Fokker 100 – ورتا قاشىقتىقتاعى جولاۋشىلار ۇشاعى. نيدەرلاندتىق اۆياقۇرىلىس كومپانياسىنىڭ ەڭ كوپ سەريامەن شىعارعان ءونىمى. ۇشاق اتاۋى اتالعان كومپانيانىڭ نەگىزىن قالاۋشى انتون فوككەردىڭ ەسىمىمەن اتالعان. ۇشاققا 107 ادامعا دەيىن سىياتىن بولعاندىقتان دا اتالعان ماركاعا 100 اتاۋى بەرىلگەن. بۇل قىسقا جانە ورتا قاشىقتىقتاعى رەيستەردى ورىنداۋعا ارنالعان اۋە بورتى. اۋە كەمەسىنىڭ كورپۋسى ەنسىز, تارلاۋ بولىپ كەلەدى. بىراق ۇشقىر ءارى ۇنەمدى مودەل 1980 جىلداردىڭ سوڭىندا Bombardier CRJ200 مەن Embraer ERJ 145 اۋە كولىكتەرىنىڭ جەتىلدىرىلگەن ءتۇرى پايدا بولعانعا دەيىن سۇرانىسقا كەڭىنەن يە بولدى. Fokker 100 قۋاتىن ارتتىرعان قۇرىلعى Rolls-Royce Tay Mk 620-15 ەكى بىردەي تۋربو ۆەنتيلياتورلى قوزعالتقىشىنىڭ ورناتىلۋى بولاتىن.
العاشقى Fokker 100 1986 جىلى 30 قاراشادا اۋەگە كوتەرىلدى. ال سەرتيفيكاتتاۋى 1987 جىلى قاراشا ايىندا اياقتالدى. 1988 جىلى اقپان ايىندا ۇشاقتىڭ تۇڭعىش رەت پايدالانۋعا بەرىلگەن سەرياسىنا يە بولعان Swissair اۋە كومپانياسى جولاۋشىلاردى تاسىمالداي باستادى. ۇشاق نارىقتا ءوتىمدى بولعانىمەن, كومپانيا مەنەدجمەنتىنىڭ تيىمسىزدىگىنەن 1996 جىلى ءبىرجولا تاقىرعا وتىردى. Fokker 100 ۇشاقتارىن شىعارۋ 1997 جىلى توقتاتىلدى. زاۋىتتان بارلىعى 283 اۋە كەمەسى شىعارىلدى. 2006 جىلعى مالىمەت بويىنشا الەمنىڭ 47 اۋە كومپانياسىندا 229 ۇشاق جولاۋشىلارعا قىزمەت كورسەتىپ كەلەدى.
ال كەشەگى الماتىداعى اپاتتى قوسا العاندا بارلىعى 17 Fokker 100 ۇشاعى اپاتقا ۇشىراعان. ەكى مارتە اتالعان ۇشاقتى ۇرلاۋعا تىرىسۋ وقيعاسى تىركەلگەن, بىراق ەشكىم زارداپ شەكپەگەن. جالپى العاندا, وسى وقيعالاردان 183 ادام قازا بولعان. ونىڭ ىشىندە ەڭ ءىرى اپاتتاردى اتاپ وتەر بولساق, 1993 جىلى 5 ناۋرىزدا سكوپەدە (ماكەدونيا) 97 جولاۋشىنىڭ 83-ءى قازا بولسا, 1996 جىلى 31 قازاندا سان-پاۋلۋدا 95 جولاۋشى تۇگەل وپات بولدى. ەكى وقيعادا دا اپات اۋەگە كوتەرىلۋ كەزىندە بولعان.
