك, گرۋزيالىق شابۋىلشى لەۆان كۋتاليا, ارگەنتينالىق جارتىلاي قورعاۋشى پابلو حواكين مەن چەرنوگوريالىق بويان سانكوۆي جانە سەربيالىق قورعاۋشى ماركو توميچەممەن كۇشەيتتى. بۇل فۋتبولشىلار «Ertis» ءۇشىن قانشالىقتى پايدالى ويىنشى ەكەنىن الداعى ۋاقىتتا بىلەتىن بولامىز.
«تاراز», «قىزىلجار», «كاسپي»
وتكەن ماۋسىمدا پرەمەر-ليگادا جان ساقتاپ قالۋ ءۇشىن ەلەكتىك ويىن وتكىزىپ, جەڭىسكە جەتكەن «تاراز» قازىر قازاقستاندا جاتتىعۋ جيىنىن وتكىزىپ جاتىر. كلۋب ءباسپاسوز قىزمەتىنىڭ حابارلاۋىنشا, كوماندا بيىل جەرگىلىكتى فۋتبولشىلار مەن جاس ويىنشىلارعا ءۇمىت ارتپاق. ەگەر ءدال سولاي بولاتىن بولسا, كەلەسى جىلى «تارازدى» ءبىرىنشى ليگادان كورۋىمىز ابدەن مۇمكىن. دەسە دە كومانداعا جاڭادان تاعايىندالعان باس باپكەر ۆلاديمير نيكيتەنكوعا باسشىلىق كلۋبتى پرەمەر-ليگادا الىپ قالۋ مىندەتىن جۇكتەدى.
«قىزىلجاردى» ءبىرىنشى ليگادان جوعارى ليگاعا شىعارعان باس باپكەر ءالي اليەۆ قىزمەتىنەن كەتتى. ونىڭ ورنىنا مولدوۆالىق مامان ۆياچەسلاۆ رۋسناك كەلدى. كوماندا قازىر تۇركيادا جاتتىعىپ جاتىر.
سونداي-اق جوسپار بويىنشا التى جولداستىق كەزدەسۋ وتكىزەدى. ال قازىرشە كوماندادا ەشقانداي ترانسفەر جوق. سونداي-اق پرەمەر-ليگانى تولىقتىرعان اقتاۋدىڭ «كاسپي» كومانداسى 17 ويىنشىمەن تۇركيادا جاتتىعىپ جاتىر.
جوعارىداعى ءۇش كوماندانىڭ بىلتىرعى قۇرامىمەن قانداي «جەتىستىككە» جەتكەنىن بارشا جانكۇيەر جاقسى بىلەدى. كوماندا باسشىلىعى جەرگىلىكتى جانكۇيەرلەردى نەگە جاڭا ويىنشىلارمەن, كلۋبتىڭ جوعارى جەتىستىگىمەن قۋانتپايدى ەكەن؟ باسقا كلۋبتاردىڭ قالاي جۇمىس ىستەپ وتىرعانىن باسشىلىق ءبىلىپ, كورىپ وتىر عوي. الدە كلۋب باسشىلىعى «باستىسى جەڭىس ەمەس, باستىسى – قاتىسۋ» قاعيداسىن ۇستانا ما ەكەن؟!
بىزدىڭشە, كەڭىرەك كوسىلۋگە كوماندالاردىڭ بيۋدجەتى مۇمكىندىك بەرمەيتىن سەكىلدى.
