ەلوردا اكىمى التاي كولگىنوۆ قالا تۇرعىندارىن جاڭا قونىستارىمەن جانە كەلە جاتقان جاڭا جىل مەرەكەسىمەن قۇتتىقتادى.
«قۋانارلىق جايت. ەلباسى نۇرسۇلتان ءابىش ۇلى نازارباەۆ بەكىتكەن «نۇرلى جەر» مەملەكەتتىك قولجەتىمدى تۇرعىن ءۇي باعدارلاماسىنىڭ ارقاسىندا ءسىز كوپتەن كۇتكەن پاتەرلەرگە يە بولىپ وتىرسىزدار. تۇرعىن ءۇي كەشەنىنىڭ ورنالاسقان جەرى جاقسى, سول جاعالاۋدا. قونىستارىڭىز قۇتتى بولسىن, جاڭا جىلدى جاڭا پاتەردە قارسى الاسىزدار! 2020 جىلدىڭ ءبىرىنشى جارتىجىلدىعىنىنان باستاپ تۇرعىن ءۇي كەشەنىنىڭ ءبىرىنشى قاباتىندا ەمحانا, بالالارعا ارنالعان شاعىن ورتالىقتار, «كاسىپكەر انا» ورتالىعى, پوليتسيا پۋنكتى وڭالتۋ ورتالىقتارى جۇمىس ىستەيدى. وسى جىلى قالا تۇرعىندارىنا 3,5 مىڭ پاتەر بەرىلدى. پرەزيدەنت قاسىم-جومارت كەمەل ۇلى توقاەۆتىڭ تاپسىرماسىنا سايكەس كەلەسى جىلدان باستاپ قولجەتىمدى تۇرعىن ءۇي قۇرىلىسى كولەمىن 3 ەسەگە ارتتىرامىز» دەدى التاي كولگىنوۆ.
«قازاقستاننىڭ تۇرعىن ءۇي قۇرىلىس جيناق بانكى» اق باسقارما توراعاسى ءلاززات يبراگيموۆا اتاپ وتكەندەي, وسى جىلى 10,5 مىڭنان استام ەلوردا تۇرعىندارى پاتەر الدى. نۇر-سۇلتان قالاسىندا بارلىعى 208 مىڭنان استام بانك سالىمشىلارى بار. تۇرعىن ءۇي قۇرىلىس جيناق بانكى كليەنتتەرىنە 3,5% - دان 5% - عا دەيىن تۇرعىن ءۇي ساتىپ الۋعا نەسيە بەرەدى. 2019 جىلى نۇر-سۇلتان قالاسىنىڭ 9,5 مىڭنان استام تۇرعىنى تۇرعىن ءۇي ساتىپ الۋعا نەسيە الدى, 51 مىڭ تۇرعىن دەپوزيت اشتى.
