ايماقتار • 13 قاڭتار، 2020

ۇشاق اپاتىندا قازا تاپقان ازاماتتى اۋىلداستارى ەسكە الدى

1190 رەتكورسەتىلدى

وتكەن جىلدىڭ سوڭىندا قالىڭ قازاقتىڭ قابىرعاسىن قايىستىرعان وقيعا بولىپ، «Bek Air» كومپانياسىنىڭ ۇشاعى اپاتقا ۇشىراعانى بەلگىلى. اپات سالدارىنان 12 ادام قازا تاۋىپ، 47 ادام اۋىر جاعدايدا اۋرۋحاناعا جەتكىزىلگەن-ءدى. وسى ۇشاقتا قوستاناي وبلىسى جانگەلدين اۋدانى قىزبەل اۋىلىنىڭ تۋماسى اباي نۇربەكوۆتىڭ دە وتباسى بولدى. وكىنىشكە قاراي، وتاعاسى تۋعان كۇنىنە ءبىر اپتا قالعاندا ايتىپ كەلمەيتىن اپاتتان قازا تاپتى.  

كۇنى كەشە قىزبەل اۋىلىنىڭ ازاماتتارى باس قوسىپ، اپات كەزىندە قازا تاپقان اباي نۇربەكوۆكە قۇران باعىشتاپ، جەرلەستەرىن ەسكە الدى. بايگەرەي بالعا ۇلى باستاعان جەرگىلىكتى جىگىتتەر ارقالىق قالاسىندا ارنايى اس بەردى. مۇنداعى ماقسات – ءبۇتىن ءبىر اۋلەتتىڭ ارىستاي ازاماتى توتەننەن كەلگەن اپاتتا قازا تاپقاندا ەل بولىپ بىرگە ەكەندىگىن جەتكىزۋ، ءبىر-بىرىنە جان جىلۋىن سىيلاۋ. بۇل ءىس – قايعىنى بولىسسەڭ ازايادى دەيتىن قازاقتىڭ تاعىلىمدى تۇرمىسىن اڭعارتسا كەرەك. سوندىقتان بولار، جينالعان ادام سانى كوپ بولدى. اۋىل، اۋدان اكىمدەرى باستاعان توپ بوي كورسەتتى. ارقالىق قالالىق كەڭەسىنىڭ توراعاسى جانىبەك عاپباس ۇلىنىڭ ءسوزى كوپشىلىكتى ويلاندىردى.

دۇعا

– ەل اراسىندا «باسى اۋىرماعاننىڭ قۇدايمەن ءىسى جوق» دەگەن ءسوز بار. مۇنى ايتىپ وتىرعان سەبەبىم، بۇل جولعى قازا – جاراتۋشى يەنى ەسىمىزگە سالىپ، تاۋبەگە كەل دەگەندى ءبىلدىرىپ وتىر. اۋىر قازا. دەگەنمەن ازاماتتىڭ ارتىندا ءىزىن جالعايتىن 4 بالاسى مەن جارى قالدى، - دەدى اقساقال.

سوڭعى جىلدارى الماتىداعى «الماتىەلەكترومونتاج» كومپانياسىندا تەحنيكالىق ديرەكتور قىزمەتىن اتقارىپ جۇرگەن اباي جاڭا جىلدى اۋىلداعى وتباسىمەن بىرگە قارسى الۋدى ادەتكە اينالدىرعان ەكەن. كەزەكتى ساپارى وسىلايشا قايعىلى وقيعامەن اياقتالىپ وتىر.

مارقۇمنىڭ ءتورت بالاسى تاياۋدا اۋرۋحانادان شىقتى. جۇبايى ءالى دە ەمدەلۋدە.

اپاتتان زارداپ شەككەندەردىڭ جاقىندارىنا كوڭىل ايتىپ، قولداۋ ءبىلدىرىپ جاتقان جۇرتتا ەسەپ جوق.

ساكەن           

كوپتىڭ تىلەگى بىرەۋ – ەل امان، جۇرت تىنىش بولسا دەيدى. كەنەتتەن كەلەتىن كەسەلدەن ساق بولساق ەكەن دەپ وتىر. حالىق قايعىلى وقيعادان زارداپ شەككەندەردىڭ تەزىرەك وڭالىپ، قاتارعا قوسىلىپ كەتۋىن تىلەيدى.

سوڭعى جاڭالىقتار

ەرتەڭ قىزىلوردادا كۇن كۇرت ىسيدى

ايماقتار • بۇگىن، 17:22

اقمولادا 3 ادام سۋعا كەتتى

ايماقتار • بۇگىن، 13:42

ۇقساس جاڭالىقتار