تۇرعىن ءۇي كەشەنىنىڭ اشىلۋىنا ۇلەسكەرلەردەن بولەك نۇر-سۇلتان قالاسى اكىمىنىڭ ورىنباسارى التىنبەك قايساعاليەۆ قاتىستى.
«جاڭا جىل قارساڭىندا كوپتەن بەرى ارمانداپ كۇتكەن پاتەرلەرىڭىزگە قول جەتكىزگەندەرىڭىز ءبىز ءۇشىن ۇلكەن قۋانىش. وسىدان جەتى جىل بۇرىن قۇرىلىسى باستالعان تۇرعىن ءۇي كەشەنىنە 200-دەن استام وتباسى قارجى سالعان. تۇڭعىش پرەزيدەنت – ەلباسى نۇرسۇلتان نازارباەۆ پەن مەملەكەت باسشىسى قاسىم-جومارت توقاەۆتىڭ قولداۋىمەن جانە ۇكىمەت باسشىسىنىڭ جەتەكشىلىگىمەن ارنايى قاراجات ءبولىنىپ, سونىڭ ناتيجەسىندە بۇل ءۇيدىڭ قۇرىلىسى اياقتالدى. قۇرىلىس بارىسىندا ايتارلىقتاي قيىندىقتار بولعانى راس. دەي تۇرعانمەن «ەلوردا قۇرىلىس كومپانياسىنىڭ», قۇرىلىس كووپەراتيۆىنىڭ باسشىسى گۇلنار قاسىموۆانىڭ اتقارعان جۇيەلى جۇمىسىنىڭ ناتيجەسىن بۇگىن كورىپ وتىرمىز» دەدى التىنبەك قايساعاليەۆ.
وسىدان كەيىن سالتاناتتى تۇردە تۇرعىن ءۇي كەشەنىنىڭ كىلتى تابىس ەتىلدى. بۇعان قوسا التىنبەك قايساعاليەۆ «نۇرلى جەر» باعدارلاماسىنا قاتىسىپ, «كومفورت De Luxe» تۇرعىن ءۇي كەشەنىنىڭ اياقتالۋىنا تىكەلەي سەبەپكەر بولعان كومپانيا باسشىلارىنا قالا اكىمىنىڭ العىس حاتىن تابىستادى.
سالتاناتتى جيىندا ءسوز العان قۇرىلىس كووپەراتيۆىنىڭ باسشىسى گۇلنار قاسىموۆا قالا اكىمىنىڭ قۇرىلىس بارىسىن ءاردايىم باقىلاۋدا ۇستاعانىن اتاپ ءوتتى.
«تۇرعىن ءۇي كەشەنىنىڭ سىرتقى جەلىسىندە ۇلكەن قيىندىقتار بولاتىن. بىراق قالا اكىمى پروبلەماعا اينالعان ءۇيىمىزدى ءوز باقىلاۋىندا ۇستاسا, ورىنباسارى التىنبەك كەڭەس ۇلى اپتاسىنا ەكى-ءۇش مارتە كەلىپ تەكسەرىپ ءجۇردى. نۇر-سۇلتان قالاسىنىڭ اكىمدىگىنە ۇلەسكەرلەر اتىنان العىسىمىزدى بىلدىرەمىز» دەدى قۇرىلىس كووپەراتيۆىنىڭ باسشىسى.
جيىن بارىسىندا جاڭادان قونىس تويىن تويلاعالى وتىرعان دامەلى ابدىحالىقوۆا «كومفورت De Luxe» تۇرعىن ءۇي كەشەنىنىڭ ۇلكەن قيىندىقتارمەن سالىنعانىن قوزعاپ ءوتتى. ول ايىنا كەمىندە ەكى رەتتەن كەلىپ, كەز كەلگەن پروبلەمانى شەشىپ وتىرعان قالا باسشىسى التاي كولگىنوۆكە ەرەكشە العىسىن ءبىلدىردى.
ء«بىز 2012 جىلى «ازبۋكا جيليا» كومپانياسىنا» اقشامىزدى سالعاننان كەيىن 2013 جاڭا ۇيىمىزگە كوشۋىمىز كەرەك بولاتىن. وكىنىشكە وراي, كومپانيا باسشىلارى ءوز مىندەتتەرىن ورىنداماي, قالتالارىنا اقشا تۇسكەن سوڭ شەتەل اسىپ قاشىپ كەتتى. سودان ەلوردا اكىمدىگىنە شاعىمدانىپ بارعانىمىزدا قالا باسشىلىعى تۇرعىن ءۇي كەشەنىن «وردا ينجينەرينگ» ۇيىمىنا تاپسىردى. بىراق بۇل كومپانيا سوتپەن جەڭىپ العان اكتيۆتەرىمىزدى ساتىپ, قۇرىلىستى اياقتاماي كەتتى. كوپ ۇزاماي مەملەكەت تاراپىنان «نۇرلى جەر» باعدارلاماسى جاريالانىپ, سونىڭ اياسىندا پروبلەمالى ءۇيىمىز «ەلوردا قۇرىلىس كومپانياسىنا» بەكىتىلدى. تەندەر جاريالانىپ, باسپانامىزدى «مەركۋري جانە ك» ۇيىمى اياقتادى. ءبىزدىڭ جاعدايىمىزدى نازاردان تىس قالدىرماعان پرەزيدەنتىمىزگە, نۇر-سۇلتان قالاسىنىڭ اكىمدىگىنە العىسىمىز شەكسىز» دەدى جاڭا باسپانانىڭ يەسى.
ايتا كەتەيىك, «كومفورت دە ليۋكس» تۇرعىن ءۇي كەشەنى ەلوردانىڭ شۇبارى شاعىن اۋدانىنداعى قالقامان جانە ناركەسكەن كوشەلەرىنىڭ قيىلىسىندا ورنالاسقان. ول ءوز مىندەتىن تولىق اياقتاماعان قۇرىلىسشىلاردىڭ كەسىرىنەن 2015 جىلى پروبلەمالى تۇرعىن ۇيلەردىڭ قاتارىنا ەنگىزىلگەن بولاتىن. 2018 جىلى نۇر-سۇلتان قالاسى اكىمدىگىنىڭ جانىنداعى تۇرعىن ءۇي قۇرىلىسىنا ۇلەستىك قاتىسۋ ماسەلەلەرى جونىندەگى ۆەدومستۆوارالىق كوميسسيا «نۇرلى جەر» باعدارلاماسى اياسىندا قۇرىلىستى اياقتاۋ ءۇشىن «ەلوردا قۇرىلىس كومپانياسى» جشس ۋاكىلەتتى ۇيىمىنا ۇسىنىلعان. كەشەن 3 كىرەبەرىستەن, 20 قاباتتان تۇرادى.
