كەزدەسۋ بارىسىندا دەپۋتاتتار قازاقستان رەسپۋبليكاسىنىڭ ءبىلىم جانە عىلىم سالاسىن دامىتۋدىڭ 2020-2025 جىلدارعا ارنالعان جاڭا مەملەكەتتىك باعدارلاماسى تۋرالى حاباردار ەتتى. 2016-2019 جىلدارى پەداگوگ كادرلاردىڭ سانى جارتى ميلليون ادامنان اسقانى, ايتسە دە, ءبىلىم بەرۋ سالاسىنا جىل سايىن ماماندار دايارلانىپ جاتسا دا پەداگوگيكالىق كادرلارعا قاجەتتىلىك ءالى دە ساقتالىپ وتىرعانى اتاپ ءوتىلدى. اۋىلدىق جەرلەردەگى مەكتەپتەرگە بىلىكتى مۇعالىمدەردى تارتۋعا جانە الىپ قالۋعا بايلانىستى جول جانە تۇرعىن ءۇي سۋبسيديالارى, جەڭىلدىكتەر مەن پرەفەرەنتسيالار جانە تاعى باسقا پارمەندى تەتىكتەر بولماي وتىر. پەداگوگيكالىق كادرلاردى دايارلاۋ جانە دامىتۋ جۇيەسىندەگى وڭ وزگەرىستەرگە قاراماستان, بىلىكتى پەداگوگ كادرلاردى تارتۋعا جانە ورنىعىپ قالۋىنا تەرىس اسەر ەتەتىن بىرقاتار ماسەلەلەر ساقتالۋدا. سوندىقتان باعدارلامادا ەلىمىزدىڭ پەداگوگيكالىق الەۋەتىن دامىتۋ سالاسىنداعى پروبلەمالاردى شەشۋ بويىنشا شارالار قاراستىرىلعان.
سەناتورلار اقتوعاي اۋىلدىق وكرۋگىندە ورنالاسقان «اقتوعاي-اگرو» وندىرىستىك نىسانىندا دا بولدى. وسى كاسىپورىن باسشىلىعىمەن اڭگىمەلەسۋ بارىسىندا وسىمدىك شارۋاشىلىعى ونىمدەرى كولەمىن ۇلعايتۋ ماقساتىندا ساقتاۋ قويمالارىن سالۋدى جالعاستىرۋ جانە كاسىپورىندى دامىتۋدىڭ باسقا دا وزەكتى ماسەلەلەرى قوزعالدى.
سەناتورلار نىسانداردى ارالاپ شىققاننان كەيىن اقتوعاي اۋدانى اكىمدىگىندە اۋدان اكتيۆىمەن كەزدەستى.
جۇزدەسۋ بارىسىندا جاڭابەت اۋىلىنداعى دارىگەرلىك امبۋلاتوريانىڭ قۇرىلىسىنا, قوجامجار اۋىلدىق وكرۋگىندەگى تالينكا وزەنىنىڭ ارناسىن تازارتۋعا, اقجول اۋىلىنىڭ ىشىندەگى جولداردى اسفالتتاۋعا (5,6 كم), ۇيالى بايلانىستىڭ قولجەتىمدىلىگىن قامتاماسىز ەتۋگە, بارلىق ماۋسىمدا جۇمىس ىستەيتىن سۋ قۇبىرىن سالۋعا جانە وبلىستىق ماڭىزى بار جولبولدى-جالاۋلى (91-11كم) باعىتى بويىنشا جولدى اسفالتتاۋعا قاتىستى ماسەلەلەر قوزعالدى.
