مەملەكەت باسشىسى قاسىم-جومارت توقاەۆ ارمەنيانىڭ پرەمەر-ءمينيسترى نيكول پاشينيانمەن تەلەفون ارقىلى سويلەستى.
تاراپتار قازاقستان مەن ارمەنيا اراسىنداعى ىنتىماقتاستىقتى ەكىجاقتى فورماتتا دا, ەۋرازيالىق ەكونوميكالىق وداق اياسىندا دا ودان ءارى تەرەڭدەتۋدىڭ احۋالى مەن پەرسپەكتيۆالارىن تالقىلادى.
ارمەنيا پرەمەر-ءمينيسترى قازاقستان پرەزيدەنتىن كەلە جاتقان جاڭا جىلمەن قۇتتىقتادى. قاسىم-جومارت توقاەۆ تا نيكول پاشينياننىڭ مەملەكەتتىك قىزمەتىنە جاڭا جىلدا مول تابىس, دوستاس ارميان حالقىنا باق-بەرەكە تىلەدى.
سونىمەن قاتار مەملەكەت باسشىسى قاسىم-جومارت توقاەۆ وزبەكستان رەسپۋبليكاسىنىڭ پرەزيدەنتى شاۆكات ميرزيوەۆپەن تەلەفون ارقىلى سويلەستى.
اڭگىمەلەسۋ بارىسىندا مەملەكەتتەر باسشىلارى ەكىجاقتى قارىم-قاتىناستاردىڭ قارقىندى دامىپ كەلە جاتقانىن اتاپ ءوتىپ, ىنتىماقتاستىقتى ودان ءارى نىعايتۋدىڭ پەرسپەكتيۆالارىن تالقىلادى.
سونىمەن قاتار قازاقستان پرەزيدەنتىنىڭ بيىلعى 14-15 ساۋىردە وزبەكستانعا جاساعان مەملەكەتتىك ساپارىنىڭ ناتيجەسىندە قول جەتكىزىلگەن ۋاعدالاستىقتاردىڭ جۇزەگە اسىرىلۋ بارىسى قاراستىرىلدى.
وزبەكستانداعى قازاقستان جىلىنىڭ تابىستى وتكەنىنە ەرەكشە ءمان بەرىلدى. ونىڭ اياسىندا مادەنيەت, ونەر جانە ءبىلىم سالالارى بويىنشا ىقپالداستىقتى جانداندىرۋ جونىندە كوپتەگەن شارا ۇيىمداستىرىلدى.
قاسىم-جومارت توقاەۆ شاۆكات ميرزيوەۆتى كەلە جاتقان جاڭا جىلمەن قۇتتىقتاپ, وعان مەملەكەتتىك قىزمەتتە تابىس, باۋىرلاس وزبەك حالقىنا باق-بەرەكە تىلەدى.
سونداي-اق مەملەكەت باسشىسى بەلارۋس رەسپۋبليكاسىنىڭ پرەزيدەنتى الەكساندر لۋكاشەنكومەن تەلەفون ارقىلى سويلەستى.
مەملەكەتتەر باسشىلارى قازاقستان مەن بەلارۋس اراسىنداعى ساياسي, ەكونوميكالىق جانە مادەني-گۋمانيتارلىق بايلانىستاردىڭ دامۋ قارقىنىن وڭ باعالاپ, ەكىجاقتى ىنتىماقتاستىق ماسەلەلەرىن تالقىلادى.
تاراپتار بەلارۋستىڭ 2020 جىلى ەۋرازيالىق ەكونوميكالىق وداق ۇيىمىنا توراعالىق ەتۋىنە بايلانىستى ەۋرازيالىق ينتەگراتسيا اياسىنداعى ءوزارا ءىس-قيمىلداردى ودان ءارى دامىتۋ جونىندە پىكىر الماستى.
پرەزيدەنتتەر ءبىر-ءبىرىن جاڭا جىلمەن قۇتتىقتادى. قاسىم-جومارت توقاەۆ الەكساندر لۋكاشەنكوعا جاۋاپتى مەملەكەتتىك قىزمەتتە تابىس, دوستاس بەلارۋس حالقىنا باق-بەرەكە تىلەدى.
