كەزدەسۋ بارىسىندا ەلىمىزدىڭ جانە الماتى قالاسىنىڭ دامۋ ماسەلەلەرى, سونداي-اق وتاندىق ازاماتتىق اۆياتسيانىڭ پروبلەمالارى مەن كەلەشەگى تالقىلادى.
دينار نوكەتاەۆا پارلامەنت سەناتىنىڭ زاڭ شىعارۋ جۇمىسىمەن تانىستىردى. 2020 جىلدان باستاپ از قامتىلعان جانە كوپ بالالى وتباسىلارعا اتاۋلى الەۋمەتتىك كومەك كورسەتۋ تەتىكتەرىنىڭ جەتىلدىرىلگەنى جانە از قامتاماسىز ەتىلگەن وتباسىلاردان شىققان بالالارعا كەپىلدى الەۋمەتتىك پاكەت ەنگىزىلگەنى تۋرالى ايتا كەلىپ, سەناتور الەۋمەتتىك كومەكتىڭ جاڭا سيپاتىنا نازار اۋداردى.
اۋە تاسىمالى سالاسىنىڭ قىزمەتكەرلەرى ءوز كەزەگىندە اۋەجاي جۇمىسى تۋرالى ەگجەي-تەگجەيلى ايتىپ, جولاۋشىلارعا ءاردايىم ساپالى قىزمەت كورسەتۋگە ەرەكشە نازار اۋدارىلاتىنى جانە مۇمكىندىگى شەكتەۋلى ادامدارعا بارلىق جاعداي جاسالعانىن اتاپ ءوتتى. سونىمەن قاتار, اۋەجاي باسشىلىعى كومپانيانىڭ بارلىق قىزمەتكەرلەرى مىندەتتى الەۋمەتتىك مەديتسينالىق ساقتاندىرۋ جۇيەسىنە قاتىساتىنى تۋرالى ايتتى. ولار سونداي-اق بىلىكتى مامانداردىڭ جەتىسپەۋشىلىگىنە الاڭداۋشىلىق ءبىلدىردى.
دينار نوكەتاەۆا كەزدەسۋدى قورىتىندىلاي كەلىپ, مەملەكەت باسشىسىنىڭ قازاقستان حالقىنا جولداۋىندا بەلگىلەنگەن ستراتەگيالىق مىندەتتەردىڭ ماڭىزىن اتاپ ءوتتى.
