ماڭعىستاۋ وبلىسى پەريناتالدىق ورتالىعىنىڭ ديرەكتورى جامال جامانباەۆانىڭ ايتۋىنشا, شالا تۋىلعان بالالاردىڭ انالارى مەن دارىگەرلەردىڭ كەزدەسۋى داستۇرگە اينالعان. اكۋشەر-گينەكولوگتار جانە نەوناتولوگتار جاس انالارمەن كەزدەسىپ, ەمەن-جارقىن سويلەسىپ, وتكەن كۇندەردى ەسكە ءتۇسىرىپ قانا قويماي, قاجەتتى دارىگەرلىك كەڭەس بەرۋگە ۋاقىت تاپتى. اق حالاتتى ابزال جانداردىڭ كاسىبيلىگى, ۇقىپتىلىعى جانە ادەپتىلىگىنىڭ ارقاسىندا جۇكتى ايەلدەردى بوساندىرۋ كەزىندە قانداي قيىندىق بولماسىن, تالاي تىعىرىقتان شىعۋدىڭ جولدارى تابىلدى.
-بۇگىندە شالا تۋىلعان بالالار ماسەلەسى ورتاق پروبلەماعا اينالدى. وسىنداي كۇردەلى ماسەلەگە تەك انالار نەمەسە دارىگەرلەر عانا ەمەس, جالپى قوعام نازار اۋدارۋى ءتيىس. ال بۇگىنگى كەزدەسۋ تۋرالى ايتاتىن بولساق, ءبىزدىڭ پەريناتالدىق ورتالىقتا دۇنيەگە كەلگەن كىشكەنتاي تۇرعىندارىمىزدىڭ باسىن قوسىپ, مەرەكەلىك كوڭىل-كۇي سىيلاعىمىز كەلدى. ولاردىڭ قالاي ءوسىپ جاتقاندىعى جانە ءتاتتى قىلىقتارىن ءوز كوزىمىزبەن كورسەك دەگەن ويمەن ۇيىمداستىرعان بولاتىنبىز. بالالاردىڭ كۇلكىسىنە قاراپ, بالداي ءتاتتى اڭگىمەلەرىن تىڭداپ ءبىر قۋانىپ قالدىق. جالپى ورتالىققا ايەلدەر ءتۇرلى پاتولوگيامەن ءتۇسىپ جاتادى جانە بارلىعى دا بوسانۋ پروتسەسى قالاي بولار ەكەن دەپ الاڭدايدى. ءبىز, ولاردىڭ ارقايسىسىمەن سويلەسىپ قولداۋ كورسەتۋگە تىرىسامىز جانە ءۇمىت ۇزبەۋ كەرەكتىگىن ۇنەمى ەستەرىنە سالىپ وتىرامىز. ومىرگە كەلگەن ءاربىر ءسابي ەڭ الدىمەن دەنى ساۋ جانە باقىتتى بولۋى ءتيىس, دەيدى جامال ابدىبەكقىزى.
شارادا ءۇش جۇپ ەگىزدەر دە بولعاندىعىن ايتا كەتكەن ءجون. بارلىق بالالارعا جاڭا جىلدىق سىيلىقتار تابىستالدى. بۇگىنگى شاراعا قاتىسقانداردىڭ ىشىندە كەزىندە 600 گرامم سالماقپەن ومىرگە كەلگەن ريزا ەسىمدى كىشكەنتاي سۇلۋ بولدى. جاقىندا ول 3 جاسقا تولادى. اجەسى قانسۇلۋ بالسەيتوۆامەن بىرگە ەرىپ كەلگەن ول, بۇگىندە تۇپقاراعان اۋدانى سايىن-شاپاعاتوۆ اۋىلىندا اتا-اناسىمەن بىرگە تۇرىپ جاتىر. ال اجەسى بولسا «التىن القا» يەگەرى, 8 ۇل مەن قىز تاربيەلەپ وسىرگەن. ال نەمەرەلەرىنىڭ سانىن ايتقاندى ءجون كورمەدى. قازىرگى تاڭدا ماڭعىستاۋ اۋدانى شەتپە اۋىلىندا تۇرادى.
-ارينە, ەڭ الدىمەن بارلىعى اللانىڭ قالاۋىمەن بولادى جانە سودان كەيىنگى ءۇمىتىمىز دارىگەرلەردە. بۇگىنگى شاراعا مەن ەكى نەمەرەمدى الىپ كەلدىم. ەكىنشى نەمەرەم دە شالا تۋىلعان. ونىڭ سالماعى 1 كەلى 700 گرامم بولاتىن. العاشىندا ۋايىمداعانىم راس, سەبەبى سالماعى تىم از بولعاندىقتان ءتۇرلى وي كەلدى. قازىر بارلىعى جاقسى, شۇكىر دەيمىن. بارلىعى وسى پەريناتالدىق ورتالىقتاعى جۇمىس جاساپ جاتقان دارىگەرلەردىڭ ارقاسى دەپ بىلەمىن. بۇگىنگى باسقوسۋ كوپكە دەيىن ەستە قالارى ءسوزسىز. بالالار ءان سالىپ, بي بيلەپ, كوڭىلدەرى كوتەرىڭكى ەكەندىگىن سىرتتاي قاراپ وزىمىزدە قۋانىپ ءجۇرمىز. بۇدان اسقان باقىت جوق دەپ ويلايمىن, بارلىعى ءۇشىن مىڭ العىس, دەيدى ول كوزىنە جاس الىپ.
ءوز كەزەگىندە جامال ابدىبەكققىزى بارلىق جينالعان قوناقتار مەن ۇجىمىن كەلە جاتقان جاڭا 2020 جىلمەن قۇتتىقتاپ, مىقتى دەنساۋلىق, وتباسىلىق باقىت, ۇزاق عۇمىر, ءاربىر شاڭىراقتا دەنى ساۋ ۇرپاق كەلە بەرۋىن تىلەدى. سونداي-اق دۇنيەجۇزىلىك شالا نارەستەلەر كۇنىنە وراي دەنساۋلىق ساقتاۋ سالاسىنىڭ دامۋىنا قوسقان ۇلەسى ءۇشىن بىرقاتار قىزمەتكەرگە العىس جاريالادى جانە «الاقانداعى ءومىر» جازۋى بار ەستەلىك كادەسىي تابىستادى.
ال, انالار بولسا مەرزىمىنەن بۇرىن تۋىلعان بالالارعا قامقورلىق ءبىلدىرىپ كەلە جاتقان وبلىستىق پەريناتالدىق ورتالىعىنىڭ ۇجىمىنا العىس ايتىپ, شالابايلاردىڭ ءومىرىن ساقتاپ قالۋ ىسىندە مەديتسينادا تەحنولوگيالار جاڭارىپ, دارىگەرلەردىڭ بىلىكتىلىگى ودان سايىن ارتا بەرۋىنە تىلەكتەستىگىن جەتكىزدى.
