ەلدىكتىڭ ەڭسەسىن بيىكتەتەر 2020 جىلدىڭ العاشقى جارلىعى 2 قاڭتاردا شىقتى. پرەزيدەنت قاسىم-جومارت توقاەۆ «قازاقستان رەسپۋبليكاسىنىڭ اكىمشىلىك-اۋماقتىق قۇرىلىسى تۋرالى» 1993 جىلعى 8 جەلتوقسانداعى قازاقستان رەسپۋبليكاسى زاڭىنىڭ 9-بابىنا سايكەس قاۋلى ەتىپ, بۇل قۇجاتتا «قوستاناي وبلىسى قوستاناي اۋدانىنىڭ اۋداندىق ماڭىزى بار قالالار ساناتىنا جاتقىزىلسىن; زاتوبول كەنتى توبىل قالاسى بولىپ قايتا اتالسىن» دەپ كورسەتىلدى. اتالعان جارلىق العاشقى رەسمي جاريالانعان كۇنىنەن باستاپ قولدانىسقا ەنگىزىلەدى.
وسىلايشا تۋعان جەرگە تۋ تىگىپ, ايدار تاعۋ ءوڭىردى تۇلەتۋگە تۇرتكى بولماق. توبىل بولىپ تۇرلەنگەن قالا توبىل وزەنىنىڭ وڭ جاعالاۋىنان ورىن تەپكەن. بۇرىنعى زاتوبول كەنتىن قايتا اتاۋ باستاماسى قاشاننان بەرى كوتەرىلىپ, وعان قالا مارتەبەسىن بەرۋ دە نازاردان تۇسكەن جوق. كەنتتىڭ قالا مارتەبەسىن الۋى ونداعى الەۋمەتتىك-ەكونوميكالىق جانە دەموگرافيالىق جاعدايعا وڭ سەرپىن بەرەتىنىنە, ورتالىقتا حالىققا قولايلى عيماراتتار بوي كوتەرەتىنىنە سەنىمدىمىز. قازىردىڭ وزىندە جاڭا شاعىن اۋداندار سالىنعان ەلدى مەكەن ودان ءارى وركەندەي تۇسپەك. مۇنىمەن قوستاناي وبلىسىندا التىنشى قالا قانات جايادى.
بۇعان دەيىن جەرگىلىكتى دەڭگەيدە تالاي رەت تالقىلانعان بۇل ماسەلەگە كەلگەندە تۇرعىنداردىڭ پىكىرى ەكىگە بولىنگەن ەدى. 26 مىڭنان اسا حالقى بار قالادا ءتۇرلى ەتنوس وكىلدەرى شوعىرلانعان. ولاردىڭ ىشىندە كەلمەسكە كەتكەن كەڭەس وداعىنىڭ كەزىندە تاڭىلعان زاتوبول اتاۋىن قالدىرۋدى قۇپتايتىندار دا بولدى. دەگەنمەن كەنتتى قايتا اتاۋ قالا رەتىندە دامۋعا باستايتىنى كوپشىلىكتىڭ كوڭىلىنە سەنىم ۇيالاتتى. قالاي بولعاندا دا شاڭىراققا قاراپ تىرشىلىگىن جاساعان تۇرعىنداردىڭ ورتاق ماقساتقا جۇمىلۋى بىرلىگىمىزدى نىعايتىپ, بەرەكەمىزدى كىرگىزەرى داۋسىز.
سونىمەن قاتار قالانىڭ توبىل اتالۋى وڭىردەگى مەملەكەتتىك ءتىلدىڭ الەۋەتىن كۇشەيتۋگە دە سەپتىگىن تيگىزەدى. بۇل قالاداعى ءۇش بالاباقشانىڭ بىرەۋى عانا بالدىرعانداردى قازاق تىلىندە تاربيەلەسە, ءتورت مەكتەپتىڭ تەك بىرەۋى مەملەكەتتىك تىلدە ءبىلىم بەرەدى ەكەن.
وسىنىڭ الدىندا قوستاناي وبلىسىنداعى تاران اۋدانى بەيىمبەت مايلين دەپ قايتا اتالعان ەدى. سوڭعى كەزدەردى وبلىستا ونوماستيكا سالاسىنداعى جۇمىستار وڭ ناتيجەسىن كورسەتىپ جاتىر. وڭىردەگى 142 اۋىلدىق وكرۋگتىڭ 42-ءسى, 556 اۋىلدىڭ 63-ءى, 6138 كوشەنىڭ 602-ءسى يدەولوگيالىق تۇرعىدان ەسكىرگەن. وتكەن ەكى جىل ىشىندە 1 اۋدان, 7 اۋىلدىق وكرۋگ, 7 اۋىل, 106 كوشە جانە 14 نىساننىڭ اتاۋلارى وزگەرتىلگەن. جالپى, پرەزيدەنت اكىمشىلىگىنىڭ مالىمەتىنە سايكەس, بۇگىندە ەلىمىزدە يدەولوگيالىق تۇرعىدا ەسكىرگەن 5017 كوشە, 901 ەلدى مەكەن جانە 940 نىسان بار ەكەن. ولاردىڭ نەگىزگى بولىگى قوستاناي, پاۆلودار, سولتۇستىك قازاقستان جانە قاراعاندى وبلىستارىندا ورنالاسقان.
جەر اتاۋلارىنىڭ تاريحىمىزدان تامىر تارتۋى – تەگىمىزدەن اجىراماعانىمىزدىڭ ايعاعى. اتامەكەننىڭ ءار ايماعى – ەلدىڭ ايناسى. بۇدان ءدال ءبىر جىل بۇرىن 3 قاڭتاردا شىعىس قازاقستان وبلىسىنىڭ زىريان اۋدانى جانە زىريان قالاسىنىڭ التاي اۋدانى جانە التاي قالاسى بولىپ اتالعانىنا بار قازاق سۇيىنگەن ەدى. وسىنداي اقجولتاي جاڭالىقپەن بيىل دا جىل اشىپ وتىرمىز. توبىل قالاسى بولىپ بويىن تىكتەگەن بۇل مەكەننىڭ قويناۋى قۇتقا تولا بەرسىن!
