شارانى اشقان باسىلىم باسشىسى دارحان قىدىرالى «ەگەمەن» ۇجىمىنىڭ بيىلعى اتقارعان جۇمىسىنا جوعارى باعا بەرىپ, مەرەيتويدى رەسپۋبليكالىق دەڭگەيدە جانە وڭىرلەردە اتاپ وتۋگە اتسالىسقان ارىپتەستەرىنە ەرەكشە ىقىلاسىن ءبىلدىردى. «ەلىمىزدىڭ باس باسىلىمى ابايدىڭ تۋعان جەرىنەن باستاۋ العان گازەتتىڭ ءجۇز جىلدىق مەرەيتويىن بارلىق وڭىرلەردە اتاپ ءوتتى. قاراعاندى, قوستاناي, جەزقازعان, ورال, الماتى, ورىنبور جانە وزگە دە ايماقتاردا ءتۇرلى شارالار ءوتتى. مەرەيتوي قارساڭىندا 5 تومدىق ء«جۇز جىلدىق جىلناما» كىتابى, فيلم, فوتوشەجىرە جارىق كوردى, تسيفرلى ءارحيۆى جاساقتالدى. گازەت ۇجىمىنا, وڭىردەگى تىلشىلەرگە وسى جىلى اتقارعان جۇمىسىنا العىس ايتا وتىرىپ, كەلەسى جىلى ساتتىلىك تىلەيمىن», دەدى دارحان قىدىرالى.
سونداي-اق شاراعا ارنايى كەلگەن قوناقتار – باسىلىمنىڭ ديرەكتورلار كەڭەسىنىڭ مۇشەلەرى, عالىمدار نامازالى وماشەۆ پەن سەرىك نەگيموۆكە جانە باس گازەتتىڭ ءانۇرانىنىڭ اۆتورى ءارى ورىنداۋشىسى ءانشى-كومپوزيتور ەلەنا ابدىحالىقوۆاعا «Egemen Qazaqstan» گازەتىنىڭ مەرەيتويلىق توسبەلگىسى تابىستالدى.
كەزدەسۋ بارىسىندا دارحان قىدىرالى فوتوتىلشىلەردىڭ ەڭبەگىن ەرەكشە اتاپ ءوتتى. مەرەيتويدا 1919-2019 جىلدار اراسىندا تۇسىرىلگەن سۋرەتتەردى قامتيتىن «جۇزجىلدىق جىلناما» فوتوشەجىرەسىنىڭ جارىق كورگەنى جانە وسى البومدى قۇراستىرۋدا گازەتتىڭ ارداگەر-فوتوتىلشىلەرى شۇكىرالى شاحاي مەن سوۆەتبەك ماعزۇموۆتىڭ ەڭبەگى زور ەكەنى ايتىلدى. وتاندىق فوتوجۋرناليستيكانىڭ جامپوزدارى دا «ەگەمەننىڭ» مەرەيتويلىق مەدالىنە يە بولدى.
گازەتتە ۇزاق جىلدار بويى جۇمىس ىستەگەن, زەينەت جاسىنا تولۋىنا بايلانىستى ءنازيرا جارىمبەت, ءومىر ەسقالي, بەرىك سادىر, جىلقىباي جاعىپار ۇلى سەكىلدى ارداگەر-جۋرناليستەردىڭ وسى جىلدار ارالىعىندا اتقارعان جۇمىسى باعالانىپ, ارىپتەستەر تاراپىنان قوشەمەتكە بولەندى. ءباسپاسوزدىڭ بايىرعى قىزمەتكەرلەرىنە «ەرەن ەڭبەگى ءۇشىن» جانە «ەڭبەك داڭقى» مەدالدارى تابىستالدى.
باسىلىم باسشىسى, قۇرمەتتى قوناقتار مەن اعا بۋىن جۋرناليستەر «Egemen Qazaqstan» گازەتىنىڭ كەلەسى جۇزجىلدىق تاريحىن جازۋ جاستاردىڭ قولىندا ەكەنىن العا تارتىپ, جاس ارىپتەستەرىنە ۇلكەن سەنىم بىلدىرەتىندەرىن جەتكىزدى.
