تاعىلىمى مول ماقالا

رۋحانيات • 14 قاڭتار، 2020

تاعىلىمى مول ماقالا

101 رەت كورسەتىلدى

ءبىر عاسىر بۇرىن حالقىمىزعا ءجون سىلتەگەن ابايداي تۇلعانىڭ تاعىلىمى بۇگىن دە ماڭىزىن جويمادى. ونىڭ ءبىلىم مەن عىلىمعا شاقىرعان ولەڭدەرى مەن قارا سوزدەرىندە ۇلت بولمىسى ايقىن كورىنىس تابادى.

Egemen Qazaqstan

وسى ورايدا مەملەكەت باسشىسى «اباي جانە XXI عاسىرداعى قازاقستان» اتتى ماقالاسىندا اباي مۇراسىنىڭ ەلىمىزگە تيگىزەر پايداسى زور دەپ ەسەپتەيدى. پرەزيدەنت ابايدىڭ وي-تۇجىرىمدارىن نەگىزگە الا وتىرىپ مەملەكەتىمىزدى دامىتۋ كەرەك ەكەنىن ايتادى.

قاسىم-جومارت توقاەۆ ماقالادا ابايدىڭ كوپ ءتىل بىلگەنىن نەگىزدەي كەلە، بۇگىنگى ۇرپاققا شەت تىلدەردى ۇيرەنۋ كەرەكتىگىن ايتادى. دامىعان ەلدەردىڭ ءتىلى مەن مادەنيەتىن ءبىلۋ ءۇشىن، ونىڭ قىر-سىرىن ۇعىنۋ ءۇشىن ەڭ اۋەلى ونىڭ ءتىلىن مەڭگەرۋ كەرەك. الداعى ۋاقىتتا ابايدىڭ قارا سوزدەرى مەن شىعارمالارى ون شاقتى تىلگە ءتارجىمالاناتىنى ەرەكشە قۋانتتى. بۇل ارقىلى وزگە مەملەكەتتەر دە اباي مۇراسىمەن تانىسا الادى. شەتەلدىكتەر ءبىزدى ابايدىڭ ەلى دەپ تانىپ جاتسا نۇر ۇستىنە نۇر بولار ەدى. سوندىقتان ابايدىڭ تاعىلىمدارىن ءبىرىنشى ورىنعا قويۋ كەرەك. بۇل جايىندا قاسىم-جومارت توقاەۆ ماقالاسىندا بايىپتى سارالانعان. پرەزيدەنت ابايدىڭ حالقىنىڭ جەتىلگەنىن قالايتىندىعىن شىعارمالارىنان ۇزىندىلەر بەرە وتىرىپ، كەرەمەت مىسالدارمەن بايانداعان.

سونداي-اق ماقالادا اباي شىعارمالارى ارقىلى سانانى جاڭعىرتۋ كەرەكتىگى جازىلعان. ابايدى تەرەڭدەپ ءبىلۋ اسىرەسە جاستار ءۇشىن قاجەت ەكەنىن مەملەكەت باسشىسى استىن سىزىپ ايتىپتى. مەنىڭشە، بۇل – ناعىز باعدارلامالىق ماقالا. بۇل – ەلدى، جاستاردى تاربيەلەيتىن تاعىلىمدى ماقالا. ۇلگى بەرەتىن دۇنيە. تەرەڭ وي تۇر، تەرەڭ ىزدەنىستەرگە جول سىلتەيدى.

سونىمەن قاتار، ماقالادا مادەني شارالارعا دا ەرەكشە ءمان بەرىلەتىنى جازىلعان. الداعى ۋاقىتتا نەگىزگى وزەگى اباي تاقىرىبىنا ارنالاتىن رەسپۋبليكالىق جانە حالىقارالىق دەڭگەيدە تەاتر جانە مۋزىكا فەستيۆالدارى وتەدى. ودان بولەك، ابايدىڭ تۋعان جەرىندەگى تاريحي-مادەني نىساندار جاڭا تالاپقا ساي جاڭعىرتىلىپ، ۇلى اقىننىڭ مەرەيتويىنا كەلەتىن جۇرتشىلىققا قولايلى جاعداي جاسالاتىن بولادى.

ءادىل احمەتوۆ،

قوعام قايراتكەرى، فيلولوگيا عىلىمدارىنىڭ دوكتورى، پروفەسسور

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز