«جەدەل جاردەم» قىزمەتى جەتىلدىرىلەدى

مەديتسينا • 16 قاڭتار، 2020

«جەدەل جاردەم» قىزمەتى جەتىلدىرىلەدى

25 رەت كورسەتىلدى

«جەدەل جاردەم» قىزمەتىنە ادام جانى قىسىلعاندا جۇگىنەدى. دەر كەزىندە جاسالعان كومەك ارقىلى تالاي پەندەنىڭ تۇز-ءدامى تاۋسىلماي، عۇمىرلار جالعاندى. جۋىردا العاش رەت ەلوردادا جەدەل قىزمەت وكىلدەرىن وقىتىپ، ولارعا جاتتىقتىرۋشى كۋالىگىن بەرگەن بىرەگەي شارا ءوتتى.

انار تولەۋحانقىزى

ادام بالاسىنىڭ باسىنا تونەر قاۋىپتىڭ سانى كوپ. سونىڭ ءبىرى – اياق استىنان بولاتىن جاراقات تۇرلەرى. جوڭكىلىپ جاتقان كولىك قاقتىعىستارىندا، كۇندەلىكتى تۇرمىستا، قۇرىلىستا، وندىرىستە، ايتەۋىر ءار جەردە، ءتۇرلى سيپاتتا، ءتۇرلى دارەجەدە جاراقاتتانىپ، «جەدەل جاردەم» قىزمەتى شاقىرىلادى. مىنە، سونداي ساتتە جانىڭنان تابىلاتىن دارىگەر بىلىگىنە كوپ دۇنيە بايلانىستى. اۋرۋحاناعا جەتكىزىلمەستەن بۇرىن جاسالعان العاشقى كومەكتەن باستاپ، جولدا، كولىك ۇستىندە، ودان كلينيكاعا اپارعان كەزدەگى جاردەمنىڭ دەڭگەيى قانداي؟ ءارى ونى قالاي جاقسارتۋعا بولادى دەگەن وي جەتەگى تمد كولەمىندە العاش رەت حالىقارالىق ستاندارتقا جاۋاپ بەرەتىن PHTLS (Prehospital Trauma Life Support – جاراقات كەزىندە اۋرۋحاناعا دەيىنگى جەدەل جاردەم جاتتىقتىرۋشىلارىن) دايارلاۋ قاجەت دەگەن ماقساتقا الىپ كەلەدى. وسىلايشا ۇلتتىق شۇعىل مەديتسينالىق كومەكتىڭ ۇيلەستىرۋ ورتالىعى حالىقارالىق NAEMT (National Association of Emergency Medikal Technikans – جاراقاتتانۋ بويىنشا جەدەل جاردەم ماماندارىنىڭ ۇلتتىق اسسوتسياتسياسىنان) سەرتيفيكاتتاندىرىلعان جاتتىقتىرۋشىلاردى شاقىرتىپ، قازاقستاندىق العاشقى 10 جاتتىقتىرۋشىنى وقىتتى.

سەرتيفيكاتتى تابىستاۋ راسىمىندە سويلەگەن دەنساۋلىق ساقتاۋ ۆيتسە-ءمينيسترى ل.اقتاەۆا العاشقى نۇسقاۋشى-جاتتىقتىرۋشىلارعا: «سىزدەر العان سەرتيفيكاتتىڭ مەرزىمى 4 جىلعا بەلگىلەنگەن. جاتتىقتىرۋشىلىق – وزگەشە ابىرويلى مىندەت. وسى جىلدار ىشىندە الدىڭىزعا كەلگەن ماماندارمەن بىلگەندەرىڭىزبەن ءبولىسىپ، نۇسقاۋشى-جاتتىقتىرۋشى قىزمەتىن اتقارىپ، سىزدەر تاراتقان تاجىريبە ارقىلى تۇتاس ەل كولەمىندە حالىقارالىق ستاندارتقا جاۋاپ بەرەتىن جەدەل جاردەم قىزمەتىنىڭ جۇمىسى جۇرەدى. سوندىقتان مويىندارىڭىزدا جاۋاپتى دا، ابىرويلى مىندەت تۇر» دەدى.

ۇلتتىق شۇعىل مەديتسينالىق كومەكتىڭ ۇيلەستىرۋ ورتالىعىنداعى وقىتۋ ورتالىعىنىڭ جەتەكشىسى عۇمىربەك اعىباەۆتى سوزگە تارتقانىمىزدا ول العاشقى 10 نۇسقاۋشى-جاتتىقتىرۋشىنىڭ ارنايى وقىتىلۋىنىڭ ماڭىزىنا توقتالا كەلە: «جاسىراتىن جاي ەمەس، بۇگىندە ەلىمىز بويىنشا جول-كولىك وقيعالارىنان كوپتەگەن ادام زارداپ شەگىپ، تالاي جاس قىرشىنىنان قيىلىپ جاتادى. ال وقىپ شىققان ماماندار وسىنداي كەزدە كومەكتىڭ قانداي جاعدايدا، قاي ءتۇرى ءتيىمدى ەكەنىن پايىمداپ، ءبىرىنشى كەزەكتە نە اتقارىلۋى ءتيىس، اۋرۋحاناعا جەتۋ جولىندا قانداي كاسىبي جاردەم كورسەتىلەدى، سونىڭ ءبارىن ارنايى وقىتىپ ۇيرەتەتىن سەرتيفيكاتتى مامانداردىڭ الدىن كورىپ، بىلىمدەرىن جەتىلدىردى. ەندى ارقايسىسى ءوز وڭىرلەرىنە بارىپ، «جەدەل جاردەم» ماماندارىن جاراقاتتانۋ كەزىندە كورسەتىلەتىن كومەكتەر جۇيەسى بويىنشا وقىتادى، وسىلايشا ءوز ماماندارىمىزدىڭ تىزبەگى قالىپتاساتىن بولادى»، دەدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز