ناقتى ايتقاندا, 450,9 مىڭ جەتىسۋلىق قالادا تىرشىلىك ەتسە, اۋىلداردى 1600 مىڭ جان باسى مەكەن ەتەدى. جالپى, 2019 جىلى وبلىستا دەموگرافيالىق جاعداي قالىپتى دەڭگەيدى كورسەتتى. ياعني, بۇرناعى جىلمەن سالىستىرعاندا 1000 ادامعا شاققانداعى تابيعي ءوسىم 18,4 ادامعا كوبەيىپ, 9 اي ارالىعىندا عانا 37 781 ءسابي دۇنيە ەسىگىن اشقانى انىق. ال 2019 جىلدىڭ وسى مەرزىمىندە دۇنيە سالعاندار سانى 10 020 ادامدى قۇراپ, الدىڭعى جىلمەن سالىستىرعاندا 6,54 مارقۇمعا ازايعان, ول كەزدە ايماقتا 10 043 ادامنىڭ جانازاسى شىعارىلعان ەكەن.
ستاتيستيكالىق مالىمەتتەردى سارالاساق, 2019 جىلدىڭ باسىنان بەرى جەتىسۋعا 83 301 ادام كوشىپ كەلىپتى. بىراق وتكەن مەرزىمدە وبلىستا كوشى-قوننىڭ تەرىس ايىرماسى دا قالىپتاسقانى بايقالدى. ماسەلەن, ايماقتان ىرگە كوتەرۋشىلەر سانى 99 090 ادامعا جەتىپ, كوشىپ كەلۋشىلەر سانىمەن سالىستىرعاندا 15 789 جانعا كوبەيگەن. بۇل كورسەتكىش ارعى جىلمەن سالىستىرعاندا 20,2 پايىزعا ءوسىپ وتىر. كوشى-قون ۇدەرىسى نەگىزىنەن تمد ەلدەرىنە باعىتتالىپتى. ياعني, الماتى وبلىسىنان كوشىپ كەتكەندەردىڭ 83 پايىزىنىڭ تاڭداۋى كورشى ەلدەرگە تۇسكەن. ال وسى تمد اۋماعىنان وبلىسقا كەلۋشىلەر سانى 67,4 پايىز شاماسىندا ەكەن.
ەسەسىنە, جەتىسۋعا باعىتتالعان ىشكى ميگراتسيا ۇلەسى باسىم. 2019 جىلى ەلدىڭ باسقا وڭىرلەرىنەن كوشىپ كەلۋشىلەر سانى 14,5 پايىزعا ۇلعايعان. جالپى, الماتى وبلىسىنىڭ اۋماعىن مەكەندەگەن ەل-جۇرتتىڭ جالپى ۇلەسى 2 ملن 47 مىڭ ادامعا جەتتى. ونىڭ ىشىندە تۇرعىنداردىڭ 60 پايىزى الماتى قالاسىنىڭ ماڭىن مەكەن ەتەدى ەكەن. ياعني, مەگاپوليسپەن شەكتەسەتىن اۋدانداردا 1 ملن 200 مىڭ ادام تىرشىلىك ەتۋدە.
ايتپاقشى, ەل كولەمىندە ءجيى ءوتىپ تۇراتىن «قۇقىق ءتارتىبى» ارنايى شاراسىنىڭ ناتيجەسىندە الماتى وبلىسىنىڭ اۋماعىندا كوشى-قون ەرەجەسىن ورەسكەل بۇزعان ادامدار قاتارى دا انىقتالۋدا. 2019 جىلدىڭ سوڭىندا ولاردىڭ سانى توقسان ەكىگە جەتكەن. ارالارىندا شەتەل ازاماتى دا بار.
– ەلىمىزدىڭ ميگراتسيا زاڭىنا قايشى ارەكەت جاساعان شەتەل ازاماتتارىنىڭ كىناسى دالەلدەندى. جەكە باسىن كۋالەندىرەتىن قۇجاتى جوق 34 ادام ارنايى ۇستاۋ ورنىنا قامالدى, 11 ادام مەملەكەتتىك شەكارادان شىعارىلدى. جالپى, «قۇقىق ءتارتىبى» ارنايى شاراسىنىڭ اياسىندا وبلىس اۋماعىندا قۇجات ءتارتىبىن بۇزعان 8 ەفيوپيا مەن سومالي ەلىنىڭ ازاماتى, 2 تۇركيالىق جانە 29 وزبەكستاندىق انىقتالدى, – دەدى وبلىستىق پوليتسيا دەپارتامەنتىنىڭ وكىلى سەرىك ۇپيەۆ.
ياعني, 2019 جىلى جەتىسۋعا زاڭسىز جولمەن كەلگەن 1157 سىرت ەل ازاماتىنىڭ ءجۇرىپ-تۇرۋىنا شەكتەۋ قويىلعان ەكەن. سونداي-اق ۆيزا ەرەجەسىن بۇزعان 9,5 مىڭ شەتەلدىك انىقتالىپتى. جالپى, الماتى وبلىسىنا كەلەتىن شەتەلدىكتەر اعىنى جىلدان جىلعا كوبەيىپ وتىر. سوڭعى دەرەك بويىنشا بۇل كورسەتكىش بۇرناعىدان 10,2 پايىزعا ءوسىپ, كەلۋشىلەر سانى 251 752 ادامعا جەتىپتى.
الماتى وبلىسى
