بۇل اۋىلدىڭ قاراعايى بولماعانمەن, قاراعايدان بيىك تۇلعالارى كوپ. ولەڭدىنىڭ قۇت-بەرەكەسىن قورىپ, ءار نارسەنىڭ ءجون-جوسىعىن سىلتەپ وتىراتىن كوپكە ەس قازىنالى قارتى – اڭساعان ءتورين اقساقال. اۋىلدىڭ اقىلمانى دا, باتاگوي قارياسى دا ءوزى. بۇگىندە جەتپىستى ەڭسەرىڭكىرەپ, سەكسەننىڭ سەڭگىرىنە بەت العان. بىراق ءالى تىڭ. قيمىلى – شيراق. ويى – سەرگەك. كوكىرەگى – كومبە, قولى التىن, ءىسى – ونەگە. ءبىر بويىندا بىرنەشە ونەر توعىسىپ جاتىر.
– بۇل اۋىلدىڭ ولەڭدى اتالۋى اۋىل ىرگەسىنە ءتيىپ جاتقان كولگە بايلانىستى. كولدى اينالا مالعا جۇعىمى مول ولەڭ ءشوپ وسەدى, – دەيدى قاريا.
وسى ولەڭدىدە الەمدە جوق كەرەمەت ءبىر مۋزەي بار ەكەنىن كىم بىلەدى ەكەن؟ ءاي, ەشكىم بىلمەيدى-اۋ. اڭساعان ءتوريننىڭ ۇيىنە باس سۇقساڭىز كادىمگى فاۋنا الەمىنىڭ عاجايىپ قۇشاعىنا سۇڭگىگەندەي بولاسىز. اڭساعان اتا ءۇيىنىڭ ۇلكەن ءبىر بولمەسىن بوساتىپ, مۋزەي جاساپ قويعان. ءىشى تولعان ناۋىرزىم قورىعىن مەكەندەيتىن اڭ-قۇس, جان-جانۋار, جاندىكتەردىڭ اعاش تامىرىنان قاشالعان ءمۇسىنى. كومپوزيتسيالىق مۇسىندەر دە بار. مۇنداي ءبىر مۇسىنگە بىرنەشە اڭ-قۇس بەينەسى قاشالعان. ۇستا ءار مۇسىنگە ارنايى اڭىز-وقيعا ويلاپ تاۋىپ, ونى ءبىر شۋماق ولەڭگە اينالدىرىپ, قاعازعا ءتۇسىرىپ, ءمۇسىننىڭ ءبىر شەتىنە قىستىرىپ قويىپتى.
– 1997 جىلى كەڭشار تاراپ, جۇمىسسىز قالدىق. بۇرىنعىداي ەمەس, بوس ۋاقىت كوبەيدى. بىردە قارسى بەت كوشەدەگى كورشىلەرىم تەلمان مەن تولەش تەرەزەلەرىنىڭ الدىنداعى تەرەكتەردى كەسىپ, تامىرىن تراكتورمەن سۋىرىپ الىپ, ءبىزدىڭ ءۇيدىڭ ارتىنا شىعارىپ تاستاپتى. بارىپ قاراپ تۇردىم. ءبىر ۋاقىتتا الگى تامىرلاردا ادەمى فيگۋرالار تۇرعانىن اڭعاردىم. جانىمدا اسلان دەگەن نەمەرەم بار. – ءاي, اسلان, ءۇيدىڭ جانىندا ساكىنىڭ ۇستىندە ارا تۇر, الىپ كەلشى, – دەپ جۇمساپ جىبەردىم. الگىنى قول ارامەن كەسىپ كورىپ ەدىم, بولمادى. ۇلكەن ارا كەرەك بولدى. ودان ۇلكەن ارانى العىزىپ, ءبىر جاعىن بالاعا ۇستاتىپ, ەكەۋلەپ ەكى-ءۇش ساعات دەگەندە كوزىمە تۇسكەن تامىردى كەسىپ الدىم. ۇيگە الىپ كەلىپ, جونىپ, ءاپ-ادەمى ءمۇسىن جاساپ شىعاردىم. وعان ەكىنشىسى قوسىلدى. وسىلايشا ەسەلەنە بەردى. ۇستالىق تا شىعارماشىلىق سياقتى. كوڭىلدىڭ كۇيىن قالايدى, – دەيدى اڭساعان اقساقال.
قۋ تامىردىڭ بويىنا قان جۇگىرتىپ, تىرشىلىك سىيلاپ, ءتىل بىتىرگەن اڭساعان ۇستانىڭ مۋزەيىندە بۇگىندە 200-دەن استام قولونەر تۋىندىسى بار.
اڭساعان اقساقال ەلدىڭ, جەردىڭ تاريحى, ودان قالدى اۋىل ءومىرى مەن ادامدار اراسىنداعى قارىم-قاتىناس, ادامگەرشىلىك قۇندىلىقتار سياقتى تاقىرىپتارعا اۋىق-اۋىق قالام تارتىپ, ولەڭ دە جازادى.
– ءبىر كۇنى امان دەگەن جولداسىم ءبىر كىشكەنتاي عانا كىتاپشا الىپ كەلىپتى. سىرتىندا «قويشىلار» دەگەن جازۋى بار. اۆتورى – ەركىن ءىبىتانوۆ. وقىپ كورىپ ەم, ەندى, ءسوز جوق, ولەڭدەرى تاماشا! قايتا-قايتا وقي بەرەمىن. ەركىن ولەڭدەرىنىڭ اسەرىمەن ءوزىم دە جانىمنان ولەڭ شىعارا باستادىم, – دەيدى ول.
بۇگىندە اڭساعان ءتوريننىڭ كولەمدى ءبىر كىتاپقا جۇك بولارلىق ولەڭى بار. اق قاعازعا مارجانداي ءتىزىپ سيامەن جازعان ولەڭدەرىنىڭ بارلىعىن قاريا اسا ۇقىپتىلىقپەن كادىمگى قالىڭ جۋرنال سياقتى ەتىپ تىگىپ, قاتتاپ قويعان. بۇل ولەڭدەردىڭ دەنى ەل مەن جەر تاعدىرى, ەل ادامدارىنىڭ مىنەز-بولمىسى, تۋعان جەر تابيعاتى, وسكەلەڭ ۇرپاققا ناسيحات, ت.ب. تاقىرىپتاردى قامتيدى.
نۇرقانات قۇلاباەۆ,
جۋرناليست
قوستاناي
