قازىرگى تاڭدا قازاقستان ءوز ازاماتتارىن ۋاقىت تالابىنا ساي الەۋمەتتىك تۇرعىدا قولداۋدىڭ جاڭا باعىتتارىن قولعا الىپ, ونى جۇيەلى تۇردە ىسكە اسىرا باستادى. بۇل قادامدار قازاقستاندىق قوعام تاراپىنان كەڭىنەن قولداۋ تاۋىپ وتىر. ناقتىلاي ايتقاندا, جاستاردى جان-جاقتى قولداۋ, از قامتاماسىز ەتىلگەن وتباسىلار مەن كوپ بالالى شاڭىراقتاردى ماتەريالدىق جاعىنان كوتەرمەلەۋ جانە باسقا دا ساناتتاعى وتانداستارىمىزدى تولعاندىرىپ جۇرگەن ماسەلەلەردى وڭتايلى شەشۋ ماقساتىندا جۇزەگە اسىرىلىپ جاتقان شارالار كوڭىلگە قۋانىش ۇيالاتادى. اينالىپ كەلگەندە مۇنىڭ بارلىعى ەلىمىزدىڭ دەموگرافيالىق احۋالىن جاقسارتۋعا, ادام كاپيتالىن دامىتۋعا تىكەلەي اسەر ەتەتىن يگىلىكتەر.
ماسەلەن, مەن كوپ بالالى انا, «كۇمىس القا» يەگەرى رەتىندە ءوز مەملەكەتىمنىڭ قامقورلىعىن سەزىنىپ جۇرگەن جانداردىڭ ءبىرىمىن. مەن ءۇشىن ءبىرىنشى كەزەكتە ەلىمدەگى بەيبىت ءومىر, تىنىشتىق – باستى يگىلىك. سونداي-اق كوپ بالالى انا رەتىندە بىرقاتار مەملەكەتتىك قىزمەتتى تۇتىنۋدا جەڭىلدىكتەر الىپ وتىرمىن. بالامدى بالاباقشاعا ورنالاستىرۋدا, نۇر-سۇلتان قالاسىنداعى قوعامدىق كولىكتەردى پايدالانۋدا جانە مەملەكەتتىك مەكەمەلەردىڭ بىرقاتار قىزمەتىن قاجەتسىنگەن كەزدە, باسقا دا ماسەلەلەرىمدى شەشۋ بارىسىندا الگى جەڭىلدىكتەر الدىمنان شىعادى. وسى ارادا ەرەكشە توقتالا كەتەتىن جايت, الەۋمەتتىك از قامتىلعان وتباسىلار قاتارىنا جاتپاسا دا, ءاربىر شاڭىراققا كەلەتىن كىرىستى ەسەپكە الماي-اق الەۋمەتتىك جاردەماقى تولەۋ جولعا قويىلدى. وسى جىلدىڭ قاڭتار ايىنان باستاپ ءار بالاما ون مىڭ تەڭگەدەن استام قارجى تولەنە باستادى. بۇرىن كوپ بالالى انا رەتىندە بالالارىما جالپى 10 500 تەڭگە عانا الاتىنمىن. ەندى ونىڭ ورنىنا 63 مىڭ تەڭگە بەرىلۋدە. بۇل – تۇسىنە بىلگەنگە اجەپتاۋىر قولداۋ.
قالاي دەسەك تە ءوز مەملەكەتىڭنىڭ جىلۋىن سەزىنۋ, قامقورلىعىن كورۋ ادامعا كۇش-جىگەر بەرەدى. سەن دە سول قولداۋعا لايىقتى جاۋاپ بەرۋگە تىرىساسىڭ. بۇل ءوز كەزەگىندە مەملەكەت پەن حالىقتىڭ ءبىر-بىرىنە جاقىنداپ, ورتاق مۇددەگە ۇمتىلۋعا جول اشادى. قوعامدىق كەلىسىم نىعايادى.
ارينە, مەملەكەت الەۋمەتتىڭ بارلىق ماسەلەسىن ءبىر ساتتە شەشىپ تاستاي المايدى. ءبارى ۋاقىتىمەن, ءوز ورايىمەن, ءوز كەزەگىمەن شەشىلەدى. وسى ارادا ءبىر ايتا كەتەتىن جايت, ەلىمىزدە باسپانامەن قامتىلماعان كوپ بالالى وتباسىلاردىڭ قاتارى قالىڭ. وسى جايتقا ورتالىق جانە جەرگىلىكتى اتقارۋشى ورگاندار ءجىتى نازار اۋدارسا, قۇبا قۇپ بولار ەدى. ويتكەنى ەلىمىزدىڭ دەموگرافيالىق جاعدايىن جاقسارتۋ, مەملەكەتىمىزدىڭ ەرتەڭىنە قىزمەت ەتەر ۇرپاق تاربيەلەۋ –وتانىمىزدىڭ باستى ستراتەگياسى. ال وسى ستراتەگيانىڭ تابىستى جۇزەگە اسۋى انالارعا, ولارعا كورسەتىلەر ەرەكشە قامقورلىققا بايلانىستى. سوندىقتان ۇل-قىز ءوسىرىپ وتىرعان انالار ەشكىمنىڭ ەسىگىنىڭ الدىندا جاۋتاڭداپ جۇرمەۋى ءتيىس. قازاقستاندىق كەلەشەك انالار ءوزىنىڭ الدىنداعى بۋىننىڭ مەملەكەتتىڭ قولداۋىن كورىپ وتىرعانىن ءبىلىپ جەتىلسە, ەلىمىزدە ناعىز دەموگرافيالىق ءدۇمپۋ بولاتىنى ءسوزسىز.
گۇلبالا قوشتاي,
«كۇمىس القا» يەگەرى
